Efesios 5:25 - Emberá Chamí

²⁵ Mukĩrarã wẽra bara nuree, machi wẽra kʉ̃riásturu, Cristoba dachi kʉ̃ria b̶uu unubid̶a kĩra. Kʉ̃riad̶eeba dachi baita ara ichi ida beabisii.

Efesios 5:25 Iomraidhean Croise

Mateo 20:28

Ara mau kĩra mʉ, chi Ẽbẽra Ba B̶uad̶a neewẽa b̶uu ẽbẽrarã mʉ baita bari trajabadaurã nuread̶amera. Maumaarã nee b̶uu ẽbẽrarã baita bari trajabarii b̶uai baita. Maka mʉ biui ãrea ẽbẽrarã karibai baita.

Juan 6:51

Mʉ chi panbʉ, chi chokae b̶uabibarii, chi bajãad̶ebena need̶a. Barikiuba mau pan kooruubʉrã ewaricha chokae b̶uai. Chi mʉʉba dea b̶uu pan mʉ kakuabʉ. Mʉʉba mʉ kakua deai, mauba ẽbẽrarã chokae nuread̶amera.

Hechos 20:28

»Dachi Akõreba ichi Warr oad̶eeba ẽbẽrarã ichi baita nedosii. Dachi Akõre Jauriba machi b̶usii ãbarã nu panad̶amera. Maud̶eeba ara machi du ab̶a ãrea kauwa panásturu maud̶e Dachi Akõred̶e ijãabadaurã joma nu panásturu.

Gálatas 1:4

Ara mau Jesucristoba ichi dachi kachirua kakua ida beabisii nau ewari kachiruad̶ebena karibai baita. Maka wausii Dachi Bajãad̶ebena Akõreba maka kʉ̃riasiid̶eeba.

Gálatas 2:20

Mʉ Cristo ome cruzd̶e ãbua jirab̶usid̶au. Maud̶eeba ara mʉʉd̶eeba b̶uwãema, maumaarã Cristo mʉ sõd̶e b̶uu. Nau kakuad̶e chokae b̶uumisa mʉ Dachi Akõre Warr Jesusd̶eeba nibai. Ara mau Jesús, Dachi Akõreba waubi b̶uu wausiid̶eeba, mʉ kʉ̃riasii maud̶e mʉ kakua ichi ida beabisii.

Efesios 5:2

Jomaurã kʉ̃riásturu Cristoba dachi kʉ̃ria b̶uu unubid̶a kĩra. Kʉ̃riad̶eeba dachi kakua ara ichi beabisii Dachi Akõremaa ãnimara baa dearuu kĩra. Dachi Akõreba mau biꞌia unusii.

Efesios 5:24

Cristo ẽbẽrarãba ichi bed̶ea ijãabadau kĩra wẽraba ichi kima bed̶ea joma ijãa b̶uai b̶uu.

Efesios 5:28

Ara mau kĩra mukĩraba ichi kima ãrea kʉ̃ria b̶uai b̶uu ara ichi kakua kʉ̃ria b̶uu kĩra. Mukĩraba ichi kima kʉ̃ria b̶uubʉrã, ara ichi kʉ̃ria b̶uu.

Efesios 5:33

Mau ʉ̃rʉbena kuitaabi b̶umina machicha machi kima kʉ̃ria nuread̶ai panuu ara machi kʉ̃ria panuu kĩra. Maud̶e wẽraba ichi kima wapeadee b̶uai b̶uu.

Colosenses 3:19

Mukĩrarã wẽra bara nuree, machi wẽra kʉ̃riásturu. Maarã ome kĩrubi id̶aa panarã́sturu.

1 Timoteo 2:6

Ara ichi ida beabisii ẽbẽrarã joma kariba b̶uai baita. Dachi Akõreba b̶ud̶a ewarid̶e mau kuitaabisii.

1 Pedro 3:7

Mukĩrarã wẽra barau nuree, kʉ̃risia biad̶eeba machi wẽra ome biꞌia panásturu. Machi wẽra biꞌia b̶uabii kʉ̃ria panuud̶eeba ãchi biꞌia nu panásturu, wẽra mukĩra aude meserãaswãe niid̶eeba maud̶e machi omea ãbua Dachi Akõre sõbiad̶eeba ichiba chokae panabiasiid̶eeba. Maka waud̶awẽebʉrã, machiba ʉtaa id̶iiduu Dachi Akõreba biꞌia ũriibai.

Apocalipsis 1:5

Maud̶e kʉ̃ria b̶uu Jesucristo bid̶a maka wau b̶uai. Ichiba Dachi Akõre ʉ̃rʉbena biawãra jarabarii. Biu b̶uad̶a naa chokae jiradusii, joma nau iujãad̶ebena chi reyrã audeara chi mechiu nii b̶uai baita. Mauba dachi kʉ̃ria b̶uu maud̶e ichi oad̶eeba kachiruad̶ebena karibasii.

Apocalipsis 5:9

Chi 24 chõrarã maud̶e chi kimare chokae nureerãba nau kari wid̶i karisid̶au: «Bichíturu biꞌia nii, mau karta adauped̶a, chi wãa kob̶ee oekuai baita, bichi beasid̶aud̶eeba. Bichi oa chesiiba ẽbẽrarã nedokuasii Dachi Akõre baita. Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebena chi nuree nedosii.