Alevi 16:2 - Mukanda Wa Zambi 1970

² Yamba ngwenyi: “Lweza yayenu Arone akanjile muma mwa chijila kuhiana nikulita ni Shimbi. Mumu mwenamo nakulisolola mu lelwa, homa ha kukukila milonga, ha mushete wa Usendo wa yami ni Aisraele. Nyi makakolema Shimbi yino, makafwa kwenyi.

MUKANDA USANDU WA ZAMBI 1975

² Yehova yamba kuli Mose ngwenyi, Ambila yayenu Arone kanda anjila matangwa eswe muma musandu muchima lia chikalakala kumeso ja chitwamo cha keke chize chili ha mushete, kuchina mafwa. Mumu mungukasoloka mu lelwa ha chitwamo cha keke.

Alevi 16:2 Iomraidhean Croise

1 Yitanga Ya Mianangana 6:16

Chibatulo cha muchima chize te akuvuluka ngwo, muma mwa chijila kuhiana, yichibwa kunyima mu zuwo lia Zambi. Kusuhwa chacho metro livwa te chakuhandununa ni mabaya a sedru chize kushi ndoo kwilu.

1 Yitanga Ya Mianangana 8:6

Mba mahako yaaneha mushete wa Usendo mu zuwo lia Zambi, yaaunangika muma mwa chijila kuhiana mushi lia akwa mwono a mwilu.

Kutuhuka 30:10

Chisuho chimuwika mwaka ha mwaka, Arone chatamba kubemesa chilumbilo ni kukwita ha mbinga jiwana manyinga a kashitu yoze alambwile ha shili. Achilinga mwaka ha mwaka ndoo ku miaka yeswe. Chilumbilo chino chikabwa cha chijila kuhiana ha kuchikunjika kuli yami Mwene Zambi.”

Alevi 16:13

Kwenako ku meso ja Mwene Zambi makochela yuma ya vumba libema, ni mwishi muukafuka homa ha kukukila milonga ha mushete wa Usendo wa Zambi ni atu, kuchina makamona ho, nyi ka makafwa.

Alevi 16:34

Shimbi jino chatamba kujifunga ku miaka yeswe. Chatamba kufunga Shimbi jino mwaka ha mwaka ha kubemesa Aisraele ku shili yo. Chenacho Mose alingile ngwe chize amwambile Mwene Zambi.

Alevi 8:35

Chanutamba kutwama ku chikolo cha zuwo lia Zambi matangwa shimbiali, nikulinga chize Mwene Zambi ambile. Nyi ka, munufwa. Chenacho Mwene Zambi angulwezele.”

Kwalula 17:10

Mwene Zambi yambila Mose ngwenyi: “Hilwisa lukanda wa Arone kulutwe lia mushete wa Usendo. Ukamufunga ha kukanyamisa Aisraele waze akulimika ni yami. Nyi keechi kulitwamina kumaakafwa.”

Kwalula 18:7

Alioze shina yena ni ana je munulinga milimo ya uhako ku chilumbilo ni muma mwa chijila kuhiana. Yuma yino yeswe yili milimo yenu, mumu hingunanwehe chawana cha uhako. Ku yuma ya chijila, nyi kwakundama umwe mutu weka akamushiha.”

Kwalula 4:19

kanda akundama ku yuma ya chijila. Nyi ka, kumaafwa. Alioze Arone ni ana jenyi a malunga chaatamba kunjila mu zuwo liami ni kulweza mutu mweswe chize mambata.

Kwalula 4:5

Mwene Zambi yamwaha Mose Shimbi yikwo. Muze Aisraele maamba kukatuka ha musumba, Arone ni ana jenyi a malunga akanjila mu zuwo lia Zambi, akalemuna chikalakala kulutwe lia mushete wa Usendo ni kufuka nacho we mushete.

Mateu 27:51

Ha shimbu lizeliene, chikalakala cha hina cha mu zuwo lia Zambi yichibulika mukachi, chize kwilu ndoo hashi. Hashi yihanyika, mawe yaabulika,

Hebreu 6:19

Yuma yize twakusa mbunge yili ngwe kwachiliji ja ulungu mu mbunge jetu. Yili yamwenemwene ni ya tachi. Yinanjila ndusu mu chikalakala cha hina mu zuwo lia Zambi mwilu. Yinanjila ndoo mu chibatulo cha muchima.

Hebreu 9:25

Mwata wa mahako wa Ayuda kakunjila Muma mwa Chijila Kuhiana mwaka ni mwaka ha kulambula mulambu wa manyinga a kashitu. Alioze Kristu kanjilile mo yisuho yinji ha kulilambula iye mwene.

Hebreu 9:3

Kunyima lia chikalakala cha muchaali, mu zuwo kwabwile chibatulo chikwo chize te akuvuluka ngwo, Muma mwa Chijila Kuhiana.

Hebreu 9:5

Helu lia mushete uze yihabwa yizulie ya akwa mwono a mwilu ha kulweza ngwo, Zambi kwe ali. Mapulwa jo yaazulamina homa haze te akuhanyina mulambu wa ukonekeno wa milonga. Alioze lino hi shimbu ko liakulumbununa yuma yino yeswe.

Usolwelo 15:8

Zuwo lia Zambi lize yilizala ni mwishi uze wakukatuka ku uhenya wa Zambi ni ku ndundo jenyi. Mutu niumwe wahashile kunjila mu zuwo lia Zambi ndoo muze lamba shimbiali, lize atwalile tunganda a mwilu, mulimanunuka.