Ubutukilo 22:12 - Mukanda Wa Zambi 1970

¹² Kanganda ngwenyi: “Kanda umulemeka, kanda umulinga chibi. Haliabwila ngunanyingika ngwami, kuma wakulemesa Zambi, mumu kuwalitunyine kulambula mwane mulambu kuli Zambi, chibwe kali lume umuwika.”

MUKANDA USANDU WA ZAMBI 1975

¹² Yamba ngwenyi, Kanda usa kwoko lie hali mwana, chipwe kumulinga chimwe chuma, ka, mumu haliapwila ngunanyingika ngwami, Wakuvwila woma Zambi se kwanguminyine mwané, mwe mwané wa wika.

Ubutukilo 22:12 Iomraidhean Croise

Ubutukilo 20:11

Abrahama ngwenyi: “Mumu ngunakanyonga ngwami, kuno kukushi niumwe wakwivwila Zambi woma. Nyi nahola kuluu, mangushiha hanga atambule mukwetu pwo.

Ubutukilo 22:13

Abrahama yahetuka yamona kuji a panga kanasakaminya mbinga mu lutandulwila. Yaya ni kumukwata, yamulambula mulambu wa kwocha kuli Zambi ha kusalakana mwanenyi.

Ubutukilo 22:16

“Mwene Zambi kanambe ngwenyi: ‘Hinalishinga mu jina lia yami mwene, mumu ha Chuma chino hiwalinga, kuwalitunyine kungulambula mwane, chibwe kali lume umuwika,

Ubutukilo 22:2

Zambi ngwenyi: “Anda mwana yono Isake, yoze wakuzanga kuhiana, yako nenyi ku chifuchi cha Moria, ukangula mbule ye ha mulundu uze mungukakulweza.”

Ubutukilo 26:5

mumu Abrahama wangwononokenene, wafungile Shimbi jami.”

Ubutukilo 42:18

Ha tangwa lia muchitatu Josefe yaamba ngwenyi: “Nakwivwila Zambi woma, nyi nunazange kubwa ni mwono, lingenu chino:

Nehemia 5:15

Alioze akwa kuyula waze aliangile te kaakutambula milambu kuli atu tangwa ha tangwa ya yakulia ni vinyu ya makumi awana a mbongo ja prata. Chibwe tuvumbi two yaabinjisa atu. Alioze yami chalingile ngwe chize, mumu nevwilile Zambi woma.

Jobe 1:1

Yikubwa umwe lunga wa ku chifuchi cha Uze, jina lienyi Jobe. Te mutu mubema, mukwa ululi, yoze walemesene Zambi, walifungile ku yibi.

Jobe 28:28

Zambi yambila atu ngwenyi: “Nyi nunambe kubwa akwa mana chatamba kunguvwila woma. Nyi nunambe kubwa akwa yinyingi, chatamba kwehuka yibi.”

Jobe 5:19

Makakulamwina ku lamba yisuho yisambano, chisuho cha muchishimbiali, chibi kuchichi kakuwana.

Miaso (Masamu) 1:6

Mwene Zambi kakufunga akwa ululi, alioze yivulumunyi kumaakamona lamba.

Miaso (Masamu) 111:10

Nyi unazange kubwa mukwa mana lemesa Mwene Zambi; kakuhana mana kuli eswe waze akufunga Shimbi jenyi. Muchichimiekenu ndoo ku miaka yeswe.

Miaso (Masamu) 147:11

Alioze kakuwahilila ni atu waze akumulemesa, atu waze akushachila ha zango lienyi lize kulishi kuhwa.

Miaso (Masamu) 2:11

Lingilenu Mwene Zambi ni woma; chikimenu, fukamenu ku meso jenyi. Nyi ka, mevwa ufwatulo nikawashi, munufwa susumuku. Kawaha eswe waze akuswama muli iye.

Miaso (Masamu) 25:12

Mutu yoze wakulemesa Mwene Zambi, mwenawo Zambi akulongesa jila yize chamutamba kuya.

Miaso (Masamu) 25:14

Mwene Zambi kali sepa lia waze akumwononokena, kakukolesa Usendo wenyi hamwe no.

Kutuhuka 20:20

Mose ngwenyi: “Kanda nwivwa woma, Zambi keza lume ni kunweseka, amone nyi nwakumuvwila woma, hanga kunuchi kuvulumuna.”

Yishima 1:7

Nyi unambe kubwa mukwa mana, Chuma chitangu chatamba kulemesa Mwene Zambi. Alioze yihepuke kaakulelesa mana ni kufumba.

