Longeshi 4:1 - Mukanda Wa Zambi 1970

¹ Mba yingutala nawa uhenge weswe wa hano hashi. Akwa lamba te kaakulila, wakuhi yoze wakwalembejeka. Niumwe kechi kwakwasa, mumu waze akwamwesa lamba kaahiana tachi.

MUKANDA USANDU WA ZAMBI 1975

¹ Mba yinguhiluka yingumona yuma yeswe ya kupinjisa kakuyilinga kushi lia tangwa. Masoji ja waze anaapinjisa ni keshi ni akwa kwalembejeka. Akwa kupinjisa o kali ni tachi hamwe no, hindu kukushi akwa kulembejeka.

Longeshi 4:1 Iomraidhean Croise

Jobe 16:4

Yenu nyi nuli ngwe yami, ni yami nguli ngwe yenu, kachi munguhasa kuhanjika ngwe chize nunahanjika yenu; kachi te munguhasa kunyikwoka mutwe, ni kunwambamba yuma yinji.

Jobe 35:9

Muze mutu akumona lamba kakuteta, kakulembejeka mutu mukwo amukwase.

Jobe 6:29

Kunahu, ngwechenu kunguketeka chamokomoko. Echenu kungubatwila, chalingile kwami chibi.

Jobe 9:24

Zambi hanakunjika akwa hashi mu chiyulo cha yingulungulu, hanapupuchiza meso ja ngaji eswe. Nyi hi iye ko, mba mukwo iya?

Miaso (Masamu) 12:5

Alioze Mwene Zambi kanambe ngwenyi: “Haliabwila mungwiza mumu ha lamba lia akwa luyinda, ni mikuma ya yiswale. Mungwiza nikwaha uhwimino uze akuzanga.”

Miaso (Masamu) 142:4

Muze ngunatale ku chindume chami, Chishi kumona niumwe yoze mangukwasa, niumwe mangufunga wakuhi, niumwe unangunyongena kama wakuhi.

Miaso (Masamu) 142:5

Mwene Zambi, ngunatete kuli yena ungukwase; yena uli kafunga kami, yena lume nakuzanga.

Miaso (Masamu) 42:3

Ufuku ni mwalwa nakuteta, masoji hanabu che kulia chami, akwa kole jami matangwa eswe kaakunguhula ngwo: “Yolihiyo mba mwe Zambi ye?”

Miaso (Masamu) 42:9

Mungwambila Zambi liwe liami ngwami: “Kuchi mba hiwanguvulama? Mumu yika nakumwena lamba ha uswii wa akwa kole jami?”

Miaso (Masamu) 69:20

Luchoko hanangulezumuna, hinalekumuka; nanyongene ngwami, atu maanguvwila kama keke, alioze Chamwene niumwe; angulembejeke kama, alioze niumwe.

Miaso (Masamu) 69:21

Muze nevwile zala, yangwaha kasashisa; muze nevwile pwila, yangwaha vinyu yisasu.

Miaso (Masamu) 80:5

Watwaha yakulia ya chinyengo, watunwisa musenge unene wa masoji.

Kutuhuka 1:16

“Muze munufungula mapwo ja Ahebreu, nyi mwana kali wa lunga, mushihenu, alioze nyi kali wa pwo, atwame ni mwono.”

Kutuhuka 1:22

Mba mwanangana yaha atu jenyi eswe Shimbi, ngwenyi: “Mweswe mwana wa lunga yoze wasemuka kuli mapwo ja Ahebreu numumbila mu lwiji Nile, alioze a mapwo nweecha ni mwono.”

Yishima 19:7

Chiswale, chibwe usoko wenyi mwene keeshi kumuzanga; ha chino hi Chuma cha kulishimwoka ko keshi kwenyi masepa. Chibwe masa tachi, kahashile kubwa no niamwe.

Yishima 28:3

Mwata yoze wakuhungumiona yiswale kali ngwe vula wa fuji yoze wakwonona mbuto.

Yishima 29:2

Muze akwa ululi akuyula, atu kaakuwahilila. Alioze muze yingulungulu akuyula atu kaakunenganyana.

Longeshi 3:16

Chikwo, hingunamono nawa hano hashi kuze chatamba kubwa ululi ni umwenemwene kwe kuli ungulungulu.

Longeshi 5:8

Kanda ukomoka nyi muumwona akwa kuyula kaanabinjisa yiswale ni keeshi kwabatwila ni ululi. Mukwa lutwe mweswe kali ni yoze mamutala, neye kali ni mukwo yoze mamutala.

Longeshi 7:7

Nyi mukwa mana malinga ni uhepuke kuli mutu mukwo, malipwisa chihepuke. Nyi muutambula mbongo ja mbenga mulibihisa yena mwene.

Longeshi 8:9

Yino yeswe nayimwene muze nanyongene yuma yize atu akulinga hano hashi, hashi haze hatwama atu amwe akwete chiyulo, ni akwo akumona lamba kuli ayo.

