Mateu 6:2 - Mukanda Wa Zambi 1970

² “Kashika, muze muuhana yawana kuli yiswale, kanda wimba chitavwi kulutwe lie ngwe chize akulinga yilembekese mu mazuwo a kuwayila ni mu majila. Kaakuchilinga hanga atu aalemese. Chamwenemwene ngunanwambulwila ngwami, haanatambula kulu fweto yo.

MUKANDA USANDU WA ZAMBI 1975

² Kashika muze muhana yawana, kanda ukemba chitavwi kulutwe lie, ngwe yilembese akulinga mu masunangonga ni mu mikombwelo, hanga akaachichimieke kuli atu. Pundu ngunambe kuli yenu ngwami, Hanatambula kwononona cho.

Mateu 6:2 Iomraidhean Croise

Miaso (Masamu) 112:9

Kakupangila yiswale yuma yenyi, kakulweza atu utu matangwa eswe; kumabwa mukwa tachi, ni atu maamusa vumbi.

Miaso (Masamu) 37:21

Chingulungulu, nyi wasondama Chuma, keshi kuchihilwisa; alioze mukwa ululi kali mukwa keke, kakuchihilwisa.

Yishima 19:17

Muze unahane kuli yiswale, chili ngwe unasondamisa kuli Mwene Zambi, neye makukundulula.

Yishima 20:6

Atu anji akuliamba ngwo: “Tuli akwa shindakenyo,” alioze iya mahasa kuwana umwe mukwa shindakenyo.

Longeshi 11:2

Tulikila mbongo je kuli akwa milimo eka ni eka, mumu kuwanyingikine chibi chize muchikabwa kulutwe hano hashi.

Izaya 10:6

Ngunatumu Asuria alimike ni vungu lize liakulelesa Zambi, atu waze haananguvwisa utenu. Ngunaatumu ni kububa ni kwaliata ngwe fufuta mu majila.”

Izaya 58:7

Tetelenu akwa zala yakulia yenu. Zumbulenu atu waze keeshi mazuwo. Jikenu yiswale, kanda nulituna kukwasa atu ni akwenu.

Izaya 9:17

Ha chino Mwene Zambi kechi kutayiza mukweze niumwe kuchina, kechi kulweza keke kuli tuliwa jo ni ana a shiwa, mumu atu eswe kaali yitanganyanyi kanda yingulungulu. Yuma yeswe yize akuhanjika yili yibi. Chibwe chocho utenu wa Mwene Zambi kuuchi kuhwa, hindu kumazoza kwoko lienyi hanga aamwese lamba.

Hosea 8:1

Mwene Zambi ngwenyi: “Humunenu chitavwi! Akwa kole kaanahulumuka ha chifuchi chami ngwe tela! Atu jami haashiha Usendo uze nakolesele no, haanakolema Shimbi jami.

Mateu 15:7

Yilembekese! Izaya kanawa ahanjikile hakutwala kuli yenu ngwenyi:

Mateu 16:3

Chichamene nwakwamba ngwenu: ‘Vula kumanoka mumu lilu linachili, linavunduka.’ Nunanyingika ha kusa yinyingi ku yuma ya mwilu, alioze kunushi mana kulumbununa yinyingi ya mwakono!

Mateu 22:18

Alioze Yesu yanyingika manyonga jo abi, yaamba ngwenyi: “Yenu yilembekese! Kuchi kevwe nunangweseka?

Mateu 23:5

Kaakulinga yitanga yo ni mazangi ku meso ja atu. Kaakukashila ha mahuma ni ha moko jo mishete ha kusamo yiitanda ya Mukanda wa Zambi. Kaakuzezumuna mahina a lubula.

Mateu 23:6

Kaakuzanga mihela ya vumbi mu yiwanyino ni yitwamo ya kulutwe mu mazuwo a kuwayila.

Mateu 24:51

Mba makamubatwila ni kumwaha Chihanda chenyi hamwe ni yilembekese. Kwenako makalila nikulicheka ku mazo.”

Mateu 5:18

Chamwenemwene ngunanwambulwila ngwami, ndoo lilu ni hashi muyikahwa, chibwe lusona umwe mukepe Wahiana wa ku Shimbi kechi kahwa nichimwe ndoo yize yeswe muyiza kubwa.

