Yilinga 21:19 - Mukanda Wa Zambi 1970

¹⁹ Muze Paulu haameneka, yaambulwila mwazu yuma yeswe yize Zambi alingile hakachi ka waze hi Ayuda ko hakutwala ku milimo yenyi.

MUKANDA USANDU WA ZAMBI 1975

¹⁹ Muze te haameneka, wambulwile chimwe ha chimwe yuma yize alingile Zambi hakachi ka akwa mavungu ku uvumbiko wenyi.

Yilinga 21:19 Iomraidhean Croise

Mateu 23:7

Kaakuzanga kwameneka mu yitanda ni kwavuluka ngwo: ‘Alongeshi.’

Yilinga 1:17

Yudase wabwile umwe wa kuli yetu, neye watambwile milimo hamwe ni yetu.”

Yilinga 14:27

Muze haaheta ko, yaakungulula akwa Chikungulwila eswe, yaalumbunwina yeswe yize Zambi alingile no, ni ngwe chize hanazulwila waze hi Ayuda ko chajilo, hanga no afuliele.

Yilinga 15:12

Chizavu cheswe yaahola kuluu, ha kubanjika Paulu ni Barnaba ni kulumbununa yipupu ni yilayi yize Zambi halinga ni moko jo hakachi ka waze hi Ayuda ko.

Yilinga 15:4

Muze Paulu ni Barnaba haaheta ku Yerusaleme, akwa Kristu, ni tunganda twa Yesu, ni makulwana yaasambilila. Paulu ni Barnaba yaambulula yuma yeswe yize Zambi alingile no.

Yilinga 20:24

Alioze Chishi kwalula mwono wami ngwe Chuma chilemu. Nakuzanga kuhwisa kwenda chami ni milimo yami yize natambwile kuli Mwene Yesu. Milimo yino yenayi ayi: kushindakenya chikolo Sango Jibema ja utu wa Zambi.

1 Korintu 15:10

Alioze ku utu wa Zambi nguli chize nguli, ni utu uze angulwezele hi wamokomko ko. Mumu hingunahondangana kuhiana tunganda akwo eswe, alioze yize yeswe hi tachi ja yami mwene ko, alioze utu wa Zambi uze walinga hamwe ni yami.

2 Korintu 12:12

Nalihumikijine kuhiana ni milimo yize nalingile hakachi kenu. Ku milimo yize Zambi yasolola yinyingi, ni yikomokeso, ni yipupu, ha kulweza ngwo, nguli kanganda ka Kristu.

2 Korintu 6:1

Kashika yetu, waze twakulinga hamwe ni Zambi, tunaliumbu kuli yenu ngwetu, kanda nulelesa utu uze Zambi hananulweze.

Kolosu 1:29

Ha kumanununa milimo yino, nakuhondangana ni kulitachika ni tachi jize akuhana Kristu, tachi jize jakulinga muli yami.