Zefania 3:5 - Mukanda Wa Zambi 1970

⁵ Alioze Mwene Zambi kali mu limbo ndoo ni musono, kakulinga chize chinalite, keshi kulinga chibi nichimwe. Tangwa ha tangwa chichamene kakubatwila atu jenyi ni ululi. Chibwe chocho yitanganyanyi waze alimo kaakulinga yibi, keeshi kwivwa sonyi.

MUKANDA USANDU WA ZAMBI 1975

⁵ Yehova muchima lienyi mukwa ululi, kalingile nichimwe chipi. Tangwa ha tangwa chimene upatwilo wenyi wa kulita unasoloka; ha kucha cha tangwa keshi kuhona, alioze akwa uhenge keshi sonyi.

Zefania 3:5 Iomraidhean Croise

Ubutukilo 18:25

Kuwahashile kwonona akwa ululi hamwe ni yitanganyanyi. Kuwahashile kuchilinga nichimwe! Nyi wachilinga, kafwa ngwe, washiha akwa ululi hamwe ni yitanguke. Kuchahashile kubwa. Yena ngaji wa akwa hashi eswe, chakutamba kubatula ni ululi.”

Jobe 34:10

Yenu akwa yinyingi, ngwivwenu. Zambi Mukwa Ndundo Jeswe kahashile kulinga yibi, kahashile kulinga chize chahenga.

Jobe 7:18

Wakumunangisa chichamene cheswe, ni kumweseka tangwa ha tangwa.

Jobe 8:3

Kuma Zambi kakubatula ni uhenge, nyi? Kuma Mukwa Ndundo Jeswe kakubinjisa ululi, nyi?

Miaso (Masamu) 145:17

Mwene Zambi kali mubema ni mukwa keke mu yuma yeswe yize akulinga.

Miaso (Masamu) 37:6

Makupwisa lume mukwa ululi, hanga ululi we usoloke ngwe pangu ha muchima tangwa.

Miaso (Masamu) 92:15

Yino yeswe yakulweza ngwo, Mwene Zambi kali mukwa ululi, kali liwe liami, muli iye kumushi uhenge.

Izaya 12:6

Atu eswe mu Zione imbenu, wahililenu! Zambi Munangi wa Aisraele kali munene, katwama mukachi ka atu jenyi.”

Izaya 28:19

Mulikanuzemukina nawa ni nawa, ha chichamene ni chichamene. Mulikanubwila ha mwalwa ni ufuku. Sango jeswe jaha ja Zambi mujikanuvwisa mwongo!

Izaya 33:2

Mwene Zambi, tuvwile kama keke. Tunase mbunge kuli yena, utufunge kama tangwa ha tangwa, ni kutulamwina ha matangwa ja lamba.

Izaya 45:21

Tweyenu nwambulule milonga yenu ku chota cha kusopela; akwa milonga alihule ene ni ene. Iya waliangile kwambulula shimbu kanda yiwape yize muyikabwa ko? Hi yami Mwene Zambi ko, chilamwina cha atu jami, nyi? Kukushi Zambi mukwo.

Izaya 50:4

Mwene Zambi yangulongesa chize chatamba kwamba, hanga nguhase kutakamisa akwa mulekeleke. Chichamene cheswe kakungulawisa, Hanga ngubanjike kanawa yize anangulongesa.

Jeremia 3:3

Kashika vula musazu kanokene ko, ni vula wa mubatuko neye kanokene ko. Chi bwe ku meso je wamonekene ngwe chitanji, kuushi kwivwa sonyi.

Jeremia 6:15

Kevwile ko kama sonyi mumu ha yizelwokeso yize akulinga, nyi? Ka, kaajivwile ko nihakepe, nimwene te keeshi kuhasa kwivwa sonyi. Kashika muze mungukaamwesa lamba, maakalimbwoka ngwe chize amwe akwo haanalimbwoka. Lienalio mulikabwa songo lio. Yami Mwene Zambi nachamba.”

Jeremia 8:12

Ayenu atu jami, kunushi kwivwa kama sonyi mumu ha yizelwokeso yize nwakulinga, nyi? Kunwajivwile ko nihakepe, nimwene kunwahashile kwivwa sonyi! Kashika munukalimbwoka ngwe amwe akwo haanalimbwoka; lienalio mulikabwa songo lienu. Yami Mwene Zambi, nachamba.

Lungungu 3:23

tangwa ha tangwa yakubwa yaha, kuyakubwa ni shindakenyo ngwe kuvumbuka cha tangwa.

Ezekiel 18:25

“Alioze yenu nwakwamba ngwenu; ‘Yize akulinga Mwene Zambi yili yibi.’ Ngubanjikenu, yenu Aisraele. Nunanyongo ngwenu, ndako yami yili yibi, nyi? Ndako yibi yili ya yenu.

Ezekiel 48:35

Usuhwe wa chipanga wa mbango jeswe jiwana ja limbo te metro 9,000. Chize musono jina lia lie limbo mulibwa “Mwene Zambi Muno Mwali!”

