Jeremia 22:3 - Mukanda Wa Zambi 1970

³ “Yami, Mwene Zambi, ngunanwambe ngwami, lingenu ni ululi ni chize chinalite. Nyi atu anambe kutambula yuma ya mbala ni uhenge, mukwasenu. Kanda nulinga ni uhenge hanji kubinjisa tundaka, ni ana a shiwa, ni mapwo waze haanafwisa malunga; kanda nushiha atu waze keeshi mulonga homa hano ha chijila.

MUKANDA USANDU WA ZAMBI 1975

³ Yehova kanambe ngwenyi, Patulenu nikulita; lingenu ululi, pululenu ku kwoko lia mukwa kupinjisa yoze hamwiya. Kanda nulinga uhenge hanji upupilo kuli chilambala, hanji mwana-shiwa, hanji tuliwa, kanda numwanga muma muno manyinga ja waze keshi chitela.

Jeremia 22:3 Iomraidhean Croise

2 Samuel 23:3

Zambi ya Israele hanahanjika, kafunga ka Israele hanangwambe ngwenyi: “Mwanangana yoze wakuyula ni ululi yoze wakuyula ni kulemesa Zambi,

1 MIANANGANA 24:4

Chibichibi mumu washihile atu anji waze te keeshi yitela. Mwene Zambi te kahashile kumukonekena Chuma chize.

Jobe 22:9

Hiunalitunu kukwasa twamishi waze haanafwisa malunga jo, hiunatambula yuma ya ana a shiwa, hiunaamwesa lamba.

Jobe 24:9

Yingulungulu kaakuchangumuna mwana, yoze keshi tato, ku liele lia naye; kaakukwata mwana wa chiswale mumu ha kongo.

Miaso (Masamu) 68:5

Zambi yoze watwama mu zuwo lienyi lia chijila; kakutala ana a shiwa, kakufunga mapwo waze haanafwisa malunga.

Miaso (Masamu) 82:4

Alamwinenu mu moko ja yingulungulu!

Miaso (Masamu) 94:21

Kaakutwama akwa ululi punga kaakwabatwila akafwe.

Miaso (Masamu) 94:6

Kaakushiha mapwo waze haafwisa malunga ni ana a shiwa, ni yilambala waze atwama mu chifuchi chetu.

Kutuhuka 22:21

“Chilambala kanda numulinga chibi, hanji kumuhungumiona, mumu ni yenu nawa nwabwile yilambala mu chifuchi cha Egiptu.

Kutuhuka 22:22

Kanda numwesa lamba pwo yoze hafwisa lunga, hanji mwana shiwa.

Yishima 23:10

Kanda ututulula chinyingi cha njiza yikulu, hanji kutambula chifuchi cha mbala cha shiwa.

Izaya 1:23

Miata jenu kaali yihulia ni masepa jo eji; matangwa eswe kaakutambula yawana ni mbongo ja mbenga. Ku chisopelo keeshi kuhakwila ana a shiwa, chibwe kubanjika kuli mapwo waze haanafwisa malunga.

Izaya 58:6

“Ndako ya kulitwamina kulia yize nakuzanga yili yino: echenu kubinjisa chenu ni uhenge wenu; jitulenu atu waze nwakubinjisa.

Izaya 58:7

Tetelenu akwa zala yakulia yenu. Zumbulenu atu waze keeshi mazuwo. Jikenu yiswale, kanda nulituna kukwasa atu ni akwenu.

Jeremia 19:4

Munguchilinga mumu atu haangwehuka ni haanabihisa homa hano ni kulambula mulambu kuli mazambi eka; mazambi waze te kaanyingikine ko, chibwe ayo, chibwe tushakulu two, chibwe mianangana ja Ayuda. Haanazalisa homa hano ni manyinga ja atu waze keeshi mulonga,

Jeremia 22:17

Alioze yena Wakulinyonga lume yena mwene; wakushiha yoze keshi mulonga ni kubinjisa atu je ni uswii. Mwene Zambi wachamba.

Jeremia 26:16

Mba miata ni atu yaambila akwa munanyi ni mahako ngwo: “Mutu yono hahanjika ni yetu mu jina lia Mwene Zambi, katelele kufwa.”

Jeremia 5:28

kashika haatohwa ni haabema. Yitanga yo yili lume yibi. Keeshi kulingila ana a shiwa yibema, chibwe kubatwila akwa lamba ni ululi.

Jeremia 7:23

Alioze naambile angwononokene, mba hanga ngubwe Zambi yo, no abwe atu jami. Naambile alinge ngwe chize ngunaambe, hanga awahe kwo.

Jeremia 9:24

Yoze mazanga kulisamba, alisambe ngwenyi, kanangunyingika ni kakungwivwa. Mumu zango liami kulishi kuhwa, nakulinga yuma ya ululi ni yize yinalite. Yino ye yuma yize yakunguwahila. Yami Mwene Zambi nachamba.”

