Yilinga 19:9 - Mukanda Wa Zambi 1970

⁹ Alioze akwo yaakala mbunge, yaalituna kufuliela, yaalelesa ku meso ja atu eswe longeso hakutwala kuli Mwene Yesu. Kashika Paulu yakatuka, yatwala tumbaji hamwe nenyi nikwalongesa tangwa ha tangwa mu shikola ya Tiranu.

MUKANDA USANDU WA ZAMBI 1975

⁹ Alioze muze amwe akalile, kononokene, nikuhanjika chipi ha Jila yino kumeso ja chizavu, wakatukile kuli ayo, wahandunwine tumbaji, nikuhanjika ni atu tangwa ha tangwa mu shikola ya Teranu.

Yilinga 19:9 Iomraidhean Croise

1 MIANANGANA 17:14

Alioze koononokene ko; yaakalisa mbunge jo ngwe chize alingile tushakulu two, waze kafulielele ko Mwene Zambi, Zambi yo.

2 Sango Ja Mianangana 30:8

Kanda nubwa akwa pami ngwe chize abwile ayo. Likunjikenu kuli Mwene Zambi. Tweyenu ku zuwo lia Zambi mu Yerusaleme, lize Mwene Zambi, Zambi yenu, hanalipwisa lia chijila ndoo ku miaka yeswe. Wayilenu Mwene Zambi, Zambi yenu, hanji machiza kama ufwatulo wenyi.

2 Sango Ja Mianangana 36:16

Alioze ayo yaasaula e tunganda twa Zambi, yaalelesa maliji jenyi, yaaseha akwa munanyi jenyi. Mba ha kusula Mwene Zambi yevwila atu jenyi ufwatulo kuhiana, ni e mana a kuuchina kaabwile ko.

Nehemia 9:29

Yiwaakanyamisa ha kwononokena longeso lie, alioze mu kulengumuka cho yaalituna Shimbi je, chibwe Shimbi jize jakupwisa atu ni mwono. Akwa pami kanda akwa kukolema yaalituna kwoononoka.

Miaso (Masamu) 95:8

“Kanda nukalisa mbunge jenu ngwe chize alingile tushakulu twenu, ku Meriba ni ku Masa mu puya.

Yishima 8:34

Mutu yoze wakungubanjika, kakuwahilila, yoze wakumana ku chikolo chami tangwa ha tangwa, nikushimbwila ku chajilo chami.

Izaya 8:14

Yami nguli mwe munangi lume. Kashika nguli ngwe liwe lia kuhukanyisa atu, nguli ngwe muheto uze wakufwa akwa wanangana ja Yuda ni Israele ni akwa limbo lia Yerusaleme.

Jeremia 19:15

maliji ja Mwene Zambi Mukwa Ndundo Jeswe, Zambi ya Aisraele, ngwenyi: “Munguneha lamba heswe lize nambile ha limbo lino ni ha membo eswe akusulangana, mumu nuli akwa pami, kunushi kubanjika ku maliji jami.”

Jeremia 7:26

Chibwe chocho, niumwe hanabanjika hanji hanakanyama, alioze hinunabu yihulia ni akwa pami kuhiana tushakulu twenu.

Mateu 15:14

Echenu Afariseu! Kaali tetekeli tupuputa. Alioze, nyi kapuputa masongwela kapuputa mukwo, eswe aali maaholokela mu wina.”

Mateu 16:4

Yenu atu ja mwakono, yingulungulu, kunushi kulivwa ni Zambi. Nunafupu chilayi, alioze kechi kunwaha cho nichimwe, shina chilayi cha mukwa munanyi wa Zambi, Yona.” Mba yaahichika, yaya kwenyi.

Mateu 26:55

Ha shimbu lizeliene Yesu yahula mbunga ngwenyi: “Nuneza ni mikwale ni kanda ni kungukwata ngwe nguli muhuza, nyi? Tangwa ha tangwa natwamine mu zuwo lia Zambi nikulongesa, hindu kunwangukwachile ko.

Yoano 12:40

“Zambi hanapupuchisa meso jo, hanakalisa mbunge jo, hanga meso jo keechi kamona, hanga mbunge jo kujichi kwivwa, kuchina matewuluka kuli yami hanga ngwawuke.”

Yilinga 11:26

Muze hamumona, yamutwala ku Antiokia. Mwaka wa muundu yaakunguluka hamwe ni akwa Chikungulwila, yaalongesa mbunga yinene. Ku Antiokia, kwenako aliangile kuluka tumbaji ngwo, akwa Kristu.

