Yilinga 2:2 - Mukanda Wa Zambi 1970

² Susumuku mwilu yimwiza lundunjila ngwe fuji ya tachi, yiizalisa zuwo lieswe muze te anatwama.

MUKANDA USANDU WA ZAMBI 1975

² Susumuku kwakatukile mwilu lundunjila ngwe kutakumuka cha fuji ya tachi, chazalishile zuwo lieswe, muze atwamine.

Yilinga 2:2 Iomraidhean Croise

1 Yitanga Ya Mianangana 19:11

Mwene Zambi yamwamba ngwenyi: “Tuhuka, kanduka, umane ha mulundu kulutwe liami, ngunambe kubalika.” Mba fuji yinene yiibalika, yiibula milundu ni kubuzula mawe tuyihanda ku meso ja Mwene Zambi, alioze Mwene kabwile ko mu fuji yize. Muze fuji hiyahola, yikubwa kunyika cha hashi, alioze Mwene Zambi kabwile ko mu kunyika chize.

Miaso (Masamu) 18:10

Yenda ni tambu ha temba lienyi lia mwilu, yendela ha mapulwa ja fuji.

Mwaso Ubema Wahiana 4:16

Tweya fuji ya ku norde. Fuji ya ku sude huhwa ha munda wami; zalisa ho ni vumba libema. Mukwa zango wami eze ku munda wami hanga alie mihuko yawo yibema.

Izaya 65:24

Mungukakumbulula ku kulemba cho shimbu maachilemba.

Malaki 3:1

Mwene Zambi Mukwa Ndundo Jeswe kanakumbulula ngwenyi: “Mungukatuma kanganda kami ni kungululikila jila. Hohene Mwene Zambi yoze nunatalatala kumeza susumuku ku zuwo lienyi. Kanganda yoze nunevwila usona kumeza akambujole Usendo wami.”

Luka 2:13

Susumuku yikubwa hamwe ni kanganda chizavu cha tunganda twa mwilu. Yaachichimieka Zambi ngwo:

Yoano 3:8

Fuji yakuhehukila kuze yinazange. Ni yena wakwivwa zungo liayo, alioze kuushi kunyingika kuze yineza ni kuze yinayi. Chimuwika ni yoze wakusemuka ku Mwiku wa Linanga.”

Yilinga 2:3

Yimusoloka malimi ngwe milengi ya kahia, yaalihandununa, mba yaabwa hali mutu ni mutu.

Yilinga 2:6

Muze te heevwa zungo lize, mbunga yaalikungulula. Eswe yaakakashana, mumu mutu ni mutu yevwa akwa kufuliela nikuhanjika mu liji lienyi mwene.

Yilinga 4:31

Muze haalemba, muma muze akungulukile yimunyika. Ayo eswe yaazala ni Mwiku wa Linanga, mba yaabutuka kwambujola liji lia Zambi ni hamu.

1 Petulu 1:12

Alioze Zambi yasolola akwa munanyi ngwenyi, maliji waze aalwezele ha kwambujola, kaabwile ko hakutwala kuli ayo ene, alioze hakutwala kuli yenu. Mba haliabwila, sango jize hinwajitambula. Alongeshi a Sango Jibema, waze ahanjikile ku tachi ja Mwiku wa Linanga, uze watumiwine mwilu, haananulweze jo. Chibwe tunganda a mwilu kaanazange kunyingika Sango jino.