Apocalipsis 1:11 - Emberá Chamí

¹¹ Mauba jarasii: «Bichiba unuuruu kartad̶e b̶ʉped̶a ãbarã 7 puuru b̶eed̶e duanuurãmaa urubʉise: Efesod̶aa, Esmirnad̶aa, Pergamod̶aa, Tiatirad̶aa, Sardisd̶aa, Filadelfiad̶aa maud̶e Laodicead̶aa».

Apocalipsis 1:11 Iomraidhean Croise

Hechos 16:14

Mau wẽrarãd̶ebena ab̶a Lidia abachid̶au. Mau Tiatira puurud̶ebena basii. Paru pupuchia b̶ee nedobʉibachii. Mau judiowãe wẽraba Dachi Akõre wapeadee b̶uasii. Dachi Mechiuba ichi sõ wausiid̶eeba Pabloba berrea b̶uu Lidiaba kauwa ũriped̶a ijãasii.

Hechos 18:24

Maumisa judio Apolos abadau Éfeso puurud̶e neesii. Mau Apolos Alejandría puurud̶ebena basii. Mau biꞌia berreabachii maud̶e Dachi Akõre karta ãrea kuitaa nibasii.

Hechos 20:17

Mileto puurud̶e b̶uud̶e Pabloba Efesod̶ebena ijãabadaurã nubadaurã iubiasii.

1 Corintios 15:32

Éfeso puurud̶e Dachi Akõre bed̶ea jaradeai baita mʉ ãrea biꞌiwãe b̶uasii ãnimara kachirua nuree ome chĩo b̶uu kĩra. Biuped̶aad̶a chokae jiradud̶aabaibʉrã, ¿mʉ ãrea biꞌiwãe b̶uasiid̶eeba kãare biꞌia adausma? Biawãra dachi chokae jiradud̶aabaibʉrã, biꞌia b̶uu waud̶ai waabenarãba jarabadau kĩra: «Biꞌia kod̶ai, itua dod̶ai nu biud̶aid̶eeba».

1 Corintios 16:8

Nama Éfeso puurud̶e b̶uai ab̶a Pentecostés bari panabadau ewari wãꞌãeruud̶aa.

Efesios 1:1

Mʉ Pablobʉ. Dachi Akõreba kʉ̃riasiid̶eeba mʉ Jesucristoba bʉid̶abʉ. Mʉʉba nau karta b̶ʉmaa b̶uu joma Dachi Akõred̶erã ẽbẽrarã Jesucristod̶e ijãa nuree Éfeso puurud̶ebenarã baita.

Colosenses 2:1

Mʉʉba kʉ̃ria b̶uu machiba nau kuitaad̶ai: mʉ dauchia jãadua ãrea traja b̶uu machi Colosad̶ebenarã, ãbarã Laodicea puurud̶ebenarã maud̶e joma ãbarã mʉ unud̶akau aid̶ai baita.

1 Timoteo 1:3

Mʉʉba bichimaa chi chuburia id̶id̶a kĩra Macedonia druad̶aa wãsiid̶e, maucha jaraaruu: Efesod̶e b̶eese, chi ãyaa jaradeabadaurã waa setaa ida jaradeabiarãad̶amera.

Apocalipsis 1:17

Ichi unusiid̶e ichi jʉ̃rʉ kaita peraba jeed̶a b̶ari b̶eesii. Maamina ichi jua bia mʉ ʉ̃rʉ kub̶uped̶a jarasii: «Perarã́se. Mʉ chi nabenabʉ maud̶e kaad̶ebenabʉ.

Apocalipsis 1:19

Bichiba unu b̶uu karta ab̶ad̶e b̶ʉse. Id̶ibae makamaa b̶uu ʉ̃rʉbena maud̶e chi kaad̶ebena ewarid̶e makai ʉ̃rʉbena b̶ʉse.