Yilinga 14:4

Alioze chizavu cha mu limbo yaalihandununa, amwe yaabwa hamwe ni Ayuda, akwo hamwe ni tunganda twa Yesu.

Yilinga 17:4

Akwo hakachi ko yaafuliela, yaalichinga ni Paulu ni Sila. Chimuwika nawa, mbunga yinene ya Agresia akwa kuwayila Zambi, ni mapwo anji a lufuma yaafuliela.

Yilinga 19:23

Ha mwaka uze yikubwa zungo linji mumu ha longeso hakutwala kuli Mwene Yesu.

Yilinga 19:30

Paulu yazanga kunjila mukachi ka mbunga, alioze tumbaji yaamukanda.

Yilinga 20:31

Kashika kanyamenu, iwulukenu ngwenu, ha miaka yitatu, ufuku ni mwalwa, chalitwaminyine kukanyamisa mweswe wa kuli yenu ni masoji.

Yilinga 22:4

Nahungumionene ndoo ku kufwa waze akawile longeso hakutwala kuli Mwene Yesu. Nakwachile malunga ni mapwo nikwasa mu zuwo ha lamba.

Yilinga 24:21

Chuma chimuwika lume nalingile, muze namanyine ku meso jo, yingukololoka ngwami: ‘Nunangusopesa musono mumu nakufuliela ngwami, afu kumaakahinduka.’ ”

Yilinga 28:22

Alioze tunazange kwivwa manyonga je chize Unanyongo, mumu tunanyingika ngwetu, kuma kweswe atu kaakulimika ni mbunga yize yena uli.”

Yilinga 7:51

“Yenu akwa pami. Mu kunyonga chenu ni kwivwa chenu nuli ngwe waze kaanyingikine Zambi. Matangwa eswe nwakulituna Mwiku wa Linanga, ngwe tushakulu twenu.

Yilinga 9:2

yamwita mikanda ya kunjila nayo mu mazuwo ja kuwayila ja Ayuda mu limbo lia Damasku Yazanga kufupa atu waze te akukaula jila ya Yesu, malunga ni mapwo, ha kwakwata ni kwaneha ku Yerusaleme.

A-ROMA 11:7

Mba twambe kuchi? Ngwetu: Aisraele kaazukile ko yize afupile. Shina waze atongwele Zambi, enoo ayizukile. Akwo yaalumuka akalu.

A-ROMA 9:18

Chenacho, Zambi akuvwila keke yoze anazange kuvwila keke, kakukalisa mbunge ya yoze anazange kukalisa.

1 Korintu 16:9

Mumu hinawana chajilo chakwazulula ha kulinga milimo yinawaha muno, chibwe akwa kole kaanoko naye.

1 Timoteu 6:5

ni kuhamika chize kuchishi songo hakachi ka atu waze keeshi manyonga, waze kaanyingikine umwenemwene. Kaakunyonga ngwo, ufulielo uli jila ya kubichila.

2 Timoteu 1:15

Unanyingika ngwe, atu eswe mu chifuchi cha Asia haanangwehuka. Hakachi ko Figelu ni Hermogene.

2 Timoteu 3:5

Maakasoloka ku meso ja atu ngwe kaakuwayila Zambi, alioze mu mbunge jo kaakulituna tachi jamwenemwene ja Zambi. Lihandunune ni atu waze.

2 Timoteu 4:2

ambujola liji lia Zambi, sako tachi ha kuliambujola ha mwaka Ubema ni ha uze hi Ubema ko, kumika, ambila, shinjila nikulongesa ni uhomboloji weswe.

Hebreu 3:13

Alioze tangwa ha tangwa litakamisenu ni akwenu, hanga shili kuyichi kwonga niumwe hakachi kenu, kuchina makalisa mbunge yenyi. Matangwa eswe muze munwivwa ngwo: “musono,” chanutamba kulishinjila ni akwenu.

2 Petulu 2:12

Alioze alongeshi waze a kwonga kaakulinga chilingila, ngwe tushitu a mu yambu waze akusemuka hanga atu aakwate ni kwashiha. Atu waze kaakulelesa yuma yize kaayinyingikine ko. Maakafwa ngwe tushitu a mu yambu.

2 Petulu 2:2

Chibwe chocho, atu anji meembulula yitanga yo ya utanji; atu anji maakachoka jila ya umwenemwene, mumu ha yibi yize alongeshi waze akulinga.

Yuda 1:10

Alioze atu waze kaakushililika yize kaayinyingikine ko. Yuma yize ayo akulinga kuyishi ni kunyonga, ngwe chize akulinga tushitu, yenayo yakwashiha.