1 Juan 3:19 - Emberá Chamí

^19-20 Maud̶eeba kuitaa panuu dachi biawãra Dachi Akõred̶e. Maud̶e ara dachi sõd̶e kachirua wau panuu a kʉ̃risiaduubʉrã, Dachi Akõre daad̶e poyaa jirukaraayuwãe panad̶ai. Dachi Akõreba dachi ʉ̃rʉbena biꞌia kuitaa b̶uu chi dachi sõd̶e kʉ̃risia panuu audeara. Ichiba joma kuitaa b̶uu.

1 Juan 3:19 Iomraidhean Croise

Juan 13:35

Maka chiya kʉ̃ria duanuubʉrã, jomaurãba kuitaad̶ai machi mʉ baara nibabadau».

Juan 18:37

Maud̶eeba Pilatoba jarasii: —¿Maka b̶uubʉrã biawãra bichi ẽbẽrarã reyka? Jesusba panausii: —Maerã, bichiba maka jara kʉ̃ria b̶uubʉrã, mʉ ẽbẽrarã reybʉ. Maamina mʉ nau iujãad̶aa neesii biawãra bed̶ea jaradeai baita. Joma chi biawãrad̶e nureeba mʉ bed̶ea ijãabadau.

Romanos 4:21

Kuitaa b̶uasii Dachi Akõreba waui jarad̶a biawãra joma poyaa waui.

Romanos 8:38

Maud̶eeba mʉʉba kuitaa b̶uu dachi biuduubʉrã maebʉrã chokae panuubʉrã, Dachi Akõreba dachi kʉ̃riad̶ebena awara panad̶aabai. Nau ewarid̶e maud̶e kaad̶ebena ewarid̶e awara panad̶aabai. Maud̶e angelerãba, jai kachiruarãba, chi jai kachirua mechiurãba, chi ʉtʉbenarãba, chi ekarebenarãba, maebʉrã ab̶a bid̶a Dachi Akõreba waud̶ad̶ebena bid̶a dachi ichiba kʉ̃riad̶ebena poyaa ãyaa duanud̶aabai. Ara mau kʉ̃ria, Dachi Mechiu Jesucristod̶eeba unubiasii.

2 Timoteo 1:12

Mau baita mʉ maka biꞌiwãe b̶uu. Maamina kĩrakayayuwãe b̶uu. Mʉʉba kuitaa b̶uu kaid̶e ijãa b̶uu. Maud̶e kuitaa b̶uu mʉʉba ichi juad̶e b̶ud̶a, ichiba poyaa nui b̶uu ab̶a ichiba kastikai ewarid̶aa.

Hebreos 10:22

Cristoba dachi kʉ̃risia kachirua panad̶a jipa b̶usii dachi sõ ichi oaba jĩtod̶okaaruu kĩra. Dachi Akõre daad̶e biꞌia duanuu dachi kakua bania pawãraaba jeraad̶a kĩra. Maud̶eeba kʉ̃risia ab̶ad̶eeba maud̶e biawãra ijãa panuud̶eeba wãd̶ai panuu.

Hebreos 11:13

Joma maarã ẽbẽrarã Dachi Akõred̶e ijãa badaped̶aad̶a biusid̶au. Maamina Dachi Akõreba deai jarad̶a ãchiba nau iujãad̶e adaud̶aabasii. Maamina kuitaasid̶au kaad̶ebena ewarid̶e ichiba joma deai. Maud̶eeba kĩrajʉʉsid̶au maud̶e arakʉd̶e jarasid̶au nau iujãad̶e ãchi ãyarebena druad̶ebena kĩra duanuu maud̶e ãibena druacha duanuu.

1 Juan 1:8

Dachi kachiruaswãe panuu a panuubʉrã, ara dachi du ab̶a setaa jara panuu maud̶e biawãra bed̶ea adua panuu.

1 Juan 2:21

Mʉʉba nau karta b̶ʉwẽa b̶uu machiba chi biawãra bed̶ea adua panuud̶eeba maumaarã b̶ʉ b̶uu kuitaa panuud̶eeba. Maud̶e kuitaa panuu chi seta biawãrad̶ebenawãe.

1 Juan 3:14

Dachiba ãbarã kʉ̃ria panuud̶eeba kuitaa panuu dachi biu panad̶a chokae paneesid̶au. Chi ichi ãba kʉ̃riawẽa b̶uu wabid̶a biu nub̶uu.

1 Juan 3:21

Ãbarã, dachi nebʉraswãe panuu a kʉ̃risia panuubʉrã, wapeawẽa Dachi Akõremaa poyaa ʉtaa id̶id̶ai.