Apocalipsis 1:2

Joma mʉʉba unud̶a biawãra jara b̶uu. Mʉʉba jara b̶uu nau bed̶ea Dachi Akõred̶ebena nee b̶uu maud̶e Jesucristoba biawãra unubisii.

Apocalipsis 1:20

Mʉʉba unubiiruu chi 7 pusterrearã bichiba mʉ jua biare uru b̶uu unud̶a kãare jara b̶uu maud̶e kãare jara b̶uu lámpararã nee waud̶a. Mau 7 lámpararã jara b̶uu chi angelerã. Mau 7 panuuba ãbarã 7 puurud̶e duanuu nubadaurãbʉ. Ãchi ab̶aab̶aa chi ãbarã puurucha nubadau. Chi 7 lámpararã jara b̶uu chi 7 puurud̶ebena ãbarã.

Apocalipsis 1:4

Mʉ Juanbʉ. Nau karta b̶ʉmaa b̶uu ãbarã Asia druad̶e 7 puurud̶ebenarã baita. Mʉʉba kʉ̃ria b̶uu Dachi Akõreba ichi sõbiad̶eeba machi aid̶a b̶uai maud̶e jirukaraayuwãe b̶uabiai. Mau chi nibad̶abʉ, chi niibʉ maud̶e chi neei baita b̶uubʉ. Maud̶e mʉʉba kʉ̃ria b̶uu Dachi Akõre rey ãkau bia b̶uu daad̶e 7 jauri panuuba maka wau panad̶ai.

Apocalipsis 1:8

Dachi Mechiuba jarasii: «Mʉ chi Joma Poyaabarii Dachi Akõrebʉ, chi Alfabʉ maud̶e chi Omegabʉ. Mau jara b̶uu mʉ chi nabenabʉ maud̶e chi kaad̶ebenabʉ. Mʉ chi nibad̶abʉ, chi niibʉ maud̶e chi neei baita b̶uubʉ».

Apocalipsis 10:4

Bã 7 b̶es tosiid̶e mau bã tooruuba jarad̶a mʉʉba kartad̶e b̶ʉʉruu basii. Maamina bajãad̶e mʉʉba mimi ũrisii naka jaraaruu: «Bã 7 b̶es tosiiba jarad̶a chũpea uru b̶uase. Kartad̶e b̶ʉrã́se».

Apocalipsis 14:13

Mau maad̶akare mʉʉba bajãad̶e ab̶aba jaraaruu ũrisii: «Chi kartad̶e naka b̶ʉse: “Id̶iid̶eeba chi Dachi Mechiud̶e ijãa biubadaurã biꞌia panad̶ai”». Maud̶e Dachi Akõreba naka jarasii: «Biawãra biꞌia panad̶ai. Maarã biꞌiwãe panad̶ad̶ebena kʉrrjĩru panad̶ai, maarãba biꞌia wauped̶aad̶a waa chau kãriid̶eeba».

Apocalipsis 19:9

Maud̶e angelba mʉʉmaa jarasii: «Kartad̶e naka b̶ʉse: “¡Biꞌia ãrea duanad̶ai chi Oeja Kaebe Nii miakãiped̶aad̶a chiko kooduumaa iuped̶aad̶arã!”» Maud̶e jarasii: «Mau biawãra bed̶ea Dachi Akõreba jarad̶abʉ».

Apocalipsis 2:1

»Chi Éfeso puurud̶ebena ijãabadaurã nubarii ángel baita kartad̶e naka b̶ʉse: »Chi jua biare 7 pusterrea uru b̶uuba maud̶e 7 lámpara nee waud̶a tãed̶e niiba naka jara b̶uu:

Apocalipsis 2:12

»Chi Pérgamo puurud̶ebena ijãabadaurã nubarii ángel baita kartad̶e naka b̶ʉse: »Chi espada kid̶a muriacha peed̶ea era b̶uu iniiba naka jara b̶uu:

