Jeremia 7:6 - Mukanda Wa Zambi 1970

⁶ Litwaminenu kulakila yilambala, ni shiwa, ni waze haanafwisa malunga. Litwaminenu kushiha atu waze keeshi milonga mu chifuchi. Litwaminenu kuwayila mazambi eka. Nyi ka, munukafwa.

MUKANDA USANDU WA ZAMBI 1975

⁶ nyi kunuchi kupinjisa chilambala hanji mwana-shiwa, hanji tuliwa, kunuchi kumwanga muma muno manyinga keshi chitela, nyi kunuchi kukaula mazambi akwo kulilemeko no,

Jeremia 7:6 Iomraidhean Croise

1 MIANANGANA 21:6

Yalambula mwanenyi wa lunga mulambu wa kwocha. Yataha ngombo, yapanda wanga, yalinga tufutafuta. Yavulumuna Mwene Zambi kuhiana, yamuvwisa ufwatulo.

1 MIANANGANA 24:4

Chibichibi mumu washihile atu anji waze te keeshi yitela. Mwene Zambi te kahashile kumukonekena Chuma chize.

Miaso (Masamu) 106:38

Yaashiha ana waze te keeshi kwo yitela; chenacho abihishile chifuchi cho.

Yishima 23:10

Kanda ututulula chinyingi cha njiza yikulu, hanji kutambula chifuchi cha mbala cha shiwa.

Izaya 59:7

Matangwa eswe nwakunyonga ungulungulu; kuli yenu chili chikalu ha kuwehuka. Kunushi kuyambashana ni kumwanga manyinga ja waze keeshi yitela. Kweswako nwakuya nwakuhichika ko kwenyeka ni kwonona.

Jeremia 13:10

Yingulungulu wano kaangwononokenene ko. Te kaali akwa pami lume. Yaawayila nikulingila mazambi akwo. Kashika maakabwa ngwe kaputula yoze wamokomoko.

Jeremia 19:4

Munguchilinga mumu atu haangwehuka ni haanabihisa homa hano ni kulambula mulambu kuli mazambi eka; mazambi waze te kaanyingikine ko, chibwe ayo, chibwe tushakulu two, chibwe mianangana ja Ayuda. Haanazalisa homa hano ni manyinga ja atu waze keeshi mulonga,

Jeremia 2:30

Hingunakumwesa lamba, hindu ngwe Chuma chamokomoko, kuushi kuzanga ngukufumbe. Hiunashihi akwa munanyi je ngwe chize akulinga tambwe.

Jeremia 2:34

Chikwo nawa, mahina jenu haasapukila manyinga ja yiswale ni waze keeshi yitela, hi manyinga ja akwa kulokola mazuwo ko.

Jeremia 26:15

Alioze nyingikenu ngwenu, nyi nwangushiha yenu ni akwa limbo lino munubwa ni uhiso wa kushiha mutu yoze keshi mulonga, mumu Mwene Zambi mwe unakangutuma kunukanyamisa.”

Jeremia 26:23

Yaamuhilwisa kuli mwanangana Jehoakime. Neye yamushiha, yamumbila mu mafuka.)

Jeremia 35:15

Matangwa eswe te nakunutumina tuvumbi twami akwa munanyi. No yaanulweza nwehuke ndako jenu jibi ni kulinga yize yinalite. Haananukanyamisa kulitwamina kuwayila ni kulingila mazambi eka, hanga nutwame miaka yinji mu chifuchi chize hingunanwehe yenu ni tushakulu twenu. Alioze kunwangwivilile ko, kunwangubanjikile ko.

Jeremia 5:28

kashika haatohwa ni haabema. Yitanga yo yili lume yibi. Keeshi kulingila ana a shiwa yibema, chibwe kubatwila akwa lamba ni ululi.

Jeremia 7:5

“Alumukenu ku mbunge, litwaminenu ndako jenu jibi. Lilingenu yibema umwe ni mukwo.

Jeremia 7:9

Nwakwiya, nwakushiha, nwakulinga utanji, nwakulishinga ni mahuza, nwakulambula milambu kuli hamba Bale, nwakuwayila mazambi waze te kunwanyingikine.

Lungungu 4:13

Alioze chino chabwile mumu akwa munanyi jenyi yaavulumuna, ni mahako jenyi yaashihisa waze te keeshi yitela.

Ezekiel 18:6

Keshi kukombelela mahamba ja Aisraele, chibwe kulia yakulia yize haala mbula ku mahamba ha milundu. Keshi kulimona ni pwo lia mbala hanji kulimona ni pwo yoze uli ku zuwo likwo.

Ezekiel 22:7

Niumwe mu limbo wakulemesa yisemi jenyi. Nwakwonga yilambala, nwakwiya yuma ya ana a shiwa ni mapwo waze haanafwisa malunga.

Alevi 19:33

“Kanda nuhungumiona yilambala waze ali mu chifuchi chenu.

Alevi 25:17

Kanda nulilaka yenwene, alioze vwilenu Mwene Zambi, Zambi yenu woma.

Malaki 3:5

Mwene Zambi Mukwa Ndundo Jeswe kanambe ngwenyi: “Mungukasoloka mukachi kenu ni kunubatwila, mungukalimika ni akwa kupanda wanga, ni yitanji, ni akwa kulenya, ni waze akwiya fweto ya akwa milimo, ni waze akubinjisa mapwo waze haanafwisa malunga ni ana a shiwa ni yilambala, eswe waze keeshi kungulemesa.

Mateu 27:25

Atu eswe yaakumbulula ngwo: “Uhiso ubwe wa yetu ni ana jetu!”

Mateu 27:4

yamba ngwenyi: “Hinavulumuna ni kukunjika yoze keshi chitela cha kufwa.” Alioze yaamukumbulula ngwo: “Mba ayo milonga yetu, nyi? Ayize yinakutale yena mwene!”

Shimbi 11:28

alioze Shingo, nyi munukolema Shimbi jino, nyi munutewuluka nawa ni kuwayila mazambi akwo waze te kanda nuchiwayila kama nilimwe tangwa.

Shimbi 24:17

“Kanda nuhengesa ubatwilo wa yilambala ni wa shiwa. Kanda nukanda hina ngwe chifungo kuli pwo yoze haanafwisa lunga.

Shimbi 27:19

“ ‘Mwene Zambi akashinge yoze mahengesa ubatwilo wa yilambala, ni shiwa, ni mapwo waze haanafwisa malunga.’ “Atu eswe maakatayiza ngwo: ‘Chibwe kama Chenacho!’

Shimbi 8:19

Kanda nuvulama nichimwe Mwene Zambi, Zambi yenu, nikutewulukila kuli mazambi eka ni kwawayila ni kwalingila. Ngwamie, nyi nwachilinga, chamwenemwene munukanonga.

Tiangu (Jake) 1:27

Uwayilo Ubema ni wamwenemwene ku meso ja Tata Zambi wenau au: kukwasa ana a shiwa ni mapwo waze haanafwisa malunga mu lamba lio, ni kulifunga ku yibi ya hano hashi.