Jeremia 8:2 - Mukanda Wa Zambi 1970

² Yifwaha yize keechi kayikunga ni kuyifunda, alioze muyikabwa ngwe pinga. Kumaakayimwanga kulutwe lia tangwa ni kakweji, ni matongonoshi, yuma yino te atu akuzanga kulingila, ni kuyivulwoka ni kuyikombelela.

MUKANDA USANDU WA ZAMBI 1975

² Mayimwanga kumeso ja tangwa ni kakweji ni mbunga yeswe ya mwilu, aze azangile nikwalingila, nikwakaula, nikwafupa, nikwawayila. Kechi kayikungulula chipwe kuyifunda. Kumuyikapwa ngwe wilo ha mavu.

Jeremia 8:2 Iomraidhean Croise

1 MIANANGANA 17:16

Yaakolema Shimbi jeswe ja Mwene Zambi, Zambi yo, yaafula makuji a ngombe aali akaawayile, yaafula nawa hamba wa pwo Ashera, yaawayila matongonoshi a mwilu, yaalingila zambi Bale.

1 MIANANGANA 21:3

Yatungulula yilumbilo ha milundu haze te atu akuwayila mazambi eka yize tato Hezekia abuzwile. Yatunga yilumbilo ya kuwayila zambi Bale, yalinga tuponya twa zambi wa pwo Ashera, ngwe chize alingile mwanangana wa Israele Ahabe. Manase yawayila nawa matongonoshi.

1 MIANANGANA 21:5

Mu maaze aali a zuwo lia Mwene Zambi yatunga mo yilumbilo ya kuwayila matongonoshi.

1 MIANANGANA 23:5

Hohene mwanangana yachiza ku milimo mahako waze mianangana ja Yuda asele akalambule milambu ha yilumbilo ya mahamba mu membo ja mu Yuda, ni hehi ni Yerusaleme. Yachiza mahako eswe waze te akulambula milambu kuli Bale, ni ku tangwa, ni ku kakweji, ni ku matongonoshi anene ni akepe.

Miaso (Masamu) 53:5

Alioze kumaakevwa mwongo kuhiana, uze kanda achivwa kama nilimwe tangwa, mumu Zambi kumakamwanga yifwaha ya akwa kole ja atu jenyi Zambi halitunoo, kashika Aisraele maakumba liakulu.

Miaso (Masamu) 83:10

Waakumbile ku limbo lia Endore, mijimba yo yiibolela ko.

Miaso (Masamu) 83:11

Miata jo a tujita alinge ngwe chize walingile mianangana Orebe ni Zebe; akwa kuyula jo eswe alinge ngwe chize walingile Zeba ni Zalmuna;

Longeshi 6:3

Mutu mahasa kusema kulakaji lia ana ni kutwama ni mwono miaka yinji, alioze chibwe atwame miaka yinji, nyi keshi ni chiseke, nawa nyi ha kufwa chenyi atu kaamufunjile kanawa, ngunambe ngwami, mwana wa kuselumuna kawaha kuhiana mutu yoze.

Jeremia 14:16

Atu waze akubanjika longeso lio no che maakafwa. Maambila mu majila a Yerusaleme, niumwe yoze maafunda. Chenacho mungulinga ayo eswe, ni mapwo jo, ni ana jo a malunga ni a mapwo. Mungwalinga nikulita ni ungulungulu wo.”

Jeremia 16:11

Mba muwakumbulula ngwe, Mwene Zambi kanambe ngwenyi: ‘Tushakulu twenu angumbile nyima, yaakombelela mahamba ni kwalingila, yaangwehuka ni kulituna longeso liami.

Jeremia 16:4

Kumaafwa ni musongo ubi, mutu niumwe kechi kwalila hanji kwafunda. Mijimba yo maayilumbika yingina hashi ngwe pinga. Kumaafwa ni jita ni zala; mijimba yo muyibwa kulia cha tujila ni tushitu a mu yambu.

Jeremia 16:6

Pichi ni yiswale kumaafwa mu chifuchi chino, alioze niumwe maalila hanji kwafunda. Niumwe malilemeka hanji kulitewula kawewe ni kusoloka ngwo, kanafwisa.

Jeremia 19:13

Mazuwo ja Yerusaleme ni ja Ayuda, ni mazuwo eswe haze akwochela yitumbo ya vumba libema ku matongonoshi ni haze akuzujila vinyu ya milambu kuli mazambi eka, ayo eswe kumaakabwa ngwe Tofete.”