Apocalipsis 2:18

»Chi Tiatira puurud̶ebena ijãabadaurã nubarii ángel baita kartad̶e naka b̶ʉse: »Dachi Akõre Warr dau tʉbʉ aokooruu kĩra b̶uu, maud̶e jʉ̃rʉ bronce tʉbʉd̶e kub̶ud̶akare urua kub̶uu kĩra b̶uu. Ichiba naka jara b̶uu:

Apocalipsis 2:24

Maamina chi nuree machid̶ebena Tiatirad̶ebenarãba jãu wẽraba jaradea b̶uu ũrid̶awẽa panuu. Mau awara machiba chi “Satanasba mera ua b̶uu” abadau jʉrʉd̶awẽa panuu kuitaad̶ai baita. Mʉʉba june maucha waubiawẽe,

Apocalipsis 2:8

»Chi Esmirna puurud̶ebena ijãabadaurã nubarii ángel baita kartad̶e naka b̶ʉse: »Chi Nabena maud̶e Kaad̶ebena, chi biud̶a bad̶a waya chokae niiba naka jara b̶uu:

Apocalipsis 21:5

Maabae chi rey ãkaud̶e akʉ b̶uuba naka jarasii: «Mʉʉba joma chiwid̶i waumaa b̶uu». Maud̶e naka jarasii: «Chi mʉʉba jara b̶uu karta ab̶ad̶e b̶ʉse chi biawãra bed̶ead̶eeba, maud̶e biawãra makaaruu poyaa ijãaduud̶eeba».

Apocalipsis 22:10

Maud̶e jarasii: «Chi Dachi Akõre baita berreabarii bed̶ea mirubia makarã́se kãꞌãabariwãed̶e joma makaid̶eeba.

Apocalipsis 22:16

»Mʉ Jesusbʉ. Mʉʉba ángel ab̶a bajãad̶ebena bʉisii joma ãbarã nau iujãad̶e nureecha mau jarakuamera. Mʉ Davidd̶ebena need̶abʉ, ichid̶ebena need̶a kĩra b̶uu. Mʉ Daped̶ebena pusterrea ãrea koabarii abadau».

Apocalipsis 3:1

»Chi Sardis puurud̶ebena ijãabadaurã nubarii ángel baita kartad̶e naka b̶ʉse: »Chi Dachi Akõre daad̶e 7 jauri uru b̶uuba maud̶e 7 pusterrea uru b̶uuba naka jara b̶uu: »Machiba wau panuu mʉʉba kuitaa b̶uu. Ẽbẽrarãba jara panuu machiba Dachi Akõre ãrea ijãa panuud̶eeba chokae nuree. Maamina biawãra ara machiba Dachi Akõred̶e ijãad̶awẽa panuud̶eeba chi biud̶arãbʉ.

Apocalipsis 3:14

»Chi Laodicea puurud̶ebena ijãabadaurã nubarii ángel baita kartad̶e naka b̶ʉse: »Biawãra Bed̶ea trʉ̃ jarabadauba Dachi Akõred̶ebena biawãra joma arakʉd̶e jarabarii. Ichid̶eeba Dachi Akõreba ne joma wausii. Ichiba naka jara b̶uu:

Apocalipsis 3:4

Maamina machi Sardisd̶ebena b̶aꞌãra barau chi kachiruad̶e panabadauwãe, machi paru jayoaswãe panuu kĩra. Machi mʉ baara ãbua nibad̶ai baita biꞌia panuud̶eeba, paru torroa jʉ̃ʉduud̶e mʉ baara nibad̶ai.

Apocalipsis 3:7

»Chi Filadelfia puurud̶ebena ijãabadaurã nubarii ángel baita kartad̶e naka b̶ʉse: »Mau chi Ara Dachi Akõre Báitaburu Nii, Chi Biawãra Bed̶ea Ab̶a B̶uu, chi David puuru mechiu niibʉ. Chi ichiba ewabarii ab̶au bid̶a poyaa jʉ̃abai. Ichiba jʉ̃aruu ab̶au bid̶a poyaa ewaabai.