Marku 13:11 - Mukanda Wa Zambi 1970

¹¹ Muze maakanukwata ni kunukunjika kuli ngaji, kanda nukalibikala ha chize munukakumbulula. Munukahanjika yeswe yize makanwaha ha ola yize, mumu hi yenu ko munukahanjika, alioze Mwiku wa Linanga.

MUKANDA USANDU WA ZAMBI 1975

¹¹ Alioze muze manutwala mukunukunjika kanda nukalipikala shimbu kanda ha kutwala ku chize munukamba, chipwe kanda nukachipukuna; alioze cheswacho makanwaha ha ola yize, che chize nukachihanjike; mumu hi yenu ko nwakuhanjika, alioze Spiritu Musandu.

Marku 13:11 Iomraidhean Croise

2 Samuel 23:2

Mwiku wa Mwene Zambi wakuhanjika muli yami. Maliji jenyi kaali mu kanwa liami.

Izaya 50:4

Mwene Zambi yangulongesa chize chatamba kwamba, hanga nguhase kutakamisa akwa mulekeleke. Chichamene cheswe kakungulawisa, Hanga ngubanjike kanawa yize anangulongesa.

Mateu 10:17

Kanyamenu, mumu atu maakanukwata, maakanukunjika ku Mbunga ya Ngaji ja Ayuda, maakanulamba ni fimbo (shikote) mu mazuwo jo a kuwayila.

Marku 13:12

Asongo ni atu maakalikunjika ku kufwa. Atata maakakunjika ana jo. Ana maakakatukila yisemi, maakaashihisa.

Marku 13:9

“Alioze kanyamenu yenwene, mumu atu maakanukunjika ku Mbunga ya Ngaji ja Ayuda, maakanulamba mu mazuwo a kuwayila ja Ayuda. Munukamana ku meso ja akwa kuyula ni ku meso ja mianangana, mumu hali yami, ha kushindakenya Sango Jibema.

Luka 21:12

“Alioze shimbu yize yeswe kanda yichibwa, atu maakanukwata, maakanuhungumiona, maakanukunjika ha kunubatwila mu mazuwo ja kuwayila, maakanusa mu mazuwo a lamba, maakanuneha ku meso ja mianangana ni akwa kuyula mumu hali yami.

Yoano 3:27

Yoano yakumbulula ngwenyi: “Mutu niumwe mahasa kubwa ni chimwe Chuma, nyi kamuhele cho kwilu.

Yilinga 2:4

No eswe yaazala ni Mwiku wa Linanga, yaabutuka kuhanjika mu maliji eka ni eka ngwe chize Mwiku waahele yakuhanjika.

Yilinga 3:13

Zambi ya Abrahama, ni ya Isake, ni ya Yakoba, ni ya tushakulu twetu hanahenyesa kavumbi kenyi Yesu. Yenwene nwamukunjikile kuli mianangana, nwalitunyine ye ku meso ja Pilatu muze iye abatwile ha kumutusula,

Yilinga 4:31

Muze haalemba, muma muze akungulukile yimunyika. Ayo eswe yaazala ni Mwiku wa Linanga, mba yaabutuka kwambujola liji lia Zambi ni hamu.

Yilinga 6:10

Alioze kaahashile ko kulimika nenyi, mumu yahanjika ni mana waze amuhele Mwiku wa Linanga.

Yilinga 6:15

Eswe waze atwamine mu Mbunga ya Ngaji ja Ayuda yaahulikila Estevau (Etienne) meso, yaamona kulifwa cha meso jenyi ngwe a kanganda ka mwilu.

Yilinga 7:55

Alioze Estevau (Etienne) yazala ni Mwiku wa Linanga, yahulikila meso kwilu, yamona uhenya wa Zambi, yamona nawa Yesu te kanamana ku kwoko lia chindume lia Zambi,

1 Korintu 2:13

Kashika, muze twakulumbununa yikuma ya Zambi kuli waze akwete Mwiku wa Zambi, kutushi kulongesa nikulita ni mana ja atu, alioze nikulita ni mana ja Mwiku wa Zambi.

Efesu 3:5

Ku shakulu chijimbikilo chino kachinyingikishine ko kuli atu. Alioze haliabwila Zambi hanachisolola ku tachi ja Mwiku wa Linanga kuli tunganda twenyi a kulinanga ni akwa munanyi jenyi.

Tiangu (Jake) 1:5

Alioze, nyi umwe hakachi kenu mahona malinjekela, akete kuli Zambi. Mba Zambi mamwaho, mumu Zambi kakuhana kuli eswe ni kuvungumuna, keshi kuchoka.

1 Petulu 1:12

Alioze Zambi yasolola akwa munanyi ngwenyi, maliji waze aalwezele ha kwambujola, kaabwile ko hakutwala kuli ayo ene, alioze hakutwala kuli yenu. Mba haliabwila, sango jize hinwajitambula. Alongeshi a Sango Jibema, waze ahanjikile ku tachi ja Mwiku wa Linanga, uze watumiwine mwilu, haananulweze jo. Chibwe tunganda a mwilu kaanazange kunyingika Sango jino.