Daniel 12:1 - Mukanda Wa Zambi 1970

¹ Kanganda ka mwilu yoze te unazala mahina atoma alefuna yamba ngwenyi: “Ha tangwa lize mwe Mikele, kanganda ka mwilu mukwa lutwe yoze wakufunga atu je, makasoloka. Ha matangwa waze lamba linji mulikabwa ko, lamba ngwe lize kanda libwa kama nilimwe tangwa chize kuze Zambi atangile atu hano hashi. Muze tangwa lize mulikeza, atu eswe a ku vungu lie waze anasonewa mu mukanda wa Zambi kumakaalamwina.

MUKANDA USANDU WA ZAMBI 1975

¹ Ha mwaka uze Mikele, mwe mukwa kuyula munene yoze wakufunga ana ja atu je, makamana; kumukukapwa mwaka wa lamba limwe, kanda lisoloka chize ku uputukilo wa vungu lino ndo ku miaka yize. Ha mwaka uze atu je kumakaapulula, atu eswe aze makaawana a kusoneka mu mukanda.

Daniel 12:1 Iomraidhean Croise

Miaso (Masamu) 56:8

Yena Unanyingika lamba lize nakumona, wakumona chize nakulila. Kuyasonewene mu mukanda we, nyi?

Miaso (Masamu) 69:28

Jimuna majina jo mu mukanda wa mwono, kanda aalula mukachi ka atu je.

Izaya 4:3

Mweswawo masala ho mu Yerusaleme, yoze Zambi matongola kubwa ni mwono, maakamuvuluka ngwo, munangi.

Izaya 9:7

Tachi ja wanangana wenyi muujoka, wanangana wenyi matangwa eswe muukabwa ni uhwimino. Makatwama ha chitwamo cha mwanangana David ni kuyula, makakolesa wanangana wenyi ni umwenemwene ni ululi, chize musono ndoo ku miaka yeswe. Mwene Zambi Mukwa Ndundo Jeswe hanabatula kulinga yuma yino yeswe.

Jeremia 30:10

“Yenu atu jami, kanda nwivwa woma; yenu Aisraele, kanda nwivwa mwongo. Mungukanulamwina ku chifuchi chisuku, kuze nuli funge. Munukahiluka ku mahienu ni kubwa mu uhwimino; munukabwa ni sambukila, niumwe kechi kanuvwisa nawa woma.

Jeremia 30:7

Tangwa lia lamba hiliakundama; kukushi tangwa likwo lize mulilifwa nalio. Lili tangwa lia lamba lia atu jami, alioze keechi kwoonona liakulu.”

Ezekiel 13:9

Yenu akwa munanyi waze nwakuhanjika Usolwelo wa mahuza ni kulongesa longeso lia kubinjisa, mungunumwesa lamba. Kunuchi kabwa ko muze atu jami maakalikungulula ni kubatula milonga. Majina jenu keechi kaasoneka mu mukanda wa enyaho mu Israele; kunuchi kahiluka nichimwe mu chifuchi chenu. Mba munukanyingika ngwenu, yami nguli Mwene Zambi.

Ezekiel 34:24

Yami Mwene Zambi mungukabwa Zambi yo, umwe mwanangana ngwe kavumbi kami David makabwa mukwa kwayula. Yami nachamba.

Ezekiel 5:9

Mumu hinwalinga yuma yeswe yize nakuvutwokela, mungunumwesa lamba yenu akwa Yerusaleme, lize kanda ngumwesa kama nilimwe tangwa, lize chichi kalimwesa nawa atu.

Daniel 10:13

Mwe kanganda ka mwilu, kafunga ka wanangana wa Persia, yalimika ni yami matangwa makumi aali ni limuwika. Mba Mikele, mukwa lutwe wa tunganda twa mwilu, yeza ni kungukwasa, mumu nasalile ukawami mu Persia.

Daniel 11:45

Makajika mazuwo jenyi anene a makubu a wanangana mukachi ka mulundu haze haatungiwa zuwo lia Zambi ni kalunga lwiji. Alioze kumakafwa, kukuchi kabwa niumwe yoze makamukwasa.”

Daniel 7:10

kahia yikalekwoka kulutwe lienyi. Tununu ni tununu te anamana kulutwe lienyi. Akwa kusopa yaabutuka kusopa, yaabakwola mikanda.

Daniel 9:12

Hiunalingi yize wambile kutulinga yetu ni akwa kuyula jetu. Hiwamwesa Yerusaleme lamba kuhiana lize lia membo akwo hano hashi.