Mateu 6:16

“Muze munulitwamina kulia ha kuwayila Zambi, kanda nusoloka kubwa ni chinyengo ngwe chize akusweka yilembekese. Kaakwalumuka ku meso hanga asoloke kuli atu eswe ngwo, kaanalitwamina kulia. Chamwenemwene ngunanwambulwila ngwami, haanatambula kulu fweto yo.

Mateu 6:3

Alioze yena, muze muuhana yawana kuli yiswale, Chilinge ni mana hanga chibwe sepa lie munene kanda achinyingika.

Mateu 6:5

“Muze munulemba Zambi, kanda nubwa ngwe yilembekese. Kaakuzanga kulemba nikumana mu mazuwo a kuwayila ni ha makano ja majila hanga atu eswe aamone. Chamwenemwene ngunanwambulwila ngwami, haanatambula kulu fweto yo.

Mateu 7:5

Chilembekese! Chiza hatangu mukambo mu liso lie, mba muumona zwalala ha kuchiza koma mu liso lia mukwenu.

Marku 12:39

waze akuzanga yitwamo ya kulutwe mu mazuwo a kuwayila, ni mihela ya vumbi mu yiwanyino.

Marku 7:6

Yesu yamba ngwenyi: “Izaya kanawa ahanjikile munanyi hakutwala kuli yenu, yilembekese, ngwe chize hichinasonewa mu Mukanda wa Zambi ngwo: ‘Atu wano kaakungulemesa ni makanwa jo, alioze mbunge jo jili kusuku ni yami.

Luka 11:41

Alioze ahenu yiswale yize yili mu misenge yenu ni mu yenga yenu, mba yeswe muyinubemena.

Luka 11:43

“Lamba lienu Afariseu, mumu nawakuzanga yitwamo ya kulutwe mu mazuwo a kuwayila, nwakuzanga anumeneke ni vumbi mu yitanda!

Luka 12:33

Lanjisenu yikumba yenu, ni ahenu yiswale ubite uze munutambula. Litungilenu yibakumuna yize kuyishi kufwa. Tulikilenu ubite mwilu, muze kuuchi kahwa nichimwe, muze mwiji kechi kuhasa kunjila, chibwe ndulu kechi kuwonona.

Luka 12:56

Yilembekese! Nunahase kulumbununa kusoloka cha yuma ya mwilu ni hashi. Alioze kuchi kevwe kunwahashile kulumbununa yuma ya mwakono!”

Luka 13:15

Mwene yamukumbulula ngwenyi: “Mhmm! Yenu yilembekese! Mutu mweswe hakachi kenu kakujitula ngombe yenyi hanji chimbulu chenyi ku chililo nikumutwala ku meya ha tangwa lia kuhwima, hi chocho ko?

Luka 20:46

“Kanyaminenu alongeshi a Shimbi waze akuzanga kwendangana ni mahina a lubula, waze akuzanga atu kwameneka ni vumbi mu yitanda, waze akuzanga yitwamo ya kulutwe mu mazuwo a kuwayila ni mihela ya vumbi mu yiwanyino.

Luka 6:24

“Alioze lamba lienu yenu pichi, mumu hinunawaha kulu.

Luka 6:42

Ngwe kuchi muuhasa kwambila mukwenu ngwe: ‘Mukwetu, ngutayize nguchize kachiba mu liso lie,’ alioze kuushi kumona mukambo uze uli mu liso lia yena mwene? Chilembekese! Hatangu chiza mukambo uze uli mu liso lie, mba muumona zwalala ha kuchiza kachiba mu liso lia mukwenu.”

Yoano 13:29

Yudase te mwe wakumbata je mbongo. Kashika tumbaji amwe yaanyonga ngwo, Yesu kanazange kumwamba hanga aye ni kulanda yize anahono ha chiwanyino, hanji te kanamuhula hanga ahe yiswale yimwe yuma.)

Yoano 5:41

“Chishi kufupa lufuma wa atu,

Yoano 5:44

Nwakuzanga kulifumanyisa yenwene. Kunushi kufupa lufuma wa Zambi, mba ngwe kuchi munuhasa kufuliela?

