Daniel 11:4 - Mukanda Wa Zambi 1970

⁴ Alioze muze makabwa ni tachi kuhiana, wanangana wenyi muukahandunuka mu yihanda yiwana. Mianangana waze hi a ku vungu lienyi ko maakamusalakana, alioze keechi kabwa ni tachi ngwe iye.

MUKANDA USANDU WA ZAMBI 1975

⁴ Mba muze hatatuka, wanangana wenyi maumakuna ni kuupangila ku mafuji awana a mwilu alioze hi kuli ana jenyi ko; ni kuyula kechi kayula nikulita ni chiyulo chenyi, mumu wanangana wenyi mautukula akauhane kuli akwo nawa helu lia wano.

Daniel 11:4 Iomraidhean Croise

Miaso (Masamu) 39:6

uli ngwe chizulie lume. Yuma yeswe yize akulinga yili yamokomoko; kakulilumbikila ubite, alioze keshi kunyingika yoze mauhinga!

Longeshi 4:8

Kuli umwe mutu yoze watwama ukawenyi. Keshi mwana, keshi mwanakwo, alioze kakuhondangana, hindu keshi kuwahilila ni ubite uze ali nawo. Mba iya akuhondanganyina chichize ni kulituna kuwahilila chenyi mwene? Chili nawa chamokomoko, uli kwawo mwono wa lamba.

Jeremia 12:15

Alioze muze hinaatwala kusuku, mungukeevwila nawa keke; mungukahilwisa vungu lieswe ku chifuchi chenyi, ni ku chihinga chenyi mwene.

Jeremia 12:17

Alioze nyi vungu limwe kulichi kwononoka, mungulinongesa liakulu ni kulionona. Yami Mwene Zambi nachamba.”

Jeremia 18:7

Lieswe tangwa mungwambila limwe vungu ngwami, mungunwonona ni kuchina chifuchi chenu.

Jeremia 31:40

Chikulo cheswe kuze akufunda afu ni kumbila ko yiswaswa, ni minda yeswe ya ku tunda ya chitwetwe cha Kidrone ndoo ni ku chikolo cha Kavwalu ku chivumbuko, muchikabwa cha chijila. Limbo kechi kalibuzula nawa hanji kulionona.”

Jeremia 45:4

“Alioze yami, Mwene Zambi, ngunabuzula yize hingunatungu. Munguchilinga hashi heswe.

Jeremia 49:36

Mungutuma fuji yize yinakatuka ku kanda jeswe. Mungumwangina atu jamo kweswe, ndoo haachinyina mu yifuchi yeswe.

Ezekiel 37:9

Zambi yangwamba ngwenyi: “Hanjika munanyi ku mwiku. Amba ngwe: ‘Mwene Zambi kanakwambe ngwenyi, tweya ku mbango jeswe jiwana unjile mu mijimba ya afu, uyipwise nawa ni mwono.’ ”

Daniel 7:2

We Usolwelo uno: Fuji yiwana yiivundula kalunga lwiji sali ni sali.

Daniel 7:6

Muze te ngunatale, yingumona ngongo mukwo. Yalifwa ni kolwama, alioze te kali ni mapulwa awana ngwe a kajila. Yabwa nawa ni mitwe yiwana, yamoneka ngwe umwe mukwa kuyula.

Daniel 7:8

Muze ngunashishika kutala je mbinga, yingumona nawa mbinga yikwo yikepe yinasoko mukachi ka jikwo. Yiimakwona mbinga jitatu jize jitangu. Mbinga yiibwa ni meso ngwe a mutu, ni kanwa lize liahanjekele yuma ya kulizelula.

Daniel 8:22

Mbinga jiwana jize jasokele muze yitangu hiyamakuka jinalumbununa ngwo, wanangana utangu muukahandunuka mu mawanangana awana. No keechi kabwa ni tachi ngwe uze utangu.

Daniel 8:8

Mwe kuji a pembe yabutuka kulengumuka kuhiana, alioze muze habwa ni tachi kuhiana, mbinga yenyi yiimakuka. Mba ha chituwa chize yihasoka mbinga jeka jiwana, yijitalikisa ku kanda jeswe.

Zakaria 2:6

Mwene Zambi yambila atu jenyi ngwenyi: “Hingunanumwangina mu yifuchi yeswe sali ni sali. Alioze haliabwila, yenu njize, katukenu mu Babilonia, nuhiluke ku Yerusaleme.

Zakaria 6:5

Yangukumbulula ngwenyi: “Jino jili fuji jiwana jize jinakatuka kuli Mwene Zambi wa hashi heswe.”

Mateu 12:25

Yesu, ha kunyingika manyonga jo, yaamba ngwenyi: “Nyi akwa wanangana maalihandununa ni kulitachika ene, wanangana uze muukabwa wahululu. Nyi akwa limwe limbo hanji akwa limwe jiko maalihandununa ene, jiko lize hanji limbo lize mulikafwa.

Luka 12:20

Alioze Zambi yamwamba ngwenyi: ‘Yena chihepuke! Ufuku unowene muufwa, Mba yuma yize unalitumbikila yaya muyikabwa?’ ”

Usolwelo 7:1

Munabwamuze yingumona tunganda a mwilu awana kaanamana ku mbango jeswe jiwana ja hashi, kaanakwata fuji yiwana ya hashi, hanga kuyichi kuhehuka hashi heswe, chibwe ha kalunga lwiji, chibwe ku weswe mutondo.