Ubutukilo 41:8 - Mukanda Wa Zambi 1970

⁸ Ha chichamene yalibikala, yatambika tahi ni akwa mana eswe a mu chifuchi cha Egiptu. Yaawila yilota yenyi, alioze kamwenekene ko chibwe umuwika yoze mahasa kuyilumbununa.

MUKANDA USANDU WA ZAMBI 1975

⁸ Mu kwacha chimene mbunge yenyi yiyilipikala, yatuma kusanyika yimbanda eswe a mu Engitu, ni akwa mana eswe. Falau yaalweza chilota chenyi alioze niumwe kahashile kumulumbunwinacho wakuhi.

Ubutukilo 41:8 Iomraidhean Croise

Ubutukilo 40:6

Chichamene muze Josefe heza ni kwameneka, yamona ngwenyi, kaali ni yinyengo.

Ubutukilo 40:8

Ayo ngwo: “Twalotanga yilota, alioze mukwa kutulumbunwina yo wakuhi.” Josefe ngwenyi: “Zambi mwe wakulumbununa yilota. Ngwawilenu ye yilota yenu, nyi nunazange.”

Ubutukilo 41:15

Mwe mwanangana yamulweza ngwenyi: “Nalotanga chilota, alioze wakuhi niumwe Unahase kuchilumbununa. Haangulweza ngwo, yena wakuhasa kulumbununa yilota.”

Ubutukilo 41:24

Yihupu yize yakonyata yinaminya yize yinene. Yilota yino ngunakayawila tahi, alioze niumwe kahashile kuyilumbununa.”

Ubutukilo 41:7

Yihupu yize yakonyata yinaminya yihupu yize yinene. Hohene mwanangana yalaula mu tulo, mba yanyingika ngwenyi, chino chili chilota.

Miaso (Masamu) 25:14

Mwene Zambi kali sepa lia waze akumwononokena, kakukolesa Usendo wenyi hamwe no.

Kutuhuka 7:11

Alioze mwanangana yatambika akwa mana ni akwa kulinga yipupu, no yaalinga chizechene ni mana jo.

Kutuhuka 7:22

Akwa kulinga yipupu a mu Egiptu yaalinga chizechene ni mana jo, mba mbunge ya mwanangana yiikala. Hikevwilile ko Mose ni Arane, ngwe chize ambile Zambi.

Kutuhuka 8:7

Alioze akwa kulinga yipupu, ni mana jo, no yaalumba yula ya mbwota.

Kutuhuka 9:11

Akwa kulinga yipupu kaahashile ko kuheta ku meso ja Mose mumu ni ayo nawa yaakwachika yivunda ngwe atu akwo eswe a mu Egiptu.

Izaya 19:3

Mungubinjisa manyonga ja akwa Egiptu ni kulekumuna mbunge jo. Kumaakahula mahamba jo ni kwakwasa; maakahula tahi; maakahula mana kuli afu.

Izaya 29:14

Kashika mungukaalamba chakutungumuna nawa ni nawa. Akwa mana maakalumuka yihepuke, mana jo eswe maakabwa amokomoko.”

Izaya 8:19

Alioze maakakulweza ngwo: “Chatamba kwita mana kuli tahi ni kuli akwa mahamba waze akulinyinguna ni kulinyinyita, mumu chatamba kwita mana kuli mwiku, ni kuhula afu hakutwala kuli akwa mwono.”

Daniel 1:20

Muze te mwanangana akwahula chiyulo hakutwala ku yihula yikalu, yamona ngwenyi, ana malunga waze awana kaali ni mana yisuho kumi kuhiana tahi ni akwa tufutafuta eswe a mu wanangana wenyi.

Daniel 4:18

Mwanangana ngwenyi: “Chino che chilota ngunakalota. Haliabwila, yena Belteshazare, ngulweze ulumbunwiso wacho. Niumwe wa kuli akwa kuyula jami Unahase kuchilumbununa. Alioze yena Unahase mumu uli ni mwiku wa mazambi a linanga.”