Jeremia 22:19

Muze hafwa maamufunda ngwe chimbulu, maamukokela haze ni kumumbila ku yikolo ya Yerusaleme.”

Jeremia 25:33

Ha tangwa lize afu waze Mwene Zambi haashiha kumaakabomba hashi heswe chize ku songo limwe ndoo ku songo likwo. Niumwe kechi kaalila, chibwe kwafunda. Kumakalumbama hashi ngwe milumba ya bolela.

Jeremia 31:40

Chikulo cheswe kuze akufunda afu ni kumbila ko yiswaswa, ni minda yeswe ya ku tunda ya chitwetwe cha Kidrone ndoo ni ku chikolo cha Kavwalu ku chivumbuko, muchikabwa cha chijila. Limbo kechi kalibuzula nawa hanji kulionona.”

Jeremia 36:30

Kashika haliabwila, yami Mwene Zambi, ngunambe ngwami, mwanangana Jehoakime, mukwa vungu lie niumwe kechi kayula akwa wanangana wa David. Muze hiwafwa keechi kakufunda, alioze maakakumbila haze ha chivukuminya cha mwalwa ni chishika cha ufuku.

Jeremia 9:20

Yingwamba ngwami: “Yenu mapwo, banjikenu kuli Mwene Zambi, kanyamenu ku maliji jenyi. Longesenu ana jenu a mapwo kulila mbimbi, ni masepa jenu kwimba miaso yakulinyenga nayo.

Jeremia 9:21

Kufwa hichanjila mu tupenda twetu, hichanjila mu mazuwo jetu a wanangana: hichashiha ana mu majila, ni hichashiha akweze ku makano.

Jeremia 9:22

Mijimba ya afu haayimwangina kweswe, ngwe milumba ya pinga mu minda, ngwe chize mbuto yakuholoka muze anayibatula, mbuto yize niumwe mahasa kuyikunga. Mwene Zambi yangulweza ngwambe yino yuma.”

Ezekiel 29:5

Mungukanumbila mu puya. Mijimba yenu muyikabolela mwe mu puya. Munukabwa yakulia ya tushitu ni tujila.

Ezekiel 39:5

Kumaakafwila mu yambu. Yami Mwene Zambi nachamba.

Ezekiel 6:5

Mungukamwangina afu ja Aisraele, mungukajingilika yifwaha yo ku yilumbilo yo.

Ezekiel 8:16

Mba yangutwala ku yiize ya muchima ya zuwo lia Zambi. Hehi ni lie zuwo lia kuwayila, mukachi ka chilumbilo ni jila kwabwile malunga makumi aali ni atano. Kaanombu manyima jo kwe ku zuwo lia kuwayila, kaanafukama ni kutalikisa ku chivumbuko, kaanawayila tangwa.

Zefania 1:17

Mwene Zambi kanambe ngwenyi: “Mungutuma lamba lieka ni lieka hali akwa hashi, mba mutu mweswe mapapata ngwe kapuputa. Haanguvulumuna, kashika manyinga jo maamwangana ngwe meya, ni mijimba yo muyikupuka vumba libi.”

Zefania 1:5

Mungunongesa mweswawo wakunyina ha fulumba ni kuwayila tangwa, ni kakweji, ni matongonoshi. Mungunongesa waze akunguwayila ni kulishinga ni jina liami, alioze kuma kaakulishinga nawa mu jina lia zambi Milkome.

Yilinga 7:42

Alioze Zambi yoomba nyima, yaatayiza kuwayila matongonoshi a mwilu, ngwe hichinasonewa mu mukanda wa akwa munanyi ja Zambi ngwo: ‘Yenu Aisraele, yitapo ni milambu yize nwalambwile miaka makumi awana mu puya, kuli yami nwayilambwile, nyi?

Shimbi 17:3

ha kuwayila ni kulingila mazambi akwo, hanji tangwa, chibwe kakweji, hanji matongonoshi, havulumuna Shimbi ya Mwene Zambi.

Shimbi 4:19

Kanda akanweseka ha kuwayila Chuma chize nunamono mwilu: tangwa hanji kakweji, hanji matongonoshi. Mumu Mwene Zambi, Zambi yenu, hanahana yino yuma yeswe kuli mavungu akwo ha kuyiwayila.