Jeremia 23:3 - Mukanda Wa Zambi 1970

³ Atu jami waze asala ku yifuchi yize hingunamwangina mungwakungulula, mungwahilwisa ku chifuchi cho. Maakasema ana anji, kumaakaliokesa.

MUKANDA USANDU WA ZAMBI 1975

³ Henaho mungukonga masalila ja mapanga jami ku yifuchi yeswe kuze hinaahumina. Mungwaneha nawa ku limba lio mba masema ni kuliokesa.

Jeremia 23:3 Iomraidhean Croise

Miaso (Masamu) 106:47

Mwene Zambi, Zambi yetu, tulamwine, tuchize kama hakachi ka mavungu akwo. Mba utuhilwise mu chifuchi chetu, tusakwilile ni kufumanyisa jina lie.

Jeremia 16:15

Alioze maalishinga ni jina lia Zambi ya mwono yoze watuhwishile Aisraele mu chifuchi cha ku norde ni mu yifuchi yeswe yikwo kuze naamwanginyine. Mungwahilwisa mu chifuchi cho ene, chize nahanyine kuli tushakulu two. Yami, Mwene Zambi, nachamba.”

Jeremia 29:14

Ewa, ngunambe ngwami, munukanguwana, ni yami mungukanuhilwisa mu chifuchi chenu. Mungukanukungulula mu yifuchi kweswako hingunanumwangina, ni kunuhilwisa ku chifuchi chenu. Yami Mwene Zambi nachamba.’

Jeremia 30:10

“Yenu atu jami, kanda nwivwa woma; yenu Aisraele, kanda nwivwa mwongo. Mungukanulamwina ku chifuchi chisuku, kuze nuli funge. Munukahiluka ku mahienu ni kubwa mu uhwimino; munukabwa ni sambukila, niumwe kechi kanuvwisa nawa woma.

Jeremia 30:3

mumu tangwa kulineza lize mungukahilwisa atu jami, Aisraele ni Ayuda. Mungukaaneha mu chifuchi chize nahanyine kuli tushakulu two, mba maakazuka nawa chihinga cho. Yami, Mwene Zambi, nachamba.”

Jeremia 31:7

Mwene Zambi kanambe ngwenyi: “Embilenu Aisraele ni uwahililo, vungu linene liahiana. Embenu mwaso wenu wa kuchichimieka ngwenu: ‘Mwene Zambi halamwina atu jenyi; halamwina masalila eswe.’

Jeremia 31:8

Mungukaachiza ku chifuchi cha ku norde, ni kwakungulwila ku masongo a hashi. Hakachi ko, tupuputa, ni yilema, ni tufumbakaji, ni waze ali ni misongo ya kusema, maahiluka mu mbunga yinene.

Jeremia 32:37

mungukakungulula atu chize kuze naamwanginyine ni ufwatulo ni utenu. Mungukaahilwisa mu chifuchi chino hanga abwe mu uhwimino.

Jeremia 46:27

“Yenu atu jami, kanda nwivwa woma; yenu Aisraele, kanda nwivwa mwongo. Mungukanulamwina mu chifuchi kusuku, kuze nuli funge. Munukahiluka ku mahienu ni kubwa mu uhwimino; munukabwa ni sambukila, niumwe kechi kanuvwisa nawa woma.

Jeremia 50:19

Mungukahilwisa Aisraele mu chifuchi cho. Kumaakalia yakulia ya ku mulundu wa Karmele ni ya mu chifuchi cha Bashane. Kumaakalia yeswe yize anazange ya mu yifuchi ya Efraime ni Gileade.

Jeremia 8:3

Atu a vungu lino libi waze maakasala ko, waze atwama kuma kuze naamwanginyine, maakazanga kufwa. Yami Mwene Zambi Mukwa Ndundo Jeswe nachamba.”

Ezekiel 11:17

“Kashika alweze chize yami Mwene Zambi ngunambe. Mungukaachiza ku yifuchi kuze naamwanginyine, ni kwahilwisa nawa mu chifuchi cha Israele.

Ezekiel 36:11

Atu ni tushitu mungukookesa. Kumunukabwa anji kuhiana hatangu, munukabwa ni ana anji. Mungukatayiza kutwama mo ngwe ku shakulu ni kunuyukisa kuhiana hatangu. Mba munukanyingika ngwenu, yami nguli Mwene Zambi.

Ezekiel 36:24

Mungukanuchiza hakachi ka mavungu eswe ni mu yifuchi yeswe ni kunuhilwisa mu chifuchi chenu.

Ezekiel 36:37

Mwene Zambi kanambe ngwenyi: “Mungukatayiza Aisraele kunguhula nawa ngwakwase, mungukookesa ngwe mbunga ya mapanga.

Alevi 26:9

Mungukanuwahisa ni ana anji, mungukafunga Usendo wami uze nakolesele ni yenu.

Mika 2:12

“Alioze yami mungunukungulula hamuwika, yenu Aisraele eswe hinwasala. Mungunukungulula ngwe chize akuutama mapanga waze anahiluka ku matanga jo. Ngwe chize chililo chakuzala ni mapanga, Chenacho chifuchi chenu muchizala nawa ni atu.”

Mika 7:12

Atu je maakakatuka ku yifuchi yeswe, ku Asuria ku chivumbuko, ni ku Egiptu ku sude, ni ku chifuchi hehi ni lwiji Ufrateze, ni ku kalunga lwiji ni milundu kusuku; maakahiluka ku mahio.