Apocalipsis 13:6 - Emberá Chamí

⁶ Maud̶e mauba Dachi Akõre ʉ̃rʉbena kachirua jarabachii, maud̶e ichi trʉ̃ ʉ̃rʉbena, chi ichi b̶uumaabena ʉ̃rʉbena, maud̶e joma bajãad̶e duanuu ʉ̃rʉbena sid̶a.

Apocalipsis 13:6 Iomraidhean Croise

Mateo 12:34

¡Ẽbẽrarã dama! ¿Machi chi kachiruarãba saka ne bia berread̶aima? Ẽbẽraba ichi sõd̶e kʉ̃risia b̶uu kĩra, maka berreabarii.

Mateo 15:19

Ẽbẽra sõd̶ebena nakʉ kʉ̃risia kachirua awara wãbarii: mia beayu; ab̶a miakãid̶a junebena ome kãi nub̶eeyu; waabenarã ome ne kachirua wauyu; chiruayu; setaa jarayu; ab̶au ʉ̃rʉbena miadaa berreayu; makʉ kʉ̃risia.

Juan 1:14

Chi Bed̶ea ẽbẽra kakuad̶e b̶uaped̶a dachi tãed̶e nibabachii. Ichi sõbiad̶eeba dachi ãrea aid̶asii. Ichiba dachimaa arakʉd̶e kuitaabiasii Dachi Akõre biawãra saka nii. Maud̶e daiba ichi joma mechiu nii unusid̶au, Dachi Akõre Warr maka niid̶eeba.

Romanos 3:13

Ãchiba kachirua berreabadau ẽbẽra biud̶a jau b̶ubadau ewa nub̶uu kĩra b̶uu. Ãchi iiba setaa jarabadau. Ãchiba jara panuud̶eeba waabenarã kachirua waubadau damaba kaaruu kĩra.

Colosenses 1:19

Dachi Akõreba kʉ̃riasii Cristo ara ichi kĩra b̶uai.

Colosenses 2:9

Cristo ẽbẽra kakuad̶e biawãra Dachi Akõrebʉ.

Hebreos 9:2

Mau ded̶e pieza ome b̶uasii. Chi nabena pieza «Dachi Akõre baita b̶uu pieza» abachid̶au. Mau piezad̶e ʉ̃d̶aa koabarii maud̶e mesa nub̶uasii. Maud̶e chi pan Dachi Akõre baita kub̶uasii.

Hebreos 9:24

Cristo Dachi Akõre de ẽbẽrarãba wauped̶aad̶ad̶e ed̶a wãabasii, mau ab̶aburu Dachi Akõre de chi biawãra b̶uu bajãad̶e kub̶uu kĩra b̶uasiid̶eeba. Cristo bajãad̶e Dachi Akõre daad̶e wãsii, ichi oa chesiid̶eeba dachi baita ichimaa chi chuburia id̶ii baita.

Apocalipsis 11:12

Maabae chi Dachi Akõre baita berreabadaurãba bajãad̶e mimi jĩkua ũrisid̶au. Naka jarasii: «Namaa ʉtaa urústuru». Ara makʉd̶e chi kĩramaabadaurãba ichiamaa panuud̶e, ʉtaa jʉ̃rʉara tãed̶e bajãad̶aa wãsid̶au.

Apocalipsis 12:12

¡Maud̶eeba joma chi bajãad̶e panuurã kĩrajʉ́sturu! Maamina chi nau iujãad̶e maud̶e mard̶e panuurã sid̶a miichuburi panad̶ai, jʉbawãe nii machimaa neesiid̶eeba. Mau miusia ãrea b̶uu, ãrea b̶uabai b̶uu kuitaa b̶uud̶eeba».

Apocalipsis 15:5

Mau maad̶akare mʉʉba ʉtaa bajãad̶aa ichiasiid̶e unusii Dachi Akõre de mechiud̶e ed̶a kẽsa paru jiranuu ewa jiranasii.

Apocalipsis 18:20

¡Joma bajãad̶e duanuu kĩrajʉ́sturu, jãu puuru ãrisiid̶eeba! Ẽbẽrarã Dachi Akõred̶erã, Jesusba bʉid̶arã maud̶e Dachi Akõre baita berreabadaurã kĩrajʉ́sturu. Dachi Akõreba jãu puuru kastikai machimaa miadaa wausiid̶eeba».

Apocalipsis 21:3

Maabae mʉʉba ũrisii ab̶a Dachi Akõre rey ãkau b̶uareeba naka jĩwa berrearuu: «¡Ũrísturu! Id̶i Dachi Akõre ẽbẽrarã tãed̶e b̶uu. Ichi ãchi baara b̶uai. Maud̶e ãchi ichi puurud̶ebenarã nuread̶ai. Ichi ãchi Akõre bai maud̶e biawãra ichi ãchi baara b̶uabarii.

Apocalipsis 4:1

Mau maad̶akare Dachi Akõreba mʉʉmaa unubisii poraa ab̶a bajãad̶e ewa nub̶uu. Ara maud̶e chi naed̶e mimi kachu chaaruu kĩra ũri b̶uad̶aba jarasii: «Nama ʉtʉ uruse. Mʉʉba unubii chi jãad̶akare makai b̶uu ewari».

Apocalipsis 4:4

Maud̶e 24 rey ãkau panuu chi rey ãkau ad̶u jũra panasii. Mau ʉ̃rʉ 24 chõrarã mechiu akʉ duanasii. Ãchi paru torroa b̶uasii. Maud̶e boro jũra nee waud̶a jʉ̃ panasii.

Apocalipsis 5:13

Maud̶e mʉʉba ũrisii chi joma Dachi Akõreba waukuad̶a chi bajãad̶e duanuu, chi nau iujãad̶e duanuu, chi biuped̶aad̶a maud̶e mard̶e duanuu bid̶a naka kari panasid̶au: «Jomaurãba chi rey ãkaud̶e akʉ b̶uumaa maud̶e chi oeja kaebeu niimaa ewaricha biꞌia berread̶ai panuu. Aude mechiu nii a jarad̶ai panuu, aude mipitaa nii a jarad̶ai panuu maud̶e bibuara b̶uu ichi juad̶e uru b̶uai a jarad̶ai panuu».

Apocalipsis 7:15

Maud̶eeba maarã Dachi Akõre rey ãkau jãkaa duanuu. Ichi ded̶e ãyadaa maud̶e ẽsabud̶e ichi baita ne wau panuu. Maud̶e chi ãkaud̶e akʉ b̶uu maarã baara b̶uai.

Apocalipsis 7:9

Mau maad̶akare Dachi Akõreba waya mʉʉmaa ẽbẽrarã ãrea unubisii. Ab̶au bid̶a maarã poyaa juasiibasii. Druachad̶ebena, puuruchad̶ebena ẽbẽrarã didiwaraacha jomad̶ebena maud̶e bed̶ea didiwaraacha jomad̶ebena chi nuree ab̶aab̶aa duanasii. Joma paru torroa jʉ̃ duanasii maud̶e kĩrajʉʉ duanasiid̶eeba ãchi juad̶e meme kiruu uru panasid̶au. Dachi Akõre rey ãkau daad̶e maud̶e chi Oeja Kaebe Nii daad̶e b̶ari topanasid̶au.