Yoano 7:18

Mutu yoze wakuhanjika mu chiyulo chenyi mwene, kakufupa lufuma wenyi mwene. Alioze yoze Wakufupa lifuma wa yoze wamutumine, kakuhanjika umwenemwene, keshi kaliongelo.

Yilinga 10:2

Te mukwa vumbi ku meso ja Zambi. Iye ni akwa zuwo lienyi te kaakuwayila hamwe ni Ayuda. Neye te kakuhana yawana kuli Ayuda nikulemba Zambi matangwa eswe.

Yilinga 10:31

Ngwenyi: ‘Korneliu, Zambi hevwa kuliumba che, hewuluka yawana ye yize wakuhana kuli yiswale.

Yilinga 10:4

Neye yamutala ni woma, yamuhula ngwenyi: “Mwene kuchi?” Kanganda ngwenyi: “Zambi hatayiza yilemba ye ni yawana yize wakuhana kuli yiswale, hakwiwuluka.

Yilinga 11:29

Tumbaji yaalitesa ngwo, mutu ni mutu ahane nikulita ni kuhasa chenyi, ha kutumina akwa kufuliela waze atwama mu Yudea akalikwase najo.

Yilinga 24:17

“Miaka yinji yabalikile yize chabwile ko ku Yerusaleme. Mba yinguya ko nikwaha vungu liami yawana ni kulambula Zambi milambu.

Yilinga 9:36

Mu limbo lia Jope yimubwa umwe kambaji wa pwo, jina lienyi Tabita (Mu liji lia greke Dorkase, kulumbunuka ngwo, Kayi.) Te yitanga yenyi yibema, ni kakuhana yawana kuli yiswale.

A-ROMA 12:8

Yoze uli ni mana akutakamisa akwo, chamutamba kuchilinga. Yoze wakuhana yikumba yenyi, ayihane ya kulumbama. Yoze wakuyula, alihane ku kuyula. Yoze wakukwasa akwa lamba, achilinge ni chiseke.

1 Korintu 13:3

Chibwe mungupangila yuma yeswe yize nguli nayo, chibwe mungukunjika mujimba wami awoche, alioze nyi Chishi zango, yize yeswe kuyahashile kungukwasa nichimwe.

Galashia 2:10

Yaatulweza shina kwiwuluka yiswale a mu Chikungulwila cho mu limbo lia Yerusaleme. Chuma chino ni yami nasele tachi kuchilinga.

Efesu 4:28

Mutu yoze te wakwiya, alitwamine kwiya, abutuke kulinga milimo, mba mayukisa mwono wenyi ha kubwa ni yuma yinazuku ya kukwasa nayo yiswale.

1 Tesalonika 2:6

Kutwafupile kuchichimieka cha mutu niumwe, chibwe cha yenu, hanji cha atu akwo,

1 Timoteu 6:18

Alinge yibema, abwe ni yitanga yibema yakulumbama, abwe atangia yibema, akwa kulianyina.

Filemu 1:7

Mukwetu, zango lie hilinanguwahisa ni kungulembejeka, mumu hiunahuzulula mbunge ja akwa Kristu.

Hebreu 13:16

Kanda nuvulama kulinga yibema ni kulikwasa ni akwenu, mumu yino ye milambu yakubemena ku meso ja Zambi.

1 Petulu 4:11

Yoze wakulongesa, chamutamba kulongesa maliji a Zambi. Yoze wakulingila atu akwo, chamutamba kulinga ni ngolo jize akumwaha Zambi, hanga mu yuma yeswe atu achichimieke Zambi ku tachi ja Yesu Kristu. Uhenya wenyi ni ndundo jenyi yimoneke ku miaka yeswe ni miaka yeswe! Chibwe kama Chenacho.

1 Samuel 15:30

Saulu ngwenyi: “Hingunavulumuna, hindu ngulemesenu kama ku meso ja miata ja atu jami ni ku meso ja Aisraele eswe. Tuyenu kama hamuwika tukawayile Mwene Zambi, Zambi yenu.”