1 Corintios 6:9 - Emberá Chamí

^9-10 ¿Machiba adua panuka chi kachirua waubadau Dachi Akõre juad̶e panad̶aabai, ichid̶irã baara? ¡Ara machi du ab̶a setaa kũruarã́sturu! Chi kakuaba barikiu kachirua waubadaurã, Dachi Akõre kuenda juaba ne kaped̶aad̶a kĩraare ʉtaa id̶i nuree, junebena ome kãi topaneebadaurã, mukĩra wẽra kĩra nuree, mukĩra ab̶aarakau mukĩra ome panabadaurã, nechiruabadaurã, chi nejarra kʉ̃riabadaurã, itua biu nibabadaurã, setad̶eeba waabena ʉ̃rʉbena kachirua jarabadaurã maud̶e waabena setaa kũruabadaurã Dachi Akõre puurud̶e panad̶aabai.

1 Corintios 6:9 Iomraidhean Croise

Mateo 19:29

Mʉ kakua ab̶auba ichi de, ãbarã, neekaurã, akõre, nawe, kima, warrarã maud̶e chi drua b̶ʉiruubʉrã, ichiba b̶ʉid̶a audeara 100 adaui maud̶e Dachi Akõre ome ewaricha chokae b̶uai.

Mateo 25:34

Maabae mʉ, chi Reyba jua biare panuurãmaa naka jaraaruu: “Machi, mʉ Chachaba biꞌia duanud̶a, nésturu. Ichi puurud̶e biꞌia panásturu. Nau iujãa wausiid̶eed̶ebena mau puuru machi baita waud̶a b̶uu.

Lucas 21:8

Jesusba panausii: —Kauwa nureásturu ab̶au bid̶a setaa kũruarãad̶amera. Ãreaba jarad̶ai: “Mʉ Dachi Akõreba Dachi Karibabarii deai jarad̶a”. Mau awara chi ewari araa bamaa b̶uu ad̶ai. Maamina maarã baara wãrã́sturu.

Hechos 20:32

»Jãabae ãbarã, mʉʉba machi Dachi Akõre juad̶e b̶uuruu. Ichi sõbiad̶eeba dachi kariba b̶uu ʉ̃rʉbena bed̶ea kĩrabásturu. Mau bed̶ead̶eeba machi poyaa aude biꞌia ijãad̶ai. Ichiba deai jarad̶a ichi sõbiad̶eeba machiba adaud̶ai maud̶e joma chi ichi baita biꞌia b̶ud̶arãba mau adaud̶ai.

Hechos 24:25

Maka b̶uud̶e Pabloba dachi jipa nibai ʉ̃rʉbena, kakua jipa uru b̶uai ʉ̃rʉbena maud̶e Dachi Akõreba nebʉra kastikai ewari neei ʉ̃rʉbena berreasii. Felixba mau ʉ̃rʉbena ũrisiid̶e wapeaped̶a naka jarasii: «Jãabae wãse. Mʉ bari b̶uud̶e waya bichi iui».

Romanos 1:18

Dachi Akõreba bajãad̶ebena kuitaabi b̶uu kachirua wau nuree maud̶e jipawãe nuree ichi kĩrubid̶eeba mau joma kastikai. Ãchiba kachirua wau panuud̶eeba chi biawãra bed̶ea ida kuitaabid̶akau.

1 Corintios 15:33

Ida setaa kũruabirã́sturu. Machi kachirua waubadaurã ome ãbua nibaaduubʉrã, maarãba machi biꞌia nibabadau kachirua babid̶ai.

1 Corintios 15:50

Ãbarã, mʉʉba nau jaraaruu: chi kakua nau iujãad̶ebena Dachi Akõre juad̶e poyaa b̶uabai ichid̶irã baara. Chi kakua b̶eraabarii chi b̶eraakau kakuamaa poyaa b̶uabai.

1 Corintios 3:16

¿Adua panuka Dachi Akõre Jauri machi sõd̶e b̶uu? ¿Adua panuka machi Dachi Akõre de?

1 Corintios 5:1

Ẽbẽrarãba jara panuu machi tãed̶e ab̶a kĩra nejasia waubarii. Jara panuu mauba chi akõre wẽra ichi wẽra kĩra uru b̶uu. Biawãra Jesucristod̶e ijãad̶akaurã bid̶a mau kachirua waud̶akau.

1 Corintios 5:10

Maamina mauba jarawẽa b̶uu chi nau iujãad̶ebena barikiu kachirua waubadaurã ome, chi nejarra kʉ̃riabadaurã ome, nechiruabadaurã ome maud̶e Dachi Akõre kuenda juaba ne kaped̶aad̶amaa ʉtaa id̶ibadaurã ome panad̶aabai panuu. Maarã ome panad̶ai kʉ̃riad̶awẽebʉrã, nau iujãad̶ebena wãd̶ai panuu.

1 Corintios 5:11

Maumaarã mʉʉba machi baita b̶ʉsii barikiuba ara ichi ãba aaruubʉrã, maamina barikiu kachirua wau niibʉrã, chi nejarra kʉ̃ria niibʉrã, Dachi Akõre kuenda juaba ne kaped̶aad̶amaa ʉtaa id̶i niibʉrã, setad̶eeba waabena kachirua jara niibʉrã, itua biu niibʉrã, maebʉrã chirua niibʉrã, mau ẽbẽra ome ãbua panad̶aabai panuu maud̶e ãbua kod̶aabai panuu.

