Nehemia 9:1 - Mukanda Wa Zambi 1970

^1-2 Ha kakweji yoze mwene ha tangwa ha makumi aali ni awana, Aisraele yaakunguluka ni kulitwamina kulia nikusolola chinyengo cha milonga yo. Te haanalihandununa kulu kuli yilambala eswe. Yaazala mianji ni kulimwangina uto ha mitwe yo nikusolola yinyengo yo. Mba yaakatuka, yaabutuka kushikisa milonga yo ni yize ya tushakulu two.

MUKANDA USANDU WA ZAMBI 1975

¹ Ha tangwa makumi aali ni liamuchiwana lia kakweji yono A-Izalele yakunguluka nikulitwamina kulia, ni chikeleyi, ni kulikwita mavu.

Nehemia 9:1 Iomraidhean Croise

2 Samuel 1:2

Muze hikwacha umwe mukweze yaheta ko, te kanakatuka ku musumba wa mwanangana Saulu. Hatanuna mahina jenyi ni kulimwangina mavu ha mutwe ni chinyengo. Yafulamana hashi ku meso ja David nikumuwayila.

2 Sango Ja Mianangana 20:3

Mwanangana yevwa woma unji, yalemba kuli Mwene Zambi hanga aakwase kama. Mba yahana Shimbi kuli atu eswe a mu chifuchi cha Yuda alitwamine kulia.

2 Sango Ja Mianangana 7:10

Ha tangwa lize liasulile ho, tangwa lia makumi aali ni lia muchitatu lia kakweji wa muchishimbiali, mwanangana yashika e atu. No yaawahilila ha yiwape yize Mwene Zambi ahanyine kuli atu jenyi Aisraele, ni kuli David, ni kuli Solomone.

Ezra 8:21

Kwenako ku lwiji Ahava, nahanyine Shimbi hanga yetu eswe tulitwamine kulia, tulikehese ku meso ja Zambi yetu, tuliumbe hanga atusongwele mu wenyi wetu ni kutufunga ni ana jetu ni ubite wetu weswe.

Ezra 8:23

Kashika twalitwaminyine kulia, yitulemba, hanga Zambi atufunge. Neye yevwa kulemba chetu.

Nehemia 8:2

Mba hako Ezra yawanda, yauneha ku meso ja atu eswe: malunga, ni mapwo, ni akweze waze haakola.

Estere 4:16

“Yako ukungulule Ayuda eswe a mu Shushane. Alitwamine kulia ni kungulembela kama. Kanda nulia chimwe Chuma hanji kunwa matangwa atatu. Ni yami ni tuvumbi twami a mapwo mutulinga nawa chizechene. Mba munguya kuli mwanangana, chibwe kuchalitele ni Shimbi. Chibwe kufwa, mungufwa.”

Estere 4:3

Mu yifuchi yeswe ya wanangana, muze heevwa Shimbi ya mwanangana, Ayuda yaalila mbimbi ni kulitwamina kulia. Anji yaazala mwanji ni kulilangumuna mu uto.

Jobe 2:12

Shimbu te achili kusuku, yaamumona, alioze kaamunyingikine ko. Muze haamunyingika, yaabutuka kulila, yaatanuna mahina jo, yaatakumuna fufuta kwilu ni ha mitwe yo ni chinyengo.

Izaya 22:12

Ha tangwa lize Mwene Zambi Mukwa Ndundo Jeswe anutambikile ni kulila, ni kulishimwoka, ni kutewula kambu jenu, ni kuzala mianji.

Joele 2:12

Mwene Zambi ngwenyi: “Chibwe chocho, alumukenu ku mbunge nuhiluke kuli yami nujile kulia, nulile ni kunenganyana.

Alevi 23:39

Muze hinwabatula mbuto mu minda yenu, nukalinga chiwanyino chino ha matangwa shimbiali. Muchikabutuka ha tangwa kumi ni lia muchitano lia kakweji wa muchishimbiali. Tangwa litangu mulikabwa tangwa lilemu lia kuhwima.

Yoshua 7:6

Mba Yoshua ni makulwana ja Aisraele yaasonya mahina jo, yaafulamana hashi kulutwe lia mushete wa Usendo wa Mwene Zambi, yaalimwangina fufuta ha mitwe ni kusolola chinyengo cho, yaahetamina hashi ndoo chingoloshi.

Usolwelo 11:3

Mungukatuma yela jami aali, kaanazala tuku. Maakahanjika munanyi ha matangwa waze kanunu ni kulakaji jaali ni makumi asambano.”

Akwa Kuyula 20:26

Mba Aisraele eswe yaaya ku Betele ni kulinyenga. Yaalila kuli Mwene Zambi, kaalile ko Chuma nichimwe ndoo ku chingoloshi. Yaalambula milambu ya kulivwa ni Zambi, ni yoocha yimwe milambu yikwo, yiiwema upu.

1 Samuel 4:12

Umwe kajita wa ku vungu lia Benjamine yakatuka ku jita, yazomboka minanga mu jila yeswe ndoo ku limbo lia Shilo tangwa lioliene, mahina jenyi akutanuna ni mavu ha mutwe.

1 Samuel 7:6

Chenacho alikungulwile eswe ku Mizpa. Yaataha meya, yaazujila hashi ku meso ja Mwene Zambi ngwe mulambu, yaalitwamina kulia ha lie tangwa lize, yaamba ngwo: “Hitwavulumuna Mwene Zambi.” (Ku Mizpa kwenako te Samuel akubatwila milonga ya Aisraele.)