Longeshi 12:13

Ku songo lia yino yeswe, kuli lume Chuma chimuwika chakwamba ngwami: Lemesa Zambi, funga Shimbi yenyi; mumu ha chikuma chino Zambi atangilile mutu.

Jeremia 19:5

haanatungila hamba Bale yilumbilo ya kwocha ana jo ngwe milambu. Chuma chize yami chaalwezele ko achilinge, chibwe chachinyongene ko.

Jeremia 32:40

Mungukakolesa no Usendo ku miaka yeswe. Chichi kalitwamina nichimwe ha kwalingila yibema, mungukaapwisa akwa kunguvwila woma ni mbunge jo jeswe, hikeechi kangwehuka nawa nichimwe.

Malaki 4:2

Alioze kuli yenu waze nwakungwononokena, tachi jami ja kulamwina mujikasoloka ngwe kuvumbuka cha tangwa, ni kunuwuka ngwe mitemite ya tangwa. Munukatusuka ni kuwahilila ngwe yimbembe ja ngombe waze anatuhuka ku tanga lio.

Mateu 16:24

Yesu yambila tumbaji twenyi ngwenyi: “Nyi umwe mazanga kungukaula, alitwamine kulinyonga iye mwene; azundule kulusu yenyi, angukaule.

Mateu 19:29

Ni yoze hanahichika mazuwo, chibwe ayayo ni anakwo, hanji mandumbu, Chipwe tato, hanji naye, Chipwe ana, hanji minda mumu hali yami, makatambula yisuho kulakaji helu, ni makatambula nawa mwono wa miaka yeswe.

Mateu 5:16

Chizechene pangu lienu chatamba kupanguka ku meso ja atu, hanga akamone yitanga yibema yize nwakulinga, akalemese Tatenu yoze uli mwilu.”

Yoano 3:16

Mumu Zambi yazanga akwa hashi kuhiana. Kashika yatuma mwe Mwanenyi umuwika, hanga mweswawo mamufuliela kechi kafwa, alioze akabwe ni mwono wa miaka yeswe.

Yilinga 9:31

Mba Chikungulwila cheswe mu Yudea, ni mu Galilea, ni mu Samaria yaabwa ni uhwimino, yeenda ni woma ku meso ja Mwene Yesu, yooka ku tachi ja Mwiku wa Linanga.

A-ROMA 5:8

Alioze Zambi hanatusolwela zango lienyi linji, mumu Kristu yatufwila muze te tuchili akwa shili.

A-ROMA 8:32

Zambi kalitunyine ko kutwaha chibwe Mwana wa iye mwene, alioze yamukunjika hali yetu eswe. Ngwe kuchi kechi kutwaha yuma yeswe hamwe nenyi?

1 Korintu 10:13

Nyi kutala ngwe Sakwonga hanweseka, nyingikenu ngwenu, atu eswe kaakweseka chizechene. Alioze Zambi kanalingi nikulita ni chilakenyo chenyi, mumu kechi katayiza Sakwonga akanweseke kuhiana tachi jize nuli najo. Alioze muze makanweseka, shimbu lizeliene makanwaha tachi ja kukumba. Mba munukahasa kukumba.

2 Korintu 8:12

Mumu, nyi mutu mazanga kuhana chawana, Zambi matayiza chawana chenyi nikulita ni chize ali nacho, hi nikulita ko ni chize keshi nacho.

Hebreu 11:19

Abrahama yanyonga ngwenyi, Zambi mahasa kuhindwisa Isake ku kufwa—chili ngwe Abrahama yatambula Isake ku kufwa.

Hebreu 12:28

Tusakwilenu Zambi, mumu mutukatambula Wanangana uze kuushi kunyika. Tusakwilenu Zambi ni kumuwayila ni uwayilo uze unamutela, ni vumbi ni woma,

Tiangu (Jake) 2:18

Alioze, nyi umwe mamba ngwenyi: “Yena ufulielo uli nawo, ni yami nguli ni yitanga yibema,” mungukumbulula ngwami: “Ngulweze chize ufulielo we muuhasa kubwa, nyi kuushi yitanga yibema, ni yami mungukulweza ufulielo wami ku yitanga yami yibema.”

Usolwelo 19:5

Yingwivwa liji ku chitwamo cha wanangana ngwo: “Makulwana ni twanuke halisenu Zambi yetu, yenu eswe waze nwakumuvumbika, ni waze akumuvwila woma!”

1 Samuel 15:22

Samuel ngwenyi: “Chuma chika Mwene Zambi akuzanga kuhiana, kumwononokena nyi, hanji kumulambula milambu ni yawana? Kumwononokena kuchahiana kumulambula milambu ya mapanga abema kuhiana.