Apocalipsis 11:8 - Emberá Chamí

⁸ Chi biuped̶aad̶a chi Jerusalén puuru mechiud̶e jirata b̶ari panad̶ai. Mau puuru «Sodoma» maebʉrã «Egipto» abadau, aria ãchi Mechiu Jesús cruzd̶e jirab̶u beasid̶aud̶eeba.

Apocalipsis 11:8 Iomraidhean Croise

Mateo 10:15

Mʉʉba biawãra jaraaruu: Dachi Akõreba kastikai ewarid̶e Sodomd̶ebenarã maud̶e Gomorrad̶ebenarã audeara mau puuru aude kastikai.

Hechos 9:4

Mauba Saulo jeed̶a b̶aebisii. Maud̶e bed̶ea ũrisii. Mau bed̶eaba jarasii: —Saulo, Saulo, ¿sakãe mʉ kachirua waui baita wãraa b̶uma?

Hebreos 13:12

Ara mau kĩra Jesús puuru awara ãrea biꞌiwãe b̶uasii ichi oaba ẽbẽrarã Dachi Akõre baita biꞌia b̶ui baita.

Hebreos 6:6

ab̶auba Dachi Akõre warr Cristo ida b̶uuruubʉrã, waya ichimaa poyaa neebai. Makaa basirã, maarãba jomaurãmaa Cristo ʉ̃rʉbena kachirua berreabiad̶ai basii waya cruzd̶e nub̶uuduu kĩra.

2 Pedro 2:6

Maud̶e Dachi Akõreba Sodoma puuru maud̶e Gomorra puuru kastikasiid̶e joma baa bʉisii. Mau joma etab̶arr babisii. Mauba kuitaabiasii chi ichi kʉ̃riad̶akaurãmaa ãchi sãad̶ai.

Judas 1:7

Ara mau kĩra Dachi Akõreba Sodomad̶ebena, Gomorrad̶ebena maud̶e chi puururã ara kaitad̶ebena kastikasii. Maarãba mianejasia waubachid̶au. Dachi kakuaba barikiu kachirua waud̶aabai panuu, ãchiba waubachid̶au. Maud̶eeba Dachi Akõreba maarã ewaricha tʉbʉchia kiikaud̶e biꞌiwãe panabiai. Mauba dachimaa kuitaabia b̶uu Dachi Akõreba chi kachirua joma maka kastikabarii.

Apocalipsis 11:13

Maud̶e ioromia meserãa neesii. Mauba Jerusalén puurud̶e de ãrea korekuasii. 7.000 ẽbẽrarã biusid̶au. Ara maud̶e chi chokae panuuba perad̶eeba chi bajãad̶ebena Dachi Akõremaa biꞌia nii a jarasid̶au.

Apocalipsis 11:9

Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebenarãba mau biuped̶aad̶a aria jirata b̶ari b̶ee unud̶ai ewari õbea bad̶aped̶a maud̶e ãsad̶aa. Maarã biuped̶aad̶a ʉyaad̶ai ida kabid̶aabai.

Apocalipsis 14:20

Chi uva Jerusalén puuru awara biraduasid̶au. Biraduasid̶aud̶e mamabena oa ãrea chesii. Mau oa chi id̶ubena ʉtʉ mura okarrd̶e jʉ̃badaumaa ba b̶uasii.

Apocalipsis 14:8

Mau ángel kaad̶e neeped̶a naka jĩkua jarasii: «Babilonia puuru mechiu ãrisii. Biawãra joma ãrikuasii. Chi mau puurud̶ebenarãba ãrea mia kĩra nejasia wau panuud̶eeba drua aꞌawaraabenamaa ara mau kĩra kachirua waubiasid̶au uva b̶aa asia doobai panuud̶e dobiaduu kĩra».

Apocalipsis 16:19

Mau ioromiaba puuru mechiu ab̶a nau iujãad̶ebena kõaped̶a, maabae aꞌawaraa puuru õbea kĩra b̶usii. Maud̶e nau iujãad̶ebena puururã sid̶a joma ãrikuasii. Ara maud̶e Dachi Akõreba Babilonia puuru mechiu kastikai kʉde uru b̶uai ida b̶uubasii. Uva b̶aa asia dobiiruu kĩra ichi kĩru kub̶uud̶eeba mau puuru ãrea kastikasii.

Apocalipsis 17:1

Jua ab̶a ome angelerãd̶ebena sãu 7 uru b̶uad̶a ab̶a mʉ b̶uumaa neeped̶a mʉʉmaa naka jarasii: «Wãuríduru. Mʉʉba unubii Dachi Akõreba saka wẽra aud̶uabarii trʉ̃ poa b̶uu kastikaaruu. Mau wẽra bania ãrea tãed̶e akʉ b̶uu.

Apocalipsis 17:18

Chi bichiba unud̶a wẽra aud̶uabarii puuru mechiu jara b̶uu. Mau puurud̶ebena reyba drua jomad̶ebena reyrã ichi juad̶e ua b̶uu».

Apocalipsis 17:5

Ichi daub̶ʉʉrʉd̶e trʉ̃ ab̶a ẽbẽrarãba kauwa ũrid̶akau b̶ʉ inibasii. Naka b̶ʉ inibasii: «Mʉ Babilonia chi puuru mechiubʉ. Mʉ wẽrarã aud̶uabadaurã nawebʉ, maud̶e ne joma Dachi Akõreba nau iujãad̶e kʉ̃riakau nawebʉ».

Apocalipsis 18:10

Wapead̶ai Dachi Akõreba Babilonia puuru kastikad̶a kĩra maarã kastikakuai. Maud̶eeba kaitawẽeba ichia kopanuuba naka jarad̶ai: «¡Miichuburi, Miichuburi, Babilonia puuru mechiu ne joma waubadaud̶eeba! Dachi Akõreba mau puuru kãꞌãabariwãed̶e kastikai».

Apocalipsis 18:18

Mau puuru baa nub̶uu nari unuuduud̶e jĩwa naka jarad̶ai: «¿Sãu puuru jãu puuru kĩra b̶uasma?»

Apocalipsis 18:2

Naka jĩwa jarasii: «¡Babilonia puuru mechiu ãrisii! ¡Biawãra joma ãrikuasii! Ẽbẽrarã duanad̶amare, bari jãma chi jai kachirua nuréturu duanuu. Jãma joma jairã kachirúaturu duanuu. Joma chi Dachi Akõremaarã ibanarã miadáturu jãma duanuu.

Apocalipsis 18:21

Maabae ángel mechiuba mo mechiu kũruma kĩra b̶uu mard̶e jiratasii. Makamaa b̶uud̶e naka jarasii: «Maka mʉʉba mau mo mard̶e jiratad̶a kĩra Babilonia puuru mechiu kãꞌãabariwãed̶e joma ãrii. Mau puuru waa unud̶aabai.

Apocalipsis 18:24

Dachi Akõre baita berreabadaurã beaped̶aad̶a, ẽbẽrarã Dachi Akõred̶erã beaped̶aad̶a, maud̶e joma nau iujãad̶e nuread̶a beaped̶aad̶a kakua mau puurud̶ebena nebʉrad̶e duanuu».