Yilinga 2:43 - Mukanda Wa Zambi 1970

⁴³ Tunganda twa Yesu yaalinga yikomokeso ni yilayi yinji. Atu eswe yeevwa woma.

MUKANDA USANDU WA ZAMBI 1975

⁴³ Ni woma wejile hali atu eswe, ni yipekesa ni yilayi yinji ayilingile ku moko ja apostolo.

Yilinga 2:43 Iomraidhean Croise

Estere 8:17

Mu yihunda yeswe ni mu yifuchi yeswe, muze hevwa kwambujola cha Shimbi yize, Ayuda yaalikwiza ni uwahililo, yaalinga yiteleka. Atu anji a ku mavungu akwo yaalipwisa Ayuda, mumu ha matangwa waze eswe yeevwila Ayuda woma.

Jeremia 33:9

Yerusaleme mulikabwa limbo lia chiseke, ni ulemu, ni liakuchichimieka nalio. Mavungu eswe a hashi kumaakevwa woma, kumaakachikima muze maakevwa yuma yibema yize hinalinga akwa Yerusaleme, ni chize hinaayukisa.”

Hosea 3:5

Alioze tangwa kumulikeza lize Aisraele maakahiluka nawa kuli Mwene Zambi, Zambi yo, ni kuli umwe wa ku vungu lia David mwanangana wo. Mba maakalemesa Mwene Zambi ni kutambula yawana yenyi yibema.

Marku 16:17

Yilayi yino kumuyikaula akwa kufuliela: mu jina liami kumaakatuhwisa mwiku wa luchisa; kumaakahanjika maliji aha;

Luka 7:16

Atu eswe yeevwa woma, yaachichimieka Zambi ngwo: “Mukwa munanyi munene wa Zambi hasoloka mukachi ketu,” nawa ngwo: “Zambi haneza ni kulamwina atu jenyi!”

Luka 8:37

Hohene mbunga ya mu chifuchi cha Agadara yaambila Yesu akatuke ku chifuchi cho, mumu evwile woma unji. Kashika Yesu yanjila mu wato hanga aye.

Yoano 14:12

Chamwenemwene ngunanwambulwila ngwami, yoze unangufuliela, neye makalinga yitanga yize nakulinga. Makalinga yitanga yinene yahiana yino, mumu ngunayi kuli Tata.

Yilinga 2:22

“Malunga ja Israele, ngubanjikenu! Zambi hanashindakenya hakutwala kuli Yesu wa ku Nazare, ni yipupu, ni yikomokeso, ni yilayi. Yuma yino Zambi wayilingile muli iye, ngwe chize nunanyingika yenwene, mumu wayilingile hakachi kenu.

Yilinga 4:33

Ni tachi jinji tumbaji twa Yesu yaashindakenya uhindukilo wa Mwene Yesu. Zambi yaawahisa eswe.

Yilinga 5:5

Anania, muze hevwa maliji wano yalimbuka hashi, yafwa kwenyi. Eswe waze achivwile yeevwa woma unji.

Yilinga 9:34

Petulu yamwamba ngwenyi: “Enea, Yesu Kristu kanakuhindwisa, katuka, alula muhela we.” Hazehene yakatuka.

Yilinga 9:40

Petulu yatuhwisa atu eswe, yasa makungunwa hashi, yalemba, mba yatewuluka ku mujimba, ngwenyi: “Tabita, hinduka!” Neye yalaula, yamona Petulu, yahinduka.