Nehemia 2:3 - Mukanda Wa Zambi 1970

³ Yingukumbulula ngwami: “Vuliemwanangana! Ngwe kuchi chichi kwivwa chinyengo nyi limbo liami, kuze afunjile tushakulu twami, haalibuzula ni ye yajilo yalio haayocha yeswe upu?”

MUKANDA USANDU WA ZAMBI 1975

³ Yingwamba kuli mwanangana ngwami, Vulie, mwanangana. Te chichi kupwa ni chinyengo ku meso, shimbu chihunda kuze kwatwama mafuka ja tulamba twami chapwa cha hululu, ni yajilo yako hiyinaweme ni kahia?

Nehemia 2:3 Iomraidhean Croise

1 Yitanga Ya Mianangana 1:31

Batsheba yafukama, yamba ngwenyi: “Vulie mwanangana! Zambi anufunge matangwa eswe!”

1 MIANANGANA 25:8

Ha mwaka kumi ni wa muchilivwa ha tangwa lia muchishimbiali lia kakweji wa muchitano wa kuyula cha mwanangana Nebukanezore mu chifuchi cha Babilonia, Nebuzaradane, mukwa kuyula wa mwanangana kanda mwata wa tujita twenyi, yanjila mu Yerusaleme.

2 Sango Ja Mianangana 21:20

Jehorame yaamupwisa mwanangana muze te habwa ni miaka makumi atatu ni yaali, yayula mu Yerusaleme miaka nake. Mutu niumwe kevwile ko chinyengo muze hafwa. Yaamufunda mu Limbo lia David, alioze hi mu mafuka ja mianangana ko.

2 Sango Ja Mianangana 28:27

Mwanangana Ahaze yafwa, yaamufunda mu Yerusaleme, alioze hi mu mafuka ja mianangana ko. Mwanenyi Hezekia yamuhinga.

2 Sango Ja Mianangana 32:33

Hezekia yafwa, yaamufunda ku tunda mu mafuka ja mianangana. Atu eswe ja Yuda ni ja Yerusaleme yaamulemesa kuhiana ha kufwa chenyi. Mwanenyi Manase yamuhinga.

2 Sango Ja Mianangana 36:19

Yocha zuwo lia Zambi ni lie limbo, ni mazuwo eswe ja mwanangana ni we ubite wamo, yabuzwola chipanga cha limbo.

Nehemia 1:3

Yaangulweza ngwo: “Masalila waze atuhukile mu undungo kaakumona lamba linji, yilambala waze akutwama hakachi ko kaakwasaula. Chikwo nawa, chipanga cha mawe cha Yerusaleme hichinabuzuka ni ye yajilo yacho hiyinaweme.”

Nehemia 2:13

Te kuchili ufuku muze natuhukile mu limbo ku chikolo cha chikulo ku chitokelo. Yinguya ku sude nikubalika shima lia Dragone ndoo ku chikolo cha Pinga. Muze te ngunayi yingutala chipanga cha limbo chize hichabuzuka ni ye yajilo yize yawemene.

Estere 8:6

Ngwe kuchi munguhasa kumona chibi chize muchiza hali atu jami? Ngwe kuchi munguhasa kulihumikiza ni kumona chize maashiha vungu liami?”

Miaso (Masamu) 102:14

Tuvumbi twe kaakuzanga limbo lia Zione chibwe haalionona; kaakulivwila keke chibwe hiliabwa likulu.

Miaso (Masamu) 102:15

Mavungu meevwila Mwene Zambi woma; mianangana eswe a hashi meevwila ndundo jenyi mwongo.

Miaso (Masamu) 137:6

Nyi chakwiwulukile, chanyongene ngwami, yena uli uwahililo wami Wahiana, chinalite limi liami lilamate lume ku kanwa liami.

Miaso (Masamu) 38:7

Ngunachikima ni kachiki, ngunambe kufwa.

Jeremia 52:12

Ha tangwa lia muchikumi lia kakweji wa muchitano wa mwaka kumi ni wa muchilivwa wa kuyula cha mwanangana Nebukanezore wa chifuchi cha Babilonia, Nebuzaradane, mukwa mana wa mwanangana kanda mwata wa tujita twenyi, yanjila mu Yerusaleme.

Lungungu 2:9

Yajilo hiyanjila hashi, ni ye yikungo yayo hiyabatwoka. Mwanangana ni e alemu haliabwila kaali mu undungo. Hikeeshi kulongesa nawa Shimbi; akwa munanyi keeshi nawa ni Usolwelo wa kuli Mwene Zambi.

Daniel 2:4

No yaakumbulula mwanangana mu arame ngwo: “Vulie mwanangana! Twawilenu mwane chilota chenu, mba mutuchilumbununa.”

Daniel 3:9

Yaalweza mwanangana Nebukanezore ngwo: “Vulie mwanangana!

Daniel 5:10

Mba mwazovu, naye ya mwanangana Belshazare, yevwa zungo lia mwanangana ni e alemu jenyi. Yeza, yanjila kwe ku chiteleka, yamba ngwenyi: “Vulie mwanangana! Twalemba mwane, kanda nulibikala ni kuhongonoka chichize.

Daniel 6:21

Daniel yamukumbulula ngwenyi: “Vulie mwanangana wami!

Daniel 6:6

Mba yaaya maha mwanangana ni kumulweza ngwo: “Vulie mwanangana Dariuse!

Alevi 26:31

mungukapwisa membo jenu ahululu, ni kwonona yilumbilo yenu. Mungukalituna milambu yenu.