Joele 2:32 - Mukanda Wa Zambi 1970

³² Alioze eswe waze maakalemba Mwene Zambi, kumakaalamwina. Ngwe chize Mwene hanambe ngwenyi: ‘Amwe mukachi ka Yerusaleme kumaakachina; waze natongwele kumaasala ni mwono.’ ”

MUKANDA USANDU WA ZAMBI 1975

³² Mba mweswe masanyika ha jina lia Yehova kumakamupulula. Mumu mu mulundu wa Zaione ni mu Yerusaleme kumukukapwa waze maapulula, chizechene ngwe Yehova ha nambe. Hakachi ka kuputuka kumuhakapwa waze a kusanyika kuli Yehova.

Joele 2:32 Iomraidhean Croise

Ubutukilo 4:26

Sete yasema mwana wa lunga, yamuluka jina ngwenyi, Enoshe. Ha matangwa waze atu yaabutuka kuvuluka jina lia Mwene Zambi mu kuwayila cho.

Miaso (Masamu) 50:15

Ngutambikenu ha tangwa lia lamba; mungunupulula, mba mununguchichimieka.”

Izaya 10:22

Chibwe Aisraele oke naye haliabwila ngwe masekeseke a ku mbumbulu ya kalunga lwiji, hindu akepe maakahiluka. Maakashiha anji nikulita ni yitanga yo yibi.

Izaya 11:11

Muze lie tangwa mulikaheta, Mwene Zambi makalinga ni mana ni ndundo jenyi akahilwise atu jenyi waze asalile mu chifuchi cha Asuria, ni Egiptu, ni Patrose, ni Sudane, ni Elame, ni Babilonia, ni mu limbo lia Hamate, ni mu yifuchi ya ku mbumbulu ya tulunga lwiji ni ha mahongo.

Izaya 11:16

Mukukabwa chikoka chize muchikakatuka ku Asuria muze atu jenyi waze maakasala mu undungo akaye mo, ngwe chize chabwile muze tushakulu two atuhukile mu Egiptu.

Izaya 4:2

Matangwa maakeza waze Mwene Zambi makatatwisa yibuta ni mitondo yeswe ya mu chifuchi, yinene ni yibema. Masalila ja Israele maakawahilila ni mbuto jeswe ja mu chifuchi.

Izaya 46:13

Nakuneha tangwa lia kukumba, kulishi kusuku. Kukumba chami kuchichi kuvumewa. Mungukalamwina akwa Yerusaleme ni kulemesa Aisraele.”

Jeremia 31:7

Mwene Zambi kanambe ngwenyi: “Embilenu Aisraele ni uwahililo, vungu linene liahiana. Embenu mwaso wenu wa kuchichimieka ngwenu: ‘Mwene Zambi halamwina atu jenyi; halamwina masalila eswe.’

Jeremia 33:3

“Ngutambikenu mba mungunukumbulula ni kunulweza yuma ya kukomwesa ni ya kusweka, yize kuwayinyingikine.

Amose 9:8

Ewa, nakuhulikila meso ku wanangana uno ubi wa Israele, mungukawonona. Alioze chichi kwonona vungu lia Yakoba.

Obadia 1:17

“Ha mulundu wa Zione amwe kumaachina, muhabwa homa ha chijila. Alioze vungu lia Yakoba kumaazuka chifuchi cho cha chilakenyo.

Obadia 1:21

Akwa kukumba a mu Yerusaleme kumaalwa vungu lia Edome ni kwayula. Mba Mwene Zambi iye mwene mabwa mwanangana.”

Mika 5:3

Mwene Zambi makakunjika atu jenyi mu moko ja akwa kole jo ndoo ni kuze semi makasema mwanenyi wa lunga. Hohene usoko wenyi, waze te atwama mu chifuchi cha mbala mu undungo maakakunguluka nawa hamwe ni atu jo ene.

Zakaria 13:9

Mbunga ya muchitatu yize muyikasala mungukaabemesa mu kahia. Mungukaabemesa ngwe oru yize haabemesa mu kahia. Mba maakalemba kuli yami, ni yami mungukaakumbulula. Mungukaamba ngwami, nuli atu jami. No maakashikisa shili yo nikwamba ngwo, nguli Zambi yo.”

Yoano 10:16

Mapanga akwo nguli no waze keeshi mu tanga lino. Changutamba kwaneha nawa. Maakevwa liji liami, mba maakabwa chendo chimuwika ni kafunga umuwika.

Yoano 4:22

Yenu Asamaria kunwanyingikine chize nwakuwayila. Yetu Ayuda tunanyingika chize twakuwayila, mumu ulamwino wa kuli Ayuda.

Yilinga 15:17

hanga atu eswe akafupe Mwene Zambi, ni hanga mavungu eswe waze natambikile akabwe ni ami.

Yilinga 2:39

Mumu chilakenyo chino chili cha yenu, ni cha ana jenu, ni cha eswe waze ali kusuku, ni cha eswe waze Mwene Zambi yetu hanaatambika iye mwene.”

A-ROMA 11:26

Chenacho Aisraele eswe makaalamwina. Ngwe hichinasonewa mu Mukanda wa Zambi ngwo: “Chilamwina makakatuka ku limbo lia Zione, makachiza utanganyanyi weswe wa vungu lia Yakoba.

A-ROMA 11:5

Chimuwika nawa ni haliabwila. Atu amwe aliko waze Zambi atongwele mu utu wenyi.

A-ROMA 11:7

Mba twambe kuchi? Ngwetu: Aisraele kaazukile ko yize afupile. Shina waze atongwele Zambi, enoo ayizukile. Akwo yaalumuka akalu.

A-ROMA 9:24

Mumu tuli waze hanaatambika, hi hakachi ka Ayuda wika ko, alioze nawa hakachi ka mavungu akwo.

A-ROMA 9:27

Izaya kanakololoka hakutwala kuli Aisraele ngwenyi: “Chibwe Aisraele ahiana naye kwoka ngwe masekeseke a ku kalunga lwiji, shina akepe hakachi ko makaalamwina.

1 Korintu 1:2

Tunanumeneka akwa Chikungulwila cha Zambi mu limbo lia Korintu. Zambi hananutambika ha kubwa akwa kulinanga. Nwakuliendela hamwe nenyi mu kulinunga ni Kristu Yesu. Tunameneka nawa eswe a kuma kweswe waze akuwayila Zambi mu jina lia Mwene Yesu Kristu, Mwene wo kanda niwetu.

Hebreu 12:22

Alioze yenu hinunahete ku Mulundu wa Zione ni ku limbo lia Zambi ya mwono, Yerusaleme wa mwilu, ni yizavu yalio ya tunganda a mwilu.