Joele 2:2

Mulikabwa tangwa lia milima ni chinyengo, kwilu mukukalauluka ni malelwa bwii. Chizavu chinene cha tujita kaaneza ngwe milima hiyalitanda ha milundu. Chuma chino haanga te kanda chibwa kama, kuchichi kwiza kubwa nawa.

Malaki 3:16

Hohene atu waze te akuvwila Mwene Zambi woma yaalihanjikisa. Mwene Zambi neye yabanjika ku yize anambe. Ku meso jenyi yasoneka majina ja atu waze te akumuvwila woma ni kumulemesa.

Mateu 24:21

Mumu ha matangwa waze lamba linji mulikabwa ko. Chize ku kutanga cha hashi ndoo musono uno lamba ngwe lize kanda lichibwa kama, ni kulichi kabwa nawa nichimwe ngwe lize kulutwe.

Marku 13:19

Mumu ha matangwa waze, lamba linji mulikabwa ko. Chize ku kutanga cha hashi ndoo musono uno, lamba ngwe lize kanda lichibwa kama, ni kulichi kabwa nawa nichimwe kulutwe.

Luka 10:20

Alioze kanda nuwahilila ha chize mwiku wa luchisa unanwononokena. Shinoho wahililenu mumu majina jenu haanasonewa mwilu.”

A-ROMA 11:15

Mumu muze Zambi weehukile, yapwisa atu akwo tusendo twenyi. Kuchi muchikabwa muze makatambula Aisraele nawa? Muze makaatambula, waze haanafu maakabwa ni mwono.

A-ROMA 11:26

Chenacho Aisraele eswe makaalamwina. Ngwe hichinasonewa mu Mukanda wa Zambi ngwo: “Chilamwina makakatuka ku limbo lia Zione, makachiza utanganyanyi weswe wa vungu lia Yakoba.

Efesu 1:21

Mwe Kristu kakuyula mawanangana eswe, ni yiyulo yeswe, ni ulemu weswe. Kali helu lia yiyulo yeswe yikwo yize atu maahasa kuvuluka, hi a mwakono wika ko, alioze nawa a mwaka uze muwiza ho.

Filipu 4:3

Ni yena nawa, mukwetu wa kushishika, ngunakulembe kwasa kama mapwo wano, mumu ahondanganyine hamwe ni yami ha kumwanga Sango Jibema. Chenacho alingile nawa Klemente ni akwetu akwo eswe a milimo, waze majina jo ali mu mukanda wa akwa mwono.

Yuda 1:9

Chibwe Mikele, kanganda wa lutwe wa mwilu, muze alihamikine ni Sakwonga hakutwala ku mujimba wa Mose, kahamukine ko kumushililika, alioze yamba ngwenyi: “Mwene Zambi akukande!”

Usolwelo 12:7

Hohene mwabwile jita mwilu! Mba Mikele ni tunganda twenyi yaasa jita ni ngongo munene, dragau, neye yasa no jita.

Usolwelo 13:8

Akwa hashi eswe maakamuwayila, kafwa ngwe, waze majina jo kasonewene, chize ku kutanga cha yuma yeswe, mu mukanda wa akwa mwono wa Mwana Panga yoze ashihile.

Usolwelo 17:14

Wano maakasa jita ni Mwana Panga. Alioze Mwana Panga, hamwe ni atu jenyi waze atambikile, waze atongwele, akwa kushishika, maakakumba. Mumu iye kali Mwene wa ene eswe ni Mwanangana wa mianangana eswe.”

Usolwelo 20:12

Mba yingumona makulwana ni twanuke, kaanamana kulutwe lia chitwamo cha wanangana. Mikanda te kaanayibakula. Mukanda ukwo nawa te kaanaubakula, mukanda wa akwa mwono. Atu te kanaabatwila nikulita ni yize alingile, nikulita ni yize asonekene mu mikanda.

Usolwelo 20:15

Yoze jina lienyi kuliasonewene mu mukanda wa akwa mwono, yamunyasa mu wina wa kahia.

Usolwelo 3:5

Yoze makakumba makazala mahina atoma. Chichi kajimuna nichimwe jina lienyi mu mukanda wa akwa mwono. Mungukamutayiza ngwami: ‘Niwami’, ku meso ja Tata ni ku meso ja tunganda twenyi a mwilu.

Usolwelo 7:14

Yingukumbulula ngwami: “Mwene, yena Unanyingika, hi yami ko.” Mba yangwambulwila ngwenyi: “Kaali atu waze haanatuhuka ku yihungumiona yinji. Haanakoso mahina jo, hanaatomesa ni manyinga ja Mwana Panga.