Yilinga 3:6 - Mukanda Wa Zambi 1970

⁶ Alioze Petulu ngwenyi: “Mbongo Chishi najo, alioze chize nguli nacho ngunakwehe cho. Ngwami, mu jina lia Yesu Kristu Kanazare, katuka, wende!”

MUKANDA USANDU WA ZAMBI 1975

⁶ Petulu wambile ngwenyi, Prata ni oru chishi nayo; alioze chize nguli nacho ngunakwehe: mu jina lia Yesu Kristu Ka-Nazare, katuka, wende.

Yilinga 3:6 Iomraidhean Croise

Mateu 10:9

Kanda numbata chibwe oru, hanji prata, chibwe mbongo mu miya yenu.

Mateu 7:22

Ha tangwa lize anji maakanguhula ngwo: ‘Mwene, Mwene! Hi yetu ko te twakwambujola mu jina lie, nyi? Hi yetu ko te twakutuhwisa mwiku wa luchisa mu jina lie, nyi? Hi yetu ko te twakulinga yilayi yinji mu jina lie, nyi?’

Marku 14:8

Halinga chize hahasa kulinga. Hawayisa mujimba wami ni maji, haululika ha kuufunda.

Marku 16:17

Yilayi yino kumuyikaula akwa kufuliela: mu jina liami kumaakatuhwisa mwiku wa luchisa; kumaakahanjika maliji aha;

Yoano 19:19

Pilatu yasonekesa Chisoneko ni kuchisa ha kulusu: “Yesu Kanazare, mwe Mwanangana wa Ayuda.”

Yilinga 10:38

Ngwami, yikuma ya Yesu wa ku Nazare, ngwe chize Zambi hanamuwayisa ni Mwiku wa Linanga ni tachi. Yesu hanendangana kweswe ni kulinga yibema, ni kuwuka eswe waze amwesene lamba kuli Sakwonga, Yesu yabwa ni tachi ja kuchilinga mumu te Zambi kali hamwe nenyi.

Yilinga 16:18

Chuma chino yachilinga matangwa anji. Mba Paulu yevwa kubihia, yatewuluka, yambila mwiku wa luchisa ngwenyi: “Ngunakwambe mu jina lia Yesu Kristu, ngwami, tuhuka muli mwana pwo yono.” Yiumutuhuka shimbu lizeliene.

Yilinga 2:22

“Malunga ja Israele, ngubanjikenu! Zambi hanashindakenya hakutwala kuli Yesu wa ku Nazare, ni yipupu, ni yikomokeso, ni yilayi. Yuma yino Zambi wayilingile muli iye, ngwe chize nunanyingika yenwene, mumu wayilingile hakachi kenu.

Yilinga 2:36

“Aisraele eswe chaatamba kunyingika kanawa ngwo, Yesu yoze nwahachile ha kulusu, Zambi hanamupwisa Mwene kanda Chilamwina yoze iye mwene alakenyene.”

Yilinga 3:16

Ndundo ja jina lia Yesu hijahindwisa mutu yono. Nunamumono, nunamunyingika. Habwa ni tachi mumu hafuliela jina lize. Jina lia Yesu hiliamwaha ufulielo, kushika habwa mungunu ngwe chize nunamono yenu eswe.

Yilinga 3:5

Iye yaatala nikunyonga ngwenyi, kota chimwe Chuma mangwaha.

Yilinga 3:7

Mba yamukwata ku kwoko lia chindume, yamukatwisa. Hazehene yiliato yenyi ni tusendengele twenyi yijikiza.

Yilinga 4:10

Aisraele eswe ni yenu eswe chanutamba kunyingika ngwenu, mutu yono kanamana ku meso jenu mungunu ku tachi ja jina lia Yesu Kristu wa ku Nazare, yoze nwahachile ha kulusu, alioze Zambi hanamuhindwisa ku kufwa.

Yilinga 4:7

Yaatumbika tunganda mukachi ko, yaahula ngwo; “Ni tachi jika, hanji mu jina liaya nunakalinga chino?”

Yilinga 9:34

Petulu yamwamba ngwenyi: “Enea, Yesu Kristu kanakuhindwisa, katuka, alula muhela we.” Hazehene yakatuka.

1 Korintu 4:11

Chibwe ndoo ni haliabwila twakwivwa zala ni pwila, twakubwa ni uvu. Atu kaakutulamba. Tuli yihengwahengwa.

2 Korintu 6:10

Kaakutuvwisa chinyengo, hindu twakuwahilila matangwa eswe. Tuli yiswale, hindu twakubichisa anji. Tuli ngwe kutushi nichimwe, hindu twakubita yuma yeswe.

2 Korintu 8:12

Mumu, nyi mutu mazanga kuhana chawana, Zambi matayiza chawana chenyi nikulita ni chize ali nacho, hi nikulita ko ni chize keshi nacho.

2 Korintu 8:9

Mumu nunanyingika utu wa Mwene wetu Yesu Kristu. Chibwe wabwile pichi, hindu yalumuka chiswale mumu hali yenu, hanga ku uswale wenyi nukabwe pichi.

Tiangu (Jake) 2:5

Akwetu akwa Kristu, banjikenu! Zambi hanatongola yiswale a hano hashi hanga abwe pichi mu ufulielo, ni maswana mu Wanangana wenyi uze alakenyene waze akumuzanga.

1 Petulu 4:10

Zambi kakuhana yawana yeka ni yeka kuli atu jenyi. Mutu mweswe hakachi kenu alinge kanawa ni chawana chenyi ni kukwasa nacho atu akwo.