1 Corintios 6:18

Dachi kakuaba barikia kachirua b̶aꞌãra bid̶a waurã́sturu. Kachirua june ãyaa wauruubʉrã, mauba dachi kakua biꞌiwãe b̶eebikau. Maamina kakuad̶eeba kachirua wauruubʉrã, dachi kakua kachirua b̶eei.

1 Corintios 6:19

¿Machiba adua panuka machi kakua Dachi Akõre Jauri de kĩra nii? Dachi Akõreba ichi Jauri machimaa deasii. Ichi machi sõd̶e b̶uu. Machi ara machid̶iwãema maumaarã Dachi Akõred̶ebʉ.

1 Corintios 9:24

Machiba kuitaa panuu ẽbẽrarã pirabadau kai chi aude isa pira nii kuitaad̶ai baita. Maud̶e kabanaa pirabadamina ab̶a chi naa need̶aburu ne adaubarii. Machi sid̶a isa piraaduu kĩra joma biꞌia wáusturu Dachi Akõreba deai jarad̶a adaud̶ai baita.

2 Corintios 12:21

Mʉʉba wapea b̶uu machimaa waya neeruud̶e Dachi Akõreba mʉ kaebeu kĩra b̶ui, machi kakua. Maud̶e ãrea machiba naed̶e kachirua wau panad̶a wabid̶a wau panuud̶eeba mʉ jẽai. Machiba chi Dachi Akõremaarã biꞌiwãe waubadau, dachi kakuaba barikia kachirua waubadau maud̶e waabenarã daad̶e kĩra nejasia waubadau wabid̶a mau ida b̶ud̶awẽa panuud̶eeba jẽai.

Gálatas 6:7

Ara machi du ab̶a setaa kũruarã́sturu. Ab̶au bid̶a Dachi Akõre poyaa setaa kũruabai. Kĩrabásturu: chi ne uu b̶uuba ichiba uud̶a kĩra junai.

Colosenses 3:5

Maud̶eeba joma nau iujãad̶ebena kʉ̃risia machi sõd̶e b̶uu ida b̶ústuru. Dachi kakuaba barikiu kachirua waurã́sturu, mia kĩra nejasia waurã́sturu, ne mia pera waurã́sturu, kʉ̃risia kachirua kʉ̃risiarã́sturu, maud̶e ne kaebea ãrea uru panad̶ai kʉ̃ria panarã́sturu. Chi ne kaebea ãrea kʉ̃ria b̶uu, Dachi Akõre kuenda juaba ne kaped̶aad̶ad̶e ijãa b̶uu kĩra nii.

Hebreos 12:14

Jomaurã ome jirukaraayuwãe nureásturu. Maud̶e Dachi Mechiu baita biꞌia panásturu. Dachi Mechiu baita biꞌia nureewãed̶eeba ichi poyaa unud̶aabai.

Hebreos 12:16

Kauwa panásturu machi tãed̶e ab̶a bid̶a chi dachi kakuad̶eeba barikiu kachirua waurãad̶amera maud̶e chi Esaú kĩra Dachi Akõre ʉ̃rʉbena biꞌiwãe kʉ̃risiarãad̶amera. Esaú chi warr imina basiid̶eeba chi akõreba uru b̶uud̶ebena ãrea adaui b̶uasii. Maamina ichi ãbaba chiko b̶es ab̶a kobid̶a kakua, ichiba adooi b̶uad̶a joma ichi ãbamaa deasii.

Hebreos 13:4

Jomaurãba ãchi kima wapeadee nuread̶ai panuu. Dachi Akõreba chi aud̶uabadau maud̶e junebena wẽra ome kãi b̶eebadau kastikaid̶eeba ab̶a machi kima ómeburu kãi b̶eed̶ai panuu.

Santiago 1:16

Ãbarã mʉa kʉ̃riakuabarii, ara machi du ab̶a nau ʉ̃rʉbena setaa kũruarã́sturu:

1 Juan 3:7

Mʉ warrarã, ab̶aumaa ida setaa kũruabiarã́sturu. Chi jipa wau b̶uu Dachi Akõre daad̶e jipa nii, Cristo jipa nii kĩra.

Apocalipsis 21:8

Maamina chi mʉ baara wãd̶ai sõ borekea nuree, chi Dachi Akõred̶e ijãad̶akaurã, chi Dachi Akõreba kʉ̃riakau waubadaurã, chi mia beabadaurã, chi dachi kakuaba barikiu kachirua waubadaurã, jaibanarã, chi Dachi Akõre kuenda juaba ne kaped̶aad̶ad̶e ijãabadaurã, maud̶e chi seta id̶aa nuree chob̶ea mar kĩra azufre baara aoko nub̶uud̶e ãrea biꞌiwãe duanad̶ai. Mau chi b̶es ome biui jara b̶uu».

Apocalipsis 22:15

Maamina chi kachirua waubadaurã, jaibanarã, chi dachi kakuaba barikiu kachirua waubadaurã, chi junebena ome kãi paneebadaurã, mia beabadaurã, Dachi Akõre kuenda juaba ne kaped̶aad̶a kʉ̃riabadaurã maud̶e chi setarã joma awara duaneed̶ai.