Nehemia 7:2 - Mukanda Wa Zambi 1970

² Yingusa malunga aali ayule limbo lia Yerusaleme: mwanakwetu Hanani ni Hanania, mwata wa tujita a lie limbo, te mukwa ululi, kakuvwila Zambi woma kuhiana atu akwo.

MUKANDA USANDU WA ZAMBI 1975

² mba yingusela kuyula Yerusaleme mukwetu Hanani hamwe ni Hanania, nguvulu ya mbonge; mumu iye mutu wamwenemwene, wevwilile woma Zambi kuhiana akwo anji.

Nehemia 7:2 Iomraidhean Croise

Ubutukilo 42:18

Ha tangwa lia muchitatu Josefe yaamba ngwenyi: “Nakwivwila Zambi woma, nyi nunazange kubwa ni mwono, lingenu chino:

2 Samuel 23:3

Zambi ya Israele hanahanjika, kafunga ka Israele hanangwambe ngwenyi: “Mwanangana yoze wakuyula ni ululi yoze wakuyula ni kulemesa Zambi,

1 Yitanga Ya Mianangana 18:12

Muze munguya, nyi Mwiku wa Mwene Zambi muunutwala kuze Chanyingikine, muze mungumwambulwila mwanangana sango jenu, alioze kechi kunuwana, iye mangushiha. Iwulukenu ngwenu, chize ku wanuke wami nakuwayila Mwene Zambi.

1 Yitanga Ya Mianangana 18:3

Mwanangana Ahabe yatambika Obadia, mukwa lutwe wa zuwo lia mwanangana. (Obadia te kakuvwila Zambi woma.

Nehemia 1:2

Umwe mukwetu Hanani yakatuka ku chifuchi cha Yuda hamwe ni mbunga ya malunga akwo, yaanguheta. Mba yingwahula sango ja limbo lia Yerusaleme ni usoko wetu Ayuda waze atuhukile mu undungo nikuhiluka nawa ku Yerusaleme.

Nehemia 13:13

Yingutongola malunga wano ayule atu waze maaneha yuma mu yibatulo yize: hako Shelemia, ni Zadoke, longeshi wa Shimbi ya Mose, ni Kalevi Pedaya, ni Hanane, mwana wa Zakure mujikulu wa Matania, abwe chikwashi cho. Yingunyingika ngwami, malunga waze maabwa akwa kushishika ni kupangila yuma kuli akwa milimo ni akwo.

Nehemia 2:8

Yingumuhula nawa mukanda wa kuhana kuli Asafe, kafunga ka usaki wa wanangana, hanga angwehe mitondo mumu ha yajilo ya chipanga cha zuwo lia Zambi, ni chipanga cha limbo, ni zuwo lize te mungutwama. Mwanangana yangwaha yeswe yize namwichile, mumu Zambi wabwile hamwe ni yami.

Nehemia 5:15

Alioze akwa kuyula waze aliangile te kaakutambula milambu kuli atu tangwa ha tangwa ya yakulia ni vinyu ya makumi awana a mbongo ja prata. Chibwe tuvumbi two yaabinjisa atu. Alioze yami chalingile ngwe chize, mumu nevwilile Zambi woma.

Nehemia 7:3

Yingwalweza ngwami: Kanda nwazulula yajilo ya mu Yerusaleme shimbu tangwa kanda lichituhuka; ha kutoka cha tangwa nukasa yajilo chikolo muze tufunga kanda achikotoka ku milimo. Tongolenu tufunga mukachi ka atu waze atwama mu Yerusaleme, amwe afunge yihela yeka ni yeka, akwo afunge hatalanganyi ni mazuwo jo.

Jobe 1:1

Yikubwa umwe lunga wa ku chifuchi cha Uze, jina lienyi Jobe. Te mutu mubema, mukwa ululi, yoze walemesene Zambi, walifungile ku yibi.

Miaso (Masamu) 101:6

Mungutayiza atu waze akushachila hali Zambi; maahasa kutwama mu zuwo liami lia wanangana. Akwa mbunge yibema maahasa kungulingila.

Kutuhuka 18:21

Alioze tongola akwa mana, waapwise miata a tununu twa atu, ni a makulakaji, ni a makumi atano, ni a kumi. Chaatamba kubwa waze akulemesa Zambi, waze atu akusa shindakenyo, waze keeshi kulia ubite wa mbenga.

Daniel 6:4

Kashika miata waze akwo ni akwa kuyula yaafupila Daniel mulonga ku milimo yenyi ya wanangana, alioze kaauwanyine ko, mumu Daniel wabwile mukwa ululi. Kalingile ko chibi nichimwe, hanji chimwe Chuma cha uhenge.

Kwalula 12:7

Alioze ni kavumbi kami Mose hi chocho ko. Hingunamwehe yilemu yeswe ya atu jami Aisraele.

Mateu 24:45

“Iya kevwe kavumbi wakushishika kanda wakukanyama? Yoze mwata wenyi hanamwehe chiyulo cha kutetela tuvumbi akwo, a ku zuwo lienyi, yakulia ha ola yize yinalite.

Mateu 25:21

Mwata wenyi yamwamba ngwenyi: ‘Walinga kanawa, kavumbi mubema kanda wakushishika! Washishikile ha yuma yikepe, kashika mungukukunjika yuma yinji. Tweya uwahilile hamwe ni yami!’

1 Korintu 4:2

Ni mukwa kuyula chamutamba kubwa mukwa kushishika kuli mwata wenyi.

2 Timoteu 2:2

Longeso lize hiunevu kuli yami muze nalongesele ku meso ja atu anji, lilongesa kuli malunga amwenemwene waze maahasa nawa ku longesa atu akwo.