Apocalipsis 20:15 - Emberá Chamí

¹⁵ Chi ẽbẽrarã trʉ̃ chi ewaricha chokae duanabarii kartad̶e wãꞌãerã Dachi Akõreba mau ea chob̶ead̶e azufre bara aoko nub̶uud̶e jiratasii.

Apocalipsis 20:15 Iomraidhean Croise

Mateo 13:42

Maarã tʉbʉ aokod̶e b̶atakuad̶ai. Aria kĩra nomaa jẽa panad̶ai maud̶e puꞌuaba kid̶a kʉrrʉa ko panad̶ai.

Mateo 13:50

Maabae tʉbʉ aokod̶e b̶atakuad̶ai. Aria kĩra nomaa jẽa panad̶ai maud̶e puꞌuaba kid̶a kʉrrʉa ko panad̶ai.

Mateo 25:41

»Maabae mʉ jua sordoare panuurãmaa jarai: “Machi, chi Dachi Akõreba nebʉra barau abadaurã, mʉ jãkaabena ãyaa wã́sturu tʉbʉchia kiikaud̶aa. Mau Dachi Akõreba b̶usii jʉbawãe nii, ichid̶irã baara kastikai baita.

Marcos 16:16

Mau bed̶ea ijãaduubʉrã maud̶e boro eaduubʉrã Dachi Akõreba mau karibai. Maamina chi mau bed̶ea ijãawẽe ichiba mau kastikai.

Lucas 10:20

Maamina kĩrajʉʉrã́sturu machiba jai kachirua duabʉiduud̶e ãchiba ũribadaud̶eeba, maumaarã kĩrajʉ́sturu Dachi Akõreba machi trʉ̃ b̶ʉ kub̶uu bajãad̶e uru b̶uud̶eeba.

Juan 14:6

Maud̶e Jesusba jarasii: —Mau o mʉʉbʉ. Mʉʉd̶eeba Dachi Akõre biawãra unu panuu maud̶e chokae b̶uai uru panuu. Mʉwãebʉrã ab̶a bid̶a mʉ Chachamaa poyaa neebai.

Juan 3:36

Chi ichi Warrd̶e ijãa b̶uu Dachi Akõre ome ewaricha chokae b̶uai, maamina chi ichi Warr ida b̶u b̶uu Dachi Akõre ome ewaricha chokae b̶uabai. Mau Dachi Akõreba kastikai.

Hechos 4:12

Maud̶eeba Jesucristod̶éburu ijãaduubʉrã, Dachi Akõreba dachi kastikaabai dachiba kachirua wauped̶aad̶a kakua. Ichi awara, Dachi Akõreba ab̶a bid̶a nau iujãad̶e b̶uubasii ẽbẽrarã karibamera.

Hebreos 12:25

Maud̶eeba kauwa duanásturu Dachi Akõreba jara b̶uu ida b̶urãad̶amera. Chi ichiba nau iujãad̶e Sinaí ead̶e jarad̶a ida b̶uped̶aad̶arã kastikad̶ebena poyaa jĩichoad̶aabasii. Maud̶eeba chi ichiba bajãad̶ebena dachi sõd̶e jara b̶uu ida b̶uuduubʉrã ¿jĩichoad̶aika? Jĩichoad̶aabai b̶uu.

Hebreos 2:3

Ara mau kĩra Dachi Akõreba karibai ʉ̃rʉbena bed̶ea dachiba ida b̶uuduubʉrã, ¿Dachi Akõreba kastikaid̶ebena dachirã saka karibad̶aima? Mau bed̶ea ãrea biꞌia b̶uu Dachi Mechiu Jesusba naed̶e jaradeasii. Chi ũriped̶aad̶aba dachimaa mau bed̶ea biawãra abachid̶au.

Apocalipsis 19:20

Chi mura ʉ̃rʉ akʉ b̶uuba ãnimara kachirua maud̶e chi Dachi Akõre baita berreabarii chi biawãrawãe jidausii. Mauba ãnimara kachirua trʉ̃d̶eeba ẽbẽrarãba ne poyaa waud̶akau mechiu waubachii. Mauba ãnimara kachirua seña ida waubiaped̶aad̶a joma setaa kũruabachii. Mau chi ara ichi kĩra juaba ne kaped̶aad̶a ãrea kʉ̃riaped̶aad̶a setaa kũruabachii. Chi mura ʉ̃rʉ akʉ b̶uuba mau ãnimara kachirua maud̶e chi Dachi Akõre baita berreabarii chi biawãrawãe chokae panuu chob̶ea mar kĩra ed̶a azufre aoko nub̶uud̶e jiratasii.

Apocalipsis 20:10

Mau maad̶akare Dachi Akõreba jʉbawãe nii ẽbẽrarã setaa kũrua uru b̶uad̶a chob̶ea mar kĩra azufre bara aoko nub̶uud̶e jiratai. Naed̶e Dachi Akõreba ãnimara kachirua b̶uu, Dachi Akõre baita berreabarii chi biawãrawãe sid̶a mau tʉbʉ aokod̶e jiratasii. Chi maarã maud̶e jʉbawãe nii sid̶a ewaricha ãyadaa maud̶e ẽsabud̶e ãrea biꞌiwãe panad̶ai.

Apocalipsis 20:12

Maud̶e mʉʉba unusii biuped̶aad̶arã chi mechiurã maud̶e chi kaebeurã Dachi Akõre rey ãkau daad̶e akʉ topanuu. Maud̶e chi b̶ee karta ewakuasii. Maabae june ab̶a karta ewasii. Mau kartad̶e ẽbẽrarã ewaricha chokae nuread̶ai trʉ̃ b̶ʉ kub̶uasii. Dachi Akõreba chi biuped̶aad̶arã joma ichiasii ãchiba wauped̶aad̶a kĩra, chi maarã kartad̶e b̶ʉ kub̶uad̶a kĩra.

Apocalipsis 20:14

Dachi Akõreba chi biud̶ai joma wãꞌãebisii ea chob̶ead̶e azufre bara aoko nub̶uud̶e jirataaruu kĩra. Biuped̶aad̶a panabadaumarebena sid̶a aria jiratasii. Mau ea chob̶ead̶e azufre bara aoko nub̶uu b̶es ome biui jara b̶uu.

Apocalipsis 3:5

Chi kachirua waud̶ai poyaaped̶aad̶arãba ara mau kĩra paru torroa jʉ̃d̶ai. Ãchi trʉ̃ chi ewaricha chokae duanabarii kartad̶e b̶ʉ kub̶uud̶eeba mʉʉba mau jareebai. Maumaarã mʉ Chacha daad̶e maud̶e chi angelerã daad̶e ãchi mʉʉd̶erã ai.