Ubutukilo 15:18 - Mukanda Wa Zambi 1970

¹⁸ Ha shimbu lizeliene Zambi yakolesa Usendo ni Abrama ngwenyi: “Ngunalakenya kuhana chifuchi chino cheswe ku vungu lie, chize ku lwiji ku njiza ya chifuchi cha Egiptu ndoo ku lwiji Ufrateze,

MUKANDA USANDU WA ZAMBI 1975

¹⁸ Ha tangwa lienalio Yehova yakolesa usendo ni Apalama ngwenyi, Chifuchi chino hinachihana ku munyachi we, chize ku lwiji wa Engitu ndo ku lwiji munene, mwe Ufrateze;

Ubutukilo 15:18 Iomraidhean Croise

Ubutukilo 12:7

Mwene Zambi yasolokela Abrama nikwamba ngwenyi: “Chino che chifuchi mungukahana kuli vungu lie.” Mba Abrama yatunga chilumbilo homa haze, mumu kwenako Mwene Zambi amusolokelele.

Ubutukilo 13:15

Chifuchi cheswe chize unamono mungukwaha cho, yena ni vungu lie, ndoo ku miaka yeswe.

Ubutukilo 2:14

Jina lia lwiji wa muchitatu Tigrise, mwenawo wabalikile ku chivumbuko cha chifuchi cha Asuria, ni wa muchiwana Ufrateze.

Ubutukilo 24:7

Mwene Zambi, Zambi ya mwilu, hananguchiza mu chifuchi cha tata ni cha usoko wami, yanguneha kuno. Yalishinga ngwenyi, makahana chifuchi chino kuli vungu liami. Mwenawo makatuma kanganda kenyi ka mwilu ha kufupila mwanami pwo.

Ubutukilo 26:4

Mungukakupwisa vungu linene, ngwe matongonoshi a mwilu. Mungukaaha chifuchi chino cheswe. Ku vungu lie mungukawahisa mavungu akwo eswe,

Ubutukilo 28:4

Akakuwahise yena ni vungu lie ngwe chize awahishile Abrahama. Akakwehe chifuchi chino cha ungeji we chize ahele Abrahama, ukatwame mo.”

Ubutukilo 35:12

Chifuchi chino nahele Abrahama ni Isake, ngunakwehe cho yena ni vungu lie lia kulutwe.”

Ubutukilo 50:24

Josefe yambila ayayo ngwenyi: “Talenu, himungufwa, alioze ngunanyingika ngwami, Zambi makanufunga ni makanutuhwisa mu chifuchi chino, makanuhilwisa mu chifuchi chize alakenyene Abrahama, ni Isake, ni Yakoba.”

2 Samuel 23:5

Chenacho Mwene Zambi makawahisa vungu liami, mumu hanakolesa Usendo wa miaka yeswe ni yami, uze kuuchi kafwa nichimwe, chilakenyo chize kuchahashile kwalumuka. Yino ye nakuzanga, che muchikabwa kukumba chami, Zambi makachitayiza chamwenemwene.

2 Samuel 8:3

Mba yakumba Hadadezere, mwana wa Rehobe, mwanangana wa mu chifuchi cha Zoba mu Siria. Yamukumba muze mwanangana Hadadezere abwile mu jila akakolese chiyulo chenyi mu chifuchi chize chasulangana ni lwiji Ufrateze ku tunda.

1 Yitanga Ya Mianangana 4:21

Solomone yayula mavungu eswe chize ku lwiji Ufrateze ndoo ku chifuchi cha Filistia, ni ndoo ku njiza ya chifuchi cha Egiptu. No yaanehenanehena Solomone milambu ni kumulingila matangwa eswe a mwono wenyi.

1 Yitanga Ya Mianangana 5:1

Hirame mwanangana wa limbo lia Tiru, yatumina mwanangana Solomone tunganda twenyi, muze evwile ngwo, hamuwayisa maji kusalakana tato. Mumu mwe Hirame te sepa lia David matangwa eswe.

1 Sango Ja Mianangana 16:16

Usendo uze akolesele ni Abrahama, chilakenyo chize alakenyene kuli Isake.

1 Sango Ja Mianangana 5:9

Yaabwa ni yimuna anji mu chifuchi cha Gileade. Kashika yaatwama mu chifuchi chize chinayi ku chivumbuko ndoo ku puya yize yinahete ku lwiji Ufrateze.

