Ubutukilo 13:7 - Mukanda Wa Zambi 1970

⁷ Tufunga twa yimuna twa Abrama ni Lote te kaakuzwela chinji. (Ha matangwa waze akwa Kanana ni akwa Perize te achili mu chifuchi chize).

MUKANDA USANDU WA ZAMBI 1975

⁷ Kwapwile kulitachika hakachi ka akwa kufunga yimuna ja Apalama ni akwa kufunga yimuna ja Lote. A-Kanana ni A-Perize achili mu chifuchi.

Ubutukilo 13:7 Iomraidhean Croise

Ubutukilo 10:19

ku njiza ja Kanana yaaheta ku limbo lia Sidone ku norde, ni ku limbo lia Gerare hehi ni limbo lia Gaza ku sude, ni membo ja Sodome, ni Gomora, ni Adma, ni Zeboime hehi ni limbo lia Lasha ku chivumbuko.

Ubutukilo 12:6

Abrama yendangana mu chifuchi chize ndoo yaheta hamwe homa ha kuwayila, ku mutondo shene, jina liawo More, mu limbo lia Shekeme. (Ha matangwa waze akwa Kanana te kwenako atwama.)

Ubutukilo 21:25

Mba Abrahama yaketeka Abimeleke ha shima lia meya lize ngamba jenyi atambwile ku tachi.

Ubutukilo 26:20

Tufunga twa Gerare yaazwelesa tufunga twa Isake ngwo: “Shima lino ni lietu.” Kashika Isake yaluka shima lize ngwenyi; Kuzwela, mumu amuzwelesele.

Ubutukilo 34:30

Yakoba yambila Simeone ni Levi ngwenyi: “Yitela nwangukokela, mungubwa ni lufuma mubi. Akanana ni Aperize kumanguvutwokela kwami. Chishi kwami ni atu anji. Nyi atu wano maalichinga ha kwiza ni kwasa jita ni yami, kumangushiha hamwe ni akwa zuwo liami eswe.”

Ubutukilo 46:34

Chanutamba kwamba ngwenu: ‘Mwanangana, chize ku ukweze wetu milimo yetu kufunga yimuna, ngwe chize te akulinga akaka.’ Nyi nwamba Chenacho mba munubwa nikutwama mu Goshene.” Chino Josefe yachamba mumu akwa Egiptu te keeshi kuzanga tufunga twa yimuna.

Nehemia 5:9

Yingwamba nawa ngwami: “Chuma chino nwakulinga hi chibema ko. Chanutamba kuvwila Zambi woma ni kulinga chibema, mba kunuchi kuhana jila kuli mavungu akwo ha kutuchoka.

Kutuhuka 2:17

Alioze amwe tufunga yeeza, yaahanga. Mba Mose yakatuka, yeza ha kwakwasa, yanwisa ye mbunga ya mapanga jo.

Yishima 20:3

Chihepuke kakuzwela nikawashi, alioze akwa mana kaakulituna cho.

Marku 3:25

Nyi akwa limwe jiko maalihandununa ene, jiko lize mulikafwa.

1 Korintu 3:3

mumu ndoo ni haliabwila nuchili ni ndako yibi ya utu. Nyi hakachi kenu nuli ni ukwa ni kulihamika, yuma ngwe yize kuyishi kulweza ngwo, kunushi ni Mwiku wa Zambi, nyi? Kuyishi kulweza ngwo, nwakwenda nikulita ni ndako yibi ya uutu, nyi?

Galashia 5:20

ni kukombelela mahamba, ni kupanda wanga, ni kole, ni Vunda, ni ukwa, ni ufwatulo, ni kulilamba ha bambo, ni kulihandununa;

Kolosu 4:5

Kanyamenu ku meso ja waze hi akwa Kristu ko nikulinga yitanga yibema matangwa eswe.

1 Tesalonika 4:12

hanga nubwe ni vumbi ku meso ja waze hi akwa Kristu ko, ni hanga kunuchi kuhona nichimwe.

Titu 3:3

Mumu ni yetu nawa, twabwile yihepuke, yihulia, akwa kupianguka. Twabwile ndungo ku usolo ubi ni ku uwahililo weka ni weka. Twabwile akwa shili ni akwa lufwachinda, ni kulivwila kole umwe ni mukwo.

Tiangu (Jake) 3:16

Kuze kuli ukwa ni kulichichimieka, kwenako nawa kuli kubinda ni ubi weswe.

Tiangu (Jake) 4:1

Kulihi kwakukatuka kulihamika ni kuzwela hakachi kenu? Yakukatuka ku usolo wenu ubi, uze wakulitachika tangwa ha tangwa mu mijimba yenu.

1 Petulu 2:12

Bwenu ni ndako yibema hakachi ka waze hi akwa Kristu ko. Nyi nwalinga chino, chibwe maanusuma mulonga ngwo: “Nwakuvulumuna”, hindu maamona yitanga yenu yibema. Kashika maakafumanyisa Zambi ha tangwa lize makeza.