Izaya 5:7

Israele kaali munda wa Mwene Zambi Mukwa Ndundo Jeswe; Ayuda kaali vinyu yakutumba, Zambi yaashimbwila hanga alinge chize chinalite, alioze ayo yaashiha atu. Yaashimbwila hanga alinge yuma ya ululi alioze atu waze Aisraele haabinjisa, yaalila ha kwabatwila ni ululi.

Izaya 51:23

Mungukauhana kuli waze anubinjishile; kuli waze anubombesele hashi mu majila ni kunuliataliata ngwe nuli fufuta.”

Izaya 59:7

Matangwa eswe nwakunyonga ungulungulu; kuli yenu chili chikalu ha kuwehuka. Kunushi kuyambashana ni kumwanga manyinga ja waze keeshi yitela. Kweswako nwakuya nwakuhichika ko kwenyeka ni kwonona.

Jeremia 16:7

Niumwe kechi kulia hanji kunwa hamwe ni yoze hafwisa hanga amulembejeke, chibwe yoze hafwisa tato hanji naye.

Lungungu 1:16

“Kashika meso jami anazala ni masoji. Niumwe Unahase kungulembejeka; niumwe wakuhi Unahase kungutakamisa. Akwa kole haangukumba; atu jami keeshi nawa ni yuma.

Lungungu 1:17

“Yinguzoza moko jami, alioze niumwe kangukwashile ko. Mwene Zambi yatambika akwa kole ahamike ni yami sali ni sali; kaanangumono ngwe chimwe Chuma cha majilo.

Lungungu 1:2

Ufuku weswe te kakulila. Kakulundumuna masoji. Mukachi ka eswe waze abwile masepa jenyi, niumwe unamulembejeka kama wakuhi. Akwa kulivwa nenyi eswe yaamufwefweta, haalumuka akwa kole jenyi.

Lungungu 1:9

Mahina jenyi haabiha mumu ha yibi yenyi, alioze kasolo kunyonga ha yize muyimuwana kulutwe. Kulimbuka chenyi chabwa chikalu; niumwe kahashile ko kumulembejeka. Kanalembe ngwenyi; “Mwene Zambi, tala kama lamba liami, tala chize akwa kole jami haangukumba.”

Amose 3:10

Mwene Zambi kanambe ngwenyi: “Atu wano kaakuzalisa mazuwo jo anene anene ni yuma yize anjile ni wiji ni kulwa. Keeshi kunyingika kulinga kanawa.

Amose 3:9

Ambulwilenu waze atwama mu mazuwo ja mawanangana mu chifuchi cha Egiptu ni mu limbo lia Ashdode ngwenu: “Kungulukenu ha milundu yize yinajingilika Samaria, hanga nukevwe chizungozungo, nukamone chize akubinda.”

Malaki 2:13

Chuma chikwo nwakulinga, nwakulundumwina masoji anji ha chilumbilo cha Mwene Zambi, nwakulila ni kutwa mikuma mumu Zambi keshi kutayiza nawa milambu yize nwakulambula.

Malaki 3:18

Henaho atu jami maakamona nawa kulituchika cha akwa ululi ni yingulungulu, ni cha yoze wakungulingila ni yoze keshi kungulingila.”

Malaki 3:5

Mwene Zambi Mukwa Ndundo Jeswe kanambe ngwenyi: “Mungukasoloka mukachi kenu ni kunubatwila, mungukalimika ni akwa kupanda wanga, ni yitanji, ni akwa kulenya, ni waze akwiya fweto ya akwa milimo, ni waze akubinjisa mapwo waze haanafwisa malunga ni ana a shiwa ni yilambala, eswe waze keeshi kungulemesa.

Mateu 26:56

Alioze yino yeswe hiyabwa hanga yikamanunune maliji ja akwa munanyi waze asonekene mu Mukanda wa Zambi.” Shimbu lizeliene, tumbaji eswe yaamwehuka, yaachina kwo.

Shimbi 28:33

Limwe vungu lia yilambala maakambata mbuto jenu jeswe jize nwahondanganyine hanga yitatuke, alioze kunuchi katambula ko Chuma nichimwe. Makanumwesa lamba ni kunulinga chibi kuhiana.

Shimbi 28:48

Kashika, munukalingila akwa kole jenu waze Mwene Zambi makatuma ha kulimika ni yenu. Munukabwa ni zala, ni pwila, ni uvu, ni munukahona yuma yeswe. Mwene Zambi makanubinjisa ni lamba linji ndoo munukanonga.

Tiangu (Jake) 5:4

Kunwafwetele fweto ya waze akunulimina minda yenu. Ivwenu kunenganyana cho! Malilo ja waze akuhela mihuko yenu haaneza ndoo ku matwi ja Zambi, Mwene Mukwa Ndundo Jeswe!

Akwa Kuyula 4:3

Jabine te kakwete matemba a jita a utale 900, yayula Aisraele ni uswii ni kwamwesa lamba miaka makumi aali. Mba Aisraele yaakololoka kuli Mwene Zambi aakwase.