2 Sango Ja Mianangana 7:8

Mwanangana ni Aisraele eswe yaalinga chiwanyino cha Yikulika matangwa shimbiali. Kwabwile mbunga yinene ya atu, chize ku jila ya Hamate mukachi ka milundu ku norde ndoo ni ku njiza ya Egiptu ku sude.

2 Sango Ja Mianangana 8:7

Mwanangana yashinjika Akanana ku milimo ni tachi. Te kaali mavungu waze Aisraele kaashihile ko muze akumbile chifuchi. Mukachi ko wano: Ahite, ni Aamore ni Aperize, ni Ahive, ni Ajebuse. Mavungu wano kaali ndungo ndoo ni musono.

2 Sango Ja Mianangana 9:26

Yayula mianangana eswe chize ku chifuchi cha ku lwiji Ufrateze ndoo ku chifuchi cha Filistia ndoo ku njiza ya Egiptu.

Ezra 4:20

Mianangana a tachi te akuyula chifuchi chize ku chitokelo cha Ufrateze, te kaakutambula milambu ni mwombo.

Nehemia 9:8

Yiumumona ngwe kali mukwa mbunge yibema, yiukolesa nenyi Usendo. Yiumulakenya kumwaha chifuchi cha Akanana, ni cha Ahite, ni cha Aamore, ni cha Aperize, ni cha Ajebuse, ni cha Agirgashe, chikabwe chifuchi cha vungu lienyi akatwame mo. Hiwalinga nikulita ni chilakenyo che, mumu uli mukwa kushishika.

Miaso (Masamu) 105:11

Ngwenyi: “Mungukakwaha chifuchi cha Kanana, muchikabwa chihinga che.”

Kutuhuka 13:11

“Mwene Zambi makanuhetesa mu chifuchi cha Kanana, chifuchi chize alakenyene ni Shingo kuli tushakulu twenu. Muze makanwaha cho,

Kutuhuka 2:24

Neye yewuluka Usendo wenyi ni Abrahama, ni Isake, ni Yakoba,

Kutuhuka 23:23

Kanganda kami makatetekela kulutwe lie, makakutwala ku chifuchi cha Aamore, ni Ahite, ni Aperize, ni Akanana, ni Ahive, ni Ajebuse. Ni ayo mungukaashiha.

Kutuhuka 3:8

Hinahulumuka hanga ngwapulule ku moko ja akwa Egiptu, ni kwatwala mu chifuchi chinene, chibema, ni cha chinuno. Akanana, ni Ahite, ni Aamore, ni Aperize, ni Ahive, ni Ajebuse, enoo atwama mu chifuchi chize haliabwila.

Kutuhuka 32:13

Iwuluka kama tuvumbi twe, Abrahama, ni Isake, ni Israele, ni chize walishingile ni jina lie ngwe: ‘Mungukanupwisa vungu linene, ngwe matongonoshi a mwilu. Chifuchi chize naalakenyene, muchikabwa nichenu ndoo ku miaka yeswe.’ ”

Kutuhuka 34:11

Funga Shimbi jami jize ngunakwehe musono. Mungukahuma Aamore, ni Akanana, ni Ahite, ni Aperize, ni Ahive, ni Ajebuse kulutwe lie.

Kutuhuka 34:24

Kulutwe, muze hinahuma mavungu eswe ku meso je, ni muze hinatohwesa chifuchi che, mutu niumwe kechi keseka kukumba chifuchi che ha yiwanyino yino yitatu.

Kutuhuka 6:4

Nawa, yingukolesa no Usendo, yingwalakenya chifuchi cha Kanana, chifuchi chize atwamine ngwe njize.

Kutuhuka 6:8

Mungunutwala mu chifuchi chize nalakenyene Abrahama, ni Isake, ni Yakoba. Mungukanwaha cho, kumuchikabwa nichenu. Yami nguli Mwene Zambi.’ ”

Izaya 27:12

Ha tangwa lize, chize ku lwiji Ufrateze ndoo ku njiza ya chifuchi cha Egiptu, Mwene Zambi makachiza atu jenyi umuwika umuwika ngwe chize mutu akusakula mbuto ku yiswaswa.

Izaya 55:3

“Atu jami, banjikenu, tweyenu kuli yami; tweyenu kuli yami hanga nubwe ni mwono! Mungukolesa ni yenu Usendo wa miaka yeswe, ni kunuwahisa ngwe chize nalakenyene David.