Hosea 14:9

Waze ali ni mana evwe kanawa yuma yize yinasonewa mu mukanda uno, ayifunge mu mbunge. Majila a Mwene Zambi kaali a ululi, akwa ululi kaakwenda mo. Alioze yivulumunyi kaakutalinga, kaakulimbuka, mumu keeshi kwaalula ngwe Chuma.

Hosea 6:5

Kashika hingunanutumina akwa munanyi ni maliji jami a ubatwilo ni a kwonona. Chize ngunazange Chinasoloka mwazu ngwe pangu.

Mika 3:11

Miata ja limbo kaakuyula mumu ha mbongo ja mbenga, mahako kaakulongesa Shimbi ja Zambi hanga aafwete, akwa munanyi kaakulumbununa Usolwelo wo mumu ha ubite. Hindu ayo eswe kaakwamba ngwo: “Mwene Zambi kali hamwe ni yetu. Chibi nichimwe kuchichi kutuwana.”

Mika 7:9

Hitunavulumuna Mwene Zambi, kashika chatutamba kulihumikiza ni utenu wenyi. Alioze hakusula, makatuhakwila ni kutusambisa. Makatuhetesa mu Pangu; mutumona ubatwilo wenyi wa ululi.

Habakuke 1:3

Mumu yika unangumwesa lamba libwahaha? Ngwe kuchi muuhasa kulihumikiza ni uhenge ubwahaha? Kwenyeka ni kwonona yinangujingilika, kutachika ni kuzwela yiliko sali ni sali.

Zefania 2:1

Yenu vungu lize kunushi sonyi, kungulukenu, nyongenu

Zefania 3:13

Aisraele waze maasala ni mwono keechi kulinga chibi kuli mutu niumwe, keechi kuhanjika mahuza, hanji kweseka kwonga. Kumaayuka, kumaatwama mu uhwimino, keechi kuvwila niumwe woma.”

Zefania 3:15

Mwene Zambi hasa songo ku lamba lienu; Akwa kole jenu eswe haachiza. Mwene Zambi, mwanangana wa Aisraele, kali hamwe ni yenu; Haliabwila kukushi nawa nichimwe chize munuvwila woma.

Zefania 3:17

Mwene Zambi, Zambi yenu, kali hamwe ni yenu; ndundo jenyi jinanukwase kukumba. Mwene Zambi mawahilila ni yenu, mu zango lienyi manwaha mwono Waha. Kumaanwimbila ni kuwahilila,

Zakaria 2:5

Mwene Zambi halakenya ngwenyi, iye mwene makabwa chipanga cha kahia chize chinajingilika limbo ni kulifunga, iye mwene matwama mo mu uhenya wenyi weswe.’ ”

Zakaria 9:9

Yenu akwa Zione, wahililenu, wahililenu! Yenu akwa Yerusaleme kololokenu ni uwahililo! Talenu, mwanangana wenu kaneza kuli yenu! Mukwa kukumba wakangana, hindu mukwa kulikehesa, kanendela hali chimbulu, hali mwana yoze wasemukine kuli chimbulu.

Luka 12:2

Chize cheswe chaswamanyine, makachisolola, chize cheswe chakuhengeka, makachinyingikisa.

A-ROMA 2:5

Alioze mbunge yikalu ukwete. Kuusolo kwalumuka. Kashika wakulitulikila lamba liahiana ha tangwa lize Zambi makasolola utenu wenyi wa ululi,

A-ROMA 3:26

Alioze, haliabwila Zambi kakukaula milonga ha kulweza chize akupwisa atu akwa ululi. Chenacho kanashindakenya ngwenyi, iye mwene kali mukwa ululi, ni nawa, kakupwisa mukwa ululi yoze wakufuliela Yesu Kristu.

1 Korintu 4:5

Kashika, kanda nubatwila niumwe, muze tangwa kanda lichiheta. Ubatwilo wakusula chatamba kushimbwila ndoo muze Mwene Yesu makeza. Iye makasolola mu pangu yuma yize yahengamine mu milima, makasolola manyonga waze ahengamine mu mbunge ja atu. Mba Zambi makachichimieka mutu ni mutu chize chinalite.

Shimbi 23:14

Fungenu musumba wenu kanawa, mumu Mwene Zambi, Zambi yenu, kali hamwe ni yenu mu musumba wenu ha kunufunga ni ha kunukwasa kukumba akwa kole jenu. Kanda nulinga chimwe Chuma chize kuchalitele, chize muchivwisa Mwene Zambi kubiha ha kunumba nyima.”

Shimbi 32:4

“Mwene Zambi kali liwe, ndako jenyi jili jingunu ni ja ululi. Zambi yenu kali mukwa kushishika ni wa umwenemwene, kakulinga yuma ya ululi ni yize yinalite.

1 Petulu 1:17

Nwakuvuluka Zambi ngwenu: “Tata”, muze nwakumuwayila. Neye keshi katonde, kakubatwila mutu mweswe nikulita ni yitanga yenyi. Kashika, ha shimbu lize nuli hano hashi, musenu vumbi.