Zakaria 1:3 - Mukanda Wa Zambi 1970

³ alioze haliabwila ngunanwambe ngwami: Hilukenu kuli yami, mba ni yami munguhiluka kuli yenu.

MUKANDA USANDU WA ZAMBI 1975

³ kashika amba kuli ayo ngwe, Yehova-wa-Tujita kanambe ngwenyi, Hilukenu kuli yami ni yami munguhiluka kuli yenu. Chocho kanambe Yehova-wa-Tujita.

Zakaria 1:3 Iomraidhean Croise

2 Sango Ja Mianangana 15:2

Neye yaya ni kutakana mwanangana Asa. Yakololoka ngwenyi: “Banjikenu kuli yami, mwanangana Asa, ni yenu eswe Ayuda ni Abenjamine! Mwene Zambi mabwa hamwe ni yenu nyi yenu munubwa hamwe nenyi. Nyi munumufupa munumuwana. Alioze nyi nwamumba nyima, neye kumanwehuka.

2 Sango Ja Mianangana 15:4

Alioze muze amwene lamba, yaatewulukila kuli Mwene Zambi, Zambi ya Aisraele. Yaamufupa, mba yaamuwana.

Nehemia 9:28

Muze haabwa ni uhwimino, yaavulumuna nawa, mba yiwaakunjika nawa mu moko ja akwa kole jo. Alioze muze haalumuka nawa ku mbunge ni yaateta kuli yena, yena mwilu yiwaabanjika, yiwaalamwina ni keke ye yinji nawa ni nawa.

Jobe 22:23

Chakutamba kuhiluka kuli Mukwa Ndundo Jeswe ni mbunge yibema, ni kuchiza yibi yeswe yize haanalinga mu zuwo lie.

Izaya 31:6

Mwene Zambi yamba ngwenyi: “Yenu Aisraele, nwanguvulumwine, nwangukatukilile. Alioze haliabwila, hilukenu kuli yami!

Izaya 44:22

Utanguko we hingunautangumuna ngwe lelwa. Milonga ye hingunayitandulula ngwe mbundu. Hiluka kuli yami mumu yami nakukulile.”

Jeremia 12:15

Alioze muze hinaatwala kusuku, mungukeevwila nawa keke; mungukahilwisa vungu lieswe ku chifuchi chenyi, ni ku chihinga chenyi mwene.

Jeremia 25:5

Yaanulongesa kwehuka ungulungulu wenu ni yibi yize te nwakulinga, mba hanga nuhase kutwama mu chifuchi chize Mwene Zambi anuhele yenu ni tushakulu twenu kubwa chihinga cha miaka yeswe.

Jeremia 3:1

Mwene Zambi kanahula ngwenyi: “Nyi lunga halakula pwo lienyi, hamumbata kuli lunga weka, kuma lunga mutangu mahasa kumuhilwisa ku mahienyi, nyi? Ka, nyi wachilinga chifuchi muchibiha liakulu. Alioze yenu Israele, ukwete akwa zango anji, hindu haliabwila unazange kuhiluka kuli yami!

Jeremia 3:22

Hilukenu, yenu eswe waze nwehukile Mwene Zambi, kumanuwuka, manupwisa akwa ululi. Nwakwamba ngwenu: “Ewa, tuneza kuli Mwene Zambi, mumu kali Zambi yetu.

Jeremia 35:15

Matangwa eswe te nakunutumina tuvumbi twami akwa munanyi. No yaanulweza nwehuke ndako jenu jibi ni kulinga yize yinalite. Haananukanyamisa kulitwamina kuwayila ni kulingila mazambi eka, hanga nutwame miaka yinji mu chifuchi chize hingunanwehe yenu ni tushakulu twenu. Alioze kunwangwivilile ko, kunwangubanjikile ko.

Jeremia 4:1

Mwene Zambi kanambe ngwenyi: “Yenu Aisraele, nyi nunazange kwalumuna, alumukenu nuhiluke kuli yami. Nyi nwambila mahamba waze nakuvutwokela ni kushachila hali yami,

Ezekiel 18:19

“Alioze muuhula ngwe: ‘Mumu yika mwana kechi kamona lamba ha milonga ya tato?’ Kumbululo lili lino ngwo, mwana te kakulinga ululi ni chize chinalite. Kakufunga Shimbi jami ni kujononokena kanawa, kashika chamwenemwene kumakatwama ni mwono.

Ezekiel 18:31

Mbilenu ungulungulu weswe uze nwakulinga, nubwe ni manyonga aha ni mbunge jaha. Mumu yika yenu Aisraele nwakuzanga kufwa?

Ezekiel 18:32

Yami Chazangile niumwe kufwa. Alumukenu ku mbunge nukatwame ni mwono.” Mwene Zambi wachamba.

Ezekiel 33:11

Alweze ngwe, mwe yami Mwene Zambi, Chishi kuwahilila nyi Chivulumunyi wafwa. Ngunazange kachi alitwamine yibi yenyi, abwe ni mwono. Alumukenu ku mbunge! Alumukenu ku mbunge vungu lia Israele, mumu yika nunazange kufwa?”

Hosea 14:1

Aa Aisraele, hilukenu kuli Mwene Zambi, Zambi yenu. Shili yenu yinanutalingisa ni kunulimbwisa.

Hosea 14:4

Mwene Zambi kanambe ngwenyi: “Atu jami mungukaahilwisa kuli yami. Mungukaazanga ni mbunge yami yeswe, mumu ufwatulo wami hiwahwa.

Hosea 6:1

Aisraele kaanambe ngwo: “Tuhilukenu kuli Mwene Zambi! Hatulamba, alioze kumatuwuka; hatulemeka yilonda, alioze kumayikasa. Hi chocho ko, nyi?

Joele 2:12

Mwene Zambi ngwenyi: “Chibwe chocho, alumukenu ku mbunge nuhiluke kuli yami nujile kulia, nulile ni kunenganyana.

Malaki 3:7

Yenu, ngwe tushakulu twenu waze aliangile, hinwakolema Shimbi jami, kunwajifungile ko. Hilukenu kuli yami, ni yami munguhiluka kuli yenu. Alioze yenu nwakuhula ngwenu: ‘Kuchi chatutamba kulinga mba tuhiluke kuli yena?’