Jeremia 32:22

Yiwaaha chifuchi chino cha chinuno, ngwe chize walakenyene tushakulu two.

Jeremia 32:40

Mungukakolesa no Usendo ku miaka yeswe. Chichi kalitwamina nichimwe ha kwalingila yibema, mungukaapwisa akwa kunguvwila woma ni mbunge jo jeswe, hikeechi kangwehuka nawa nichimwe.

Alevi 26:42

mungukewuluka Usendo uze nakolesele ni Yakoba ni Isake ni Abrahama ni kushindakenya chilakenyo chami ha kwaaha chifuchi.

Alevi 26:45

Mungukewuluka Usendo wami uze nakolesele ni tushakulu two muze nalwezele mavungu eswe ndundo jami ha kutuhwisa atu jami mu Egiptu, hanga yami Mwene Zambi ngubwe Zambi yo.”

Kwalula 34:5

Kwenako muyikalikonyeka ni kubalika ku chikulo cha njize ya Egiptu ni kusulila ku kalunga lwiji Mediterane.

Yilinga 7:5

Alioze kamuhele ko chihinga, chibwe haze manangika kulu lienyi. Ni mwene te kanda achibwa ni mwana, muze Zambi hamulakenya ngwenyi: ‘Mungukwaha chifuchi chino, yena ni vungu lie kulutwe.’

Shimbi 11:24

Mavu eswe kuze munukaliata maakabwa nienu. Chifuchi chenu muchikabwa chize ku puya ku sude nikuheta ndoo ku milundu ya Libano ku norde, chize nawa ku lwiji Ufrateze ku chivumbuko ndoo ku kalunga lwiji Mediterane ku chitokelo.

Shimbi 12:20

“Muze Mwene Zambi, Zambi yenu, makatohwesa chifuchi chenu, ngwe chize alakenyene, munuhasa kulia yifwo ha tangwa lize nunazange.

Shimbi 19:8

“Muze Mwene Zambi, Zambi yenu, hatohwesa chifuchi chenu, ngwe chize alakenyene tushakulu twenu, nikunwaha chifuchi cheswe ngwe chize alakenyene,

Shimbi 34:4

Mba Mwene Zambi yambila Mose ngwenyi: “Chino che chifuchi chize nalakenyene Abrahama, ni Isake, ni Yakoba ngwami, mungukachihana ku vungu lio. Hinakulweza cho chitale, alioze chichi kukutayiza kunjila mo.”

Shimbi 7:1

“Mwene Zambi, Zambi yenu, kumakanutwala ku chifuchi chize nunayi ha kuchizuka, makahanga mo mavungu anji. Makahuma mavungu shimbiali anene ni a tachi anuhiana yenu: Ahite, ni Agirgashe, ni Aamore, ni Akanana, ni Aperize, ni Ahive, ni Ajebuse.

Hebreu 13:20

Zambi hanahindwisa Mwene wetu Yesu ku kufwa. Mumu ha kufwa chenyi Yesu hanalumuka Kafunga Munene wa mapanga ku manyinga ja Usendo wa miaka yeswe. Zambi ya uhwimino anukolese ni kulinga yuma yeswe yize yinatela ha kumanununa chize anapale. Alinge muli yetu ku tachi ja Yesu Kristu chize chakumuwahila. Uhenya wa Kristu usoloke ku miaka yeswe! Chibwe kama Chenacho.

Yoshua 13:3

ni chifuchi cheswe cha Aavime mu sude. (Chifuchi cheswe chize ku lwiji Shihore, ku njiza ya Egiptu, ndoo ku njiza ya Ekrone ku norde kakuchalwila ku chifuchi cha Akanana; mianangana ja Afilistia te atwama mu membo ja Gaza, ni Ashdode, ni Ashkelone, ni Gate, ni Ekrone.)

Yoshua 15:4

yiibalika ku Azmone, yiikaula lwiji ku njiza ya Egiptu ndoo ku kalunga lwiji Mediterane, kuze kwasulila ye njiza. Te njiza ya Ayuda ku sude.

Usolwelo 9:14

Liji lize yiliambila kanganda ka mwilu wa muchisambano, yoze wabwile ni chitavwi, ngwo: “Yako utusule tunganda a mwilu awana akukasa hehi ni lwiji munene Ufrateze!”