Daniel 11:2 - Mukanda Wa Zambi 1970

² Yuma yize ngunazange kukulweza yili yamwenemwene.” Kanganda ka mwilu yamba ngwenyi: “Mianangana atatu akwo maakayula Persia. Hohene mwanangana wa muchiwana makasula ko yoze makabwa pichi kuhiana akwo eswe. Muze makabwa ni tachi ni upichi kuhiana, makasangumuna wanangana wa Gresia.

MUKANDA USANDU WA ZAMBI 1975

² Mba haliapwila mungukulumbunwina umwenemwene. Tala, mianangana atatu akwo makasoloka mu Persia; mba wamuchiwana mapwa pichi kuhiana o eswe. Muze hatambula tachi ku upite wenyi, mavundula eswe kulimika ni Ngresia.

Daniel 11:2 Iomraidhean Croise

Ezra 4:24

Chenacho Ayuda alitwaminyine kutungulula zuwo lia Zambi ndoo ni ku mwaka wa muchaali wa kuyula cha Dariuse mu Persia.

Ezra 4:7

Nawa ha matangwa ja kuyula cha mwanangana Artasherke mu chifuchi cha Persia, Bishlame, ni Mitredate, ni Tabele, ni masepa jo yaasonekena mwanangana mukanda. We mukanda yaausoneka mu liji lia arame, ha kuutanga chatamba kuulumbununa.

Estere 1:1

Mwanangana Ahashueru, ku Shushane, limbo lia wanangana mu chifuchi cha Persia, te kakuyula yifuchi 127, chize ku chifuchi cha India ndoo ni ku chifuchi cha Sudane.

Yishima 22:21

muyikulongesa umwenemwene. Mba muze maakutuma hanga use chinyingi, muukeza ni kumbululo libema.

Daniel 10:1

(Ha mwaka wa muchitatu wa kuyula cha Siruse, mwanangana wa Persia, Daniel, yoze te akuvuluka ngwo Belteshazare, yevwa maliji mu Usolwelo. E maliji abwile amwenemwene alioze chikalu kunyingika ulumbunwiso wo, mba yamulumbunwinoo mu Usolwelo ukwo.)

Daniel 11:25

“Makakatwisa tujita anji akalimike ni mwanangana wa ku Sude. Neye makalulika kulimika nenyi ni chihuji chinene cha tujita a tachi. Alioze mwanangana wa ku Sude kumaakamwonga, kechi kakumba.

Daniel 7:5

Ngongo wa muchaali yalifwa ngwe ursu, yamana. Yabwa ni pachi jitatu ku mazo jenyi. Yikwiza liji ngwo: “Yako, ulie yifwo yinji ngwe chize unazange.”

Daniel 8:21

Kuji a pembe kanalumbununa wanangana wa Gresia. Mbinga yenyi yinene ya mukachi ka yikenyikenyi yinalumbununa mwanangana wo mutangu.

Daniel 8:26

Usolwelo uno hakutwala ku milambu ya chichamene ni chingoloshi, uze hakulumbunwina, muukamanunuka. Alioze haliabwila achiusweke, mumu matangwa anji maakabalika ndoo kumanunuka chawo.”

Daniel 8:4

Yingumona mwe kuji a panga kanayi nikububa ku chitokelo, ni ku norde, ni ku sude. Te kukushi kashitu niumwe yoze mahasa kumukwika hanji kumuchina mumu ha tachi jenyi. Yalinga yeswe yize azangile, yabutuka kulengumuka.

Amose 3:7

Chamwenemwene Mwene Zambi keshi kulinga Chuma nichimwe, shina malweza chijimbikilo chenyi kuli tuvumbi twenyi, akwa munanyi.

Yoano 10:35

Tunanyingika ngwetu, yuma yize Mukanda wa Zambi unambe yakulinduluka matangwa eswe, ni Zambi hanavuluka atu waze ahanyine liji lienyi ngwenyi: ‘mazambi’.

Usolwelo 21:5

Mba yoze wakutwama ha chitwamo cha wanangana yamba ngwenyi: “Haliabwila ngunalingi yuma yeswe yaha.” Yangwamba nawa ngwenyi: “Soneka yuma yino, mumu maliji wano ngunahanjika kaali maliji amwenemwene, chatamba kwafuliela.”