Ubutukilo 1:29 - Mukanda Wa Zambi 1970

²⁹ Mba Mukulu Zambi yamba ngwenyi: “Talenu, ngunanwehe milali yeswe ya mbuto ni ya mawundu, yibwe yakulia yenu.

MUKANDA USANDU WA ZAMBI 1975

²⁹ Zambi yamba ngwenyi, Talenu hinanwaha yiputa yakwima mbuto yili hashi heswe, ni mitondo yeswe yize yikwete mihuko yakwima mbuto. Yeswe muyipwa ya kulia kuli yenu.

Ubutukilo 1:29 Iomraidhean Croise

Ubutukilo 2:16

Yambila mwe mutu ngwenyi: “Unahase kulia mihuko ya mitondo yeswe yize yili mu munda uno,

Ubutukilo 6:21

Wanda yakulia yeka ni yeka ya yena ni ya tushitu.”

Ubutukilo 9:3

Haliabwila nanwaha tushitu eswe ha kulia, ngwe chize nanuhele mafwo eka ni eka a wisu.

Jobe 36:31

Chenacho akulisa atu ni kwaha yakulia yinji.

Miaso (Masamu) 111:5

Kakulisa waze akumulemesa, mewuluka Usendo wenyi matangwa eswe.

Miaso (Masamu) 115:16

Mwilu mwambala mwa Mwene Zambi, alioze hashi yahana ho kuli atu.

Miaso (Masamu) 136:25

Kakulisa atu eswe ni tushitu eswe, zango lienyi kulishi kuhwa nichimwe.

Miaso (Masamu) 146:7

kakubatwila akwa lamba ni ululi, kakulisa akwa kuhona. Mwene Zambi kakutusula funge mu zuwo lia lamba,

Miaso (Masamu) 147:9

Kakwaha tushitu yakulia, kakulisa ana a tujila muze akwivwa zala.

Miaso (Masamu) 24:1

Hashi ni yeswe yize yiliho yili ya mbala ya Mwene Zambi; hashi ni eswe waze atwama ho kaali nienyi.

Izaya 33:16

Mba munukabwa ni uhwimino; uhwimino ngwe nwatwama mu zuwo liakukoleka. Munukabwa ni yakulia ni meya a kunwa.

Hosea 2:8

Katayijile ko ngwenyi, yami mwene namuhele mbuto, ni vinyu, ni maji a olive, ni prata, ni oru yeswe yize akuwayila nayo hamba Bale.

Mateu 6:11

Twehe kama musono yakulia yize yinalite.

Yilinga 14:17

hindu yalisolola matangwa eswe ha yiwape yize akulinga. Kakunokesa vula kwilu, kakunwaha yilimalima ku yanga yayo, kakunwaha yakulia, kakuwahisa mbunge jenu.”

Yilinga 17:28

Mumu, ‘Ku tachi jenyi tuli ni mwono, twakwendangana, chenacho tuli.’ Chili ngwe amwe akwenu, akwa kutomba miaso haanambe ngwo: ‘Ni yetu nawa tuli ana jenyi.’

1 Timoteu 4:3

Atu waze kaakukanjisa umbachiso ni kujilika kulia yuma yikwo. Alioze Zambi hanayilingi hanga atu akayilie. Akwa Kristu waze anyingika umwenemwene, maasakwila mba maayilia.

1 Timoteu 6:17

Hana Shimbi kuli waze ali ni ubite wa hano hashi ngwe, kanda alengumuka. Alweze ngwe, kanda asa mbunge jo ku ubite uze hi wamwenemwene ko. Shinoho ase mbunge jo kuli Zambi, yoze wakutwaha yuma yeswe yakulumbama, hanga tukawahilile nayo.