Daniel 4:19

Ha chino Daniel, yoze te akuvuluka nawa ngwo Belteshazare, yevwa woma unji, te kahashile ko kuhanjika liji nilimwe. Mwanangana yamwamba ngwenyi: “Belteshazare, kanda wivwa woma wa chilota ni we ulumbunwiso wacho.” Belteshazare ngwenyi: “Vulie mwanangana! Kachi che chilota ni we ulumbunwiso wacho yibwe kama kuli akwa kole jenu, hi kuli yenu ko.

Daniel 4:5

Alioze yingulota chimwe chilota cha woma unji, yingumona Usolwelo wa mwongo muze te ngunabombo.

Daniel 4:6

Kashika yingutuma liji ni kutambika akwa kuyula eswe a mu Babilone, hanga angulumbunwine chilota chami.

Daniel 4:7

Muze tahi, ni akwa yipupu, ni akwa mana eswe heeza, yingwaawila chilota chami, alioze kaahashile ko kungulumbunwina cho.

Daniel 5:11

Mu wanangana we muli umwe lunga yoze uli ni mwiku wa mazambi a linanga. Muze tatenu abwile mwanangana, lunga yoze yasolola yinyingi yenyi ni mana jenyi ngwe ya mazambi. Tatenu, Nebukanezore, yamupwisa mwata wa akwa yipupu ni tahi ni akwa munanyi.

Daniel 7:28

Lino lie songo lia che chikuma. Mba yami Daniel yingwivwa woma kuhiana, yingwalumuka ku meso, alioze yingufunga yuma yino yeswe mu mbunge.

Daniel 8:27

Yingulekumuka, yinguyiza amwe matangwa. Mba yingujikiza, yinguhiluka ku milimo yize angukunjikile mwanangana, alioze yingulishimwoka hakutwala ku we Usolwelo, kuwangulumbunukinyine ko.

Alevi 19:31

“Kanda nuhula mana kuli akwa mahamba ni kuli tahi. Nyi nwachilinga munubwa akwa luchisa. Yami nguli Mwene Zambi, Zambi yenu.

Alevi 20:6

“Nyi umwe mahula mana kuli akwa mahamba ni kuli tahi, mungulimika nenyi, chichi kumwalula nawa mukachi ka atu jami.

Habakuke 3:16

Ngunevu yize yeswe ni kuchikima; mivumbo yami yinachikima ni woma. Mujimba wami hiwahongonoka, molu jami kaanabengwoka. Mungulihumikiza ni kutwaminyina tangwa lize Zambi makamwesa lamba waze akulimika ni yetu.

Mateu 2:1

Yesu yasemuka mu Betleheme, limbo lia mu Yudea, muze te Herode abwile mwanangana. Muze Yesu hasemuka, akwa mana waze te akuhengula matongonoshi, yaakatuka ku chivumbuko, yeeza ku Yerusaleme.

Yilinga 17:18

Mba amwe a kuli akwa mana jo, Apikuria ni Astoika yaahamika nenyi. Amwe yaahula ngwo: “Mutu yono sakulimbambwila, yika anazange kwamba?” Akwo ngwo: “Kanasoloka ngwe yoze unambujola mazambi ja yilambala.” Yaamba chino, mumu Paulu walongesele yikuma ya Yesu ni uhindukilo ku kufwa.

Yilinga 7:22

Chenacho Mose yalilongesa mana eswe a mu Egiptu, yabwa mukwa tachi mu maliji ni mu yitanga.

1 Korintu 1:19

Mumu hichinasonewa mu Mukanda wa Zambi ngwo: “Mungukonona mana ja akwa mana. Mungukahepwisa malinjekela ja akwa malinjekela.”

1 Samuel 6:2

Mba Afilistia yaatambika mahako jo ni tahi jo nikwahula ngwo: “Kuchi mutulinga ni mushete wa Usendo wa Mwene Zambi ni Aisraele? Nyi mutuuhilwisa ku Israele yuma yika chatutamba kuuhilwisa nawo?”