Efesios 5:20 - Emberá Chamí

²⁰ Dachi Mechiu Jesucristo trʉ̃d̶eeba ewaricha dachi Bajãad̶ebena Akõremaa ne joma baita ichíturu kid̶ibai ásturu.

Efesios 5:20 Iomraidhean Croise

Juan 15:16

Machiba mʉ jʉrʉ adaud̶aabasii. Mʉaburu machi jʉrʉ adausii. Bakuru jõ b̶eraakau chaubarii kĩra, mʉʉba machi b̶usii wãd̶aped̶a biꞌia waud̶amera. Mʉʉba machi jʉrʉ adausiid̶eeba machiba mʉ Chachamaa mʉ trʉ̃d̶eeba id̶iiduu ichiba deai.

Hechos 5:41

Ara makʉd̶e Jesusba bʉid̶arã judiorã mechiurãd̶ebena kĩrajʉʉ wãsid̶au. Kuitaa panasid̶au Dachi Akõreba ãchi biꞌia unusii ãchi Jesús trʉ̃d̶eeba biꞌiwãe panabiasid̶aud̶eeba.

Romanos 1:8

Naa mʉʉba jaraaruu: Jesucristod̶eeba mʉʉba joma machi baita Dachi Akõremaa ichíturu kid̶ibai abarii machiba Jesucristod̶e ijãa panuu ʉ̃rʉbena druachabenarãba berrea panuud̶eeba.

1 Corintios 1:4

Machi Jesucristo ome panuud̶eeba Dachi Akõreba ichi sõbiad̶eeba aid̶a b̶uu. Maud̶eeba mʉʉba Dachi Akõremaa ʉtaa id̶iiruucha machi kakua ichíturu kid̶ibai abarii.

1 Corintios 15:24

Kaad̶ebena ewarid̶e Cristoba jai kachiruarã jaradea ua b̶uabadaurã, jai kachiruarã mechiurã maud̶e jai kachirua meserãa nuree joma poyaai. Maabae ichid̶irã ichi juad̶e nuree Dachi Bajãad̶ebena Akõremaa deai.

Efesios 5:4

Bed̶ea kachirua, nebʉrʉ biꞌiwãe maud̶e bed̶ea miadaa mia ʉibi berrearã́sturu, maka berreai biꞌiwãe b̶uud̶eeba. Maumaarã Dachi Akõremaa biꞌia b̶uu áduru.

Filipenses 1:3

Mʉʉba machi kĩrabaaruucha Dachi Akõremaa ichíturu kid̶ibai abarii.

Filipenses 4:6

Barikia kakua ãrea jirukaraarã́sturu, maumaarã Dachi Akõremaa ʉtaa id̶ísturu, ichimaa chi chuburia id̶ísturu, maud̶e ne joma ʉ̃rʉbena ichíturu kid̶ibai ásturu.

Colosenses 3:17

Machi berreaduud̶e maud̶e ne wauduud̶e joma wáusturu Dachi Mechiu Jesusba kʉ̃ria b̶uu kĩra. Ichid̶eeba Dachi Bajãad̶ebena Akõremaa ichíturu kid̶ibai ásturu.

1 Tesalonicenses 3:9

¿Saka ichíturu kid̶ibai jarad̶aima, dai ãrea kĩrajʉʉ panuu Dachi Akõre daad̶e machi ʉ̃rʉbena?

1 Tesalonicenses 5:18

Jomad̶e Dachi Akõremaa ichíturu kid̶ibai a panásturu. Mau Dachi Akõreba kʉ̃ria b̶uu, machi Jesucristod̶e ijãabadaud̶eeba.

2 Tesalonicenses 1:3

Ãbarã, daiba ewaricha machi baita Dachi Akõréturu kid̶ibai abadau. Daiba maka waubadau biꞌia b̶uu. Machiba ewaricha Cristo biꞌia ijãa panuu maud̶e biꞌia chiya kʉ̃ria panuu.

2 Tesalonicenses 2:13

Ãbarã, daiba ewaricha machi baita Dachi Akõremaa ichíturu kid̶ibai abadau. Dachi Mechiuba machi kʉ̃ria b̶uu. Ichiba arab̶aed̶eed̶e machi jʉrʉ adausii karibai baita. Machiba ichi bed̶ea biawãra ijãa panuud̶eeba maud̶e ichi Jauriba machi ichi baita biꞌia b̶ud̶ad̶eeba aid̶ai.

Hebreos 13:15

Maud̶eeba Jesucristod̶eeba dachiba, chi Dachi Akõred̶e ijãa panuu a panuuba, ewaricha ichimaa biꞌia berread̶ai panuu, ãnimara baa deaduu kĩra.

1 Pedro 2:5

Machi ichid̶ebena chokae nureed̶eeba, de waui baitabena mo kĩra nureebʉ. Machid̶ebena Dachi Akõreba ichi de wauruu. Maud̶e ichi baita machi paarerã babiaruu. Machiba Jesucristod̶ebena Dachi Akõre baita ne wau panuud̶e ichimaa ãnimara baa deaduu kĩra wau panuu. Maka wau panuu ichiba biꞌia unu b̶uu.

1 Pedro 4:11

Ab̶auba jaradearuubʉrã, Dachi Akõre bed̶ea jaradea b̶uud̶eeba kauwa jaradeai b̶uu. Ab̶auba waabena aid̶aaruubʉrã, Dachi Akõreba dea b̶uu poyaabariid̶eeba aid̶ai b̶uu. Ne joma wáusturu jomaurãba Jesucristod̶eeba Dachi Akõremaa biꞌia berread̶amera. Ichíturu ewaricha biꞌia berread̶ai panuu. Biꞌia b̶uu ne joma ichi juad̶e uru b̶uai. Ãrea biꞌia b̶uu maka b̶uai.