Ubutukilo 2:25 - Mukanda Wa Zambi 1970

²⁵ Ayo eswe aali lunga ni pwo yaabwa uselesele, alioze keevwile ko sonyi.

MUKANDA USANDU WA ZAMBI 1975

²⁵ O eswe aali apwile ni uselesele, ni lunga ni mukwo-pwo, hindu kevwile sonyi.

Ubutukilo 2:25 Iomraidhean Croise

Ubutukilo 3:7

Muze haalia shimbu lizeliene meso jo yaalaula, mba yaanyingika ngwo, kuma uselesele tuli. Kashika yaanuka mafwo a mukuyu, yaatenga mahina, yaazala.

Miaso (Masamu) 25:3

Akwa kole kaahashile kukumba yoze wakushachila hali yena, alioze waze akulimika ni yena, enoo maakumba.

Miaso (Masamu) 31:17

Mwene Zambi, ngunakutambika, kanda utayiza akwa kole kungukolesa sonyi; yingulungulu akevwe sonyi; ahole kuluu ni kupalumuka muma mwa afu.

Kutuhuka 32:25

Muze Mose hamona chize Arone atayijile atu kulifukula kuli hamba ni kulisaula ku meso ja akwa kole jo,

Izaya 44:9

Akwa kusonga mahamba kaali atu amokomoko, ni e mazambi waze akulemesa kaali amokomoko. Atu waze akuwayila mazambi waze kaali tupuputa kaanyingikine nichimwe, sonyi maakevwa.

Izaya 47:3

Atu maakakumona uselesele; maakamona chize Unevu sonyi. Mungukanukala, niumwe kechi kangukanjisa.”

Izaya 54:4

Kanda wivwa woma, kuuchi kevwa nawa sonyi; atu keechi kakulelesa nawa. Muukavulama sonyi ja ukweze we, chibwe yinyengo ya utuliwa we.

Jeremia 17:13

Mwene Zambi yena uli yoze Aisraele asa mbunge. Eswe waze akukwehuka kumeevwa sonyi. Kumaakatoka ngwe majina waze haanasoneka mu fufuta, mumu haanangwehuka, Yena Mwene Zambi, shima lia meya akekema.

Jeremia 6:15

Kevwile ko kama sonyi mumu ha yizelwokeso yize akulinga, nyi? Ka, kaajivwile ko nihakepe, nimwene te keeshi kuhasa kwivwa sonyi. Kashika muze mungukaamwesa lamba, maakalimbwoka ngwe chize amwe akwo haanalimbwoka. Lienalio mulikabwa songo lio. Yami Mwene Zambi nachamba.”

Ezekiel 16:61

Muukewuluka chize walingile, ni kwivwa sonyi muze yayenu ni mwanakwenu maakahiluka kuli yena. Mungukaapwisa ngwe ana je a mapwo, chibwe kukwabwile ko yimwe Shimbi ya Usendo wami ni yena.

Joele 2:26

Munukabwa ni yakulia yinji, munukakuta. Munukachichimieka Mwene Zambi, Zambi yenu, yoze hananulingila yikomokeso. Atu jami hikeechi kaalelesa nawa nichimwe.

Marku 8:38

Mumu yoze manguvwila sonyi, yami ni longeso liami hakachi ka atu ja mwakono, yihulia kanda yivulumunyi, yami Mwana Mutu nawa mungukamuvwila sonyi muze mungukeza mu uhenya wa Tata hamwe ni tunganda a mwilu.”

Luka 9:26

Nyi umwe manguvwila sonyi ni maliji jami, Mwana Mutu neye makamuvwila sonyi muze makeza mu uhenya wenyi, ni mu uhenya wa Tata, ni wa tunganda a mwilu a linanga.

A-ROMA 10:11

Mumu Mukanda wa Zambi unambe ngwo: “Yoze mafuliela Mwene, kechi kevwa sonyi.”