Ezekiel 18:12

kakubinjisa yiswale, kakwiya, keshi kuhilwisa tombo, kakuya homa ha kuwayila mazambi eka, kakukombelela mahamba a kuzelwokesa.

Ezekiel 18:7

Keshi kubinjisa niumwe, keshi kwiya. Kakuhilwisa tombo, kakulisa akwa zala, kakujika waze ali ni uvu.

Ezekiel 22:7

Niumwe mu limbo wakulemesa yisemi jenyi. Nwakwonga yilambala, nwakwiya yuma ya ana a shiwa ni mapwo waze haanafwisa malunga.

Ezekiel 45:9

Mwene Zambi yamba ngwenyi: “Yenu akwa kuyula ja Israele, hasuku nwachiza kuvulumuna! Litwaminenu upupilo wenu ni kubinjisa chenu. Lingenu chibema ni chize chinalite. Kuchanutambile nawa kuhanga atu jami ku chifuchi cho. Yami Mwene Zambi nanwamba cho.

Joele 3:19

“Egiptu makabwa puya, Edome makabwa wahululu, mumu ashile jita ni Ayuda, yaashiha waze te keeshi mulonga.

Alevi 19:15

“Kanda ubatula milonga ni uhenge chibwe ni katonde. Kanda ulemesa pichi ni kulelesa chiswale.

Amose 5:15

Vutwokelenu yibi, zangenu yibema, kolesenu ubatwilo wa ululi mu yota. Hanji Mwene Zambi Mukwa Ndundo Jeswe mevwila keke masalila a chifuchi chino.

Amose 5:24

Tayizenu ubatwilo wenu ulite upukumuke ngwe meya a mu lwiji, ni ululi wenu ngwe lwiji yoze keshi kuma.

Mika 3:11

Miata ja limbo kaakuyula mumu ha mbongo ja mbenga, mahako kaakulongesa Shimbi ja Zambi hanga aafwete, akwa munanyi kaakulumbununa Usolwelo wo mumu ha ubite. Hindu ayo eswe kaakwamba ngwo: “Mwene Zambi kali hamwe ni yetu. Chibi nichimwe kuchichi kutuwana.”

Mika 6:8

Kaa mata! Mwene Zambi hanatulweze chize akuzanga: kulinga chize chinalite, kulweza zango lize kulishi kuhwa, kuliendela ni Zambi yetu nikulikehesa.

Malaki 3:5

Mwene Zambi Mukwa Ndundo Jeswe kanambe ngwenyi: “Mungukasoloka mukachi kenu ni kunubatwila, mungukalimika ni akwa kupanda wanga, ni yitanji, ni akwa kulenya, ni waze akwiya fweto ya akwa milimo, ni waze akubinjisa mapwo waze haanafwisa malunga ni ana a shiwa ni yilambala, eswe waze keeshi kungulemesa.

Mateu 23:23

“Lamba lienu alongeshi a Shimbi ni Afariseu, yilembekese! Mumu nwakuhana Chihanda cha muchikumi cha mbuto yikepe yikepe ya yibuta ya chimbumba ni endru ni kominyo! Alioze nwakulelesa malongeso ahiana a Shimbi! Kafwa ngwe: kubatula ni ululi, ni keke, ni ufulielo. Yenayo chanutamba kulinga ni yize yikwo nawa.

Shimbi 10:18

Kakubatwila ana a shiwa ni waze haanafwisa malunga ni ululi. Kakuzanga yilambala waze atwama hamwe ni atu jenyi, kakwalisa ni kwajika.

Shimbi 24:17

“Kanda nuhengesa ubatwilo wa yilambala ni wa shiwa. Kanda nukanda hina ngwe chifungo kuli pwo yoze haanafwisa lunga.

Shimbi 24:7

“Mweswawo meya usoko wenyi Kaisraele ni kumupwisa ndungo yenyi hanji kumulanjisa, mutu yoze chatamba kumushiha. Chenacho munukachiza chibi chize mukachi kenu.

Shimbi 25:1

“Nyi Aisraele aali haaya ni kulifunda ku chota, muze haasopa we mulonga, umuwika hasamba mukwo hahia.

Shimbi 27:19

“ ‘Mwene Zambi akashinge yoze mahengesa ubatwilo wa yilambala, ni shiwa, ni mapwo waze haanafwisa malunga.’ “Atu eswe maakatayiza ngwo: ‘Chibwe kama Chenacho!’

Tiangu (Jake) 1:27

Uwayilo Ubema ni wamwenemwene ku meso ja Tata Zambi wenau au: kukwasa ana a shiwa ni mapwo waze haanafwisa malunga mu lamba lio, ni kulifunga ku yibi ya hano hashi.