Sona 3:10 - Chuukese Bible

¹⁰ Iwe, lupwen Kot a küna ar ekieksefäl me ar kul seni föförür mi ngau, a siwili an ekiek. Esap chüen ngeniir liwinin ar tipis usun a apasa epwe föri.

Sona 3:10 Iomraidhean Croise

1. Kronika 21:15

Mürin a tinala eman chon läng Jerusalem, pwe epwe afeiengaua aramasan. Nge lupwen a amolätä pwe epwe afeiengaua, ewe Samol mi Lapalap a lamalamala pokiten ewe feiengau. Iwe, a üreni ewe chon läng, “Kopwe ükütiu. Kopwe eitietiu poum.” Nge nöün ewe Samol mi Lapalap we chon läng a ütä ren ewe lenien wichiwich umwun wiich än Arauna ewe re Jepus.

Ekistos 32:14

Mürin, ewe Samol mi Lapalap a siwili an ekiekin afeiengaua nöün aramas.

Än Salomon Fos 28:13

Eman aramas mi aopala an tipis esap fefeitä lon manauan, nge eman mi pwärätä o likitala, Kot epwe ümöümöch ngeni.

Aisea 30:18

Nge ewe Samol mi Lapalap a witiwiti chök an epwe kirikiröch ngenikemi, a pwal molotä pwe epwe ümöümöch ngenikemi. Pun ewe Samol mi Lapalap eman Kot mi unusen pwüng. Feiöchün chokewe meinisin ra anomu ar apilükülük won.

Jeremaia 18:7

Fän ekoch üa apasa usun eu mwichen aramas ika chon eu mwü pwe üpwe üttiretä, kupiretiu o aroserela.

Jeremaia 18:8

Nge are chon ewe mwü üa kapas usun ra kul seni ar föför mi ngau, ngang üpwe siwili ai ekiekin afeiengaueer.

Jeremaia 36:3

Eli ika chon Juta repwe rongorong usun ekewe feiengau meinisin üa ekiekin föri ngeniir, repwe kul seni ar föför mi ngau. Mürin, ngang üpwe amusala ar föföringau me tipis.”

Jeremaia 42:10

‘Are oupwe nomotiu lon ei fanü, mürin ngang üpwe aükemiitä, nge üsap ataakemiitiu. Üpwe fotukikemi, nge üsap üttikemiitä. Pun üa lolilenäsini ai üpwe afeiengauakemi.

Sowel 2:13

Ousap chök kamwei üfemi, nge oupwe letipeta lon lelukemi.” Oupwe kul ngeni ewe Samol mi Lapalap ämi we Kot, pun a eäni kirikiröch me chen. A songomang o tongotam, a pwal siwili an ekiekin afeiengaua aramas.

Amos 7:3

Mürin, ewe Samol mi Lapalap a siwili an ekiek o üra, “Mine ka küna esap fis.”

Amos 7:6

Iwe, ewe Samol mi Lapalap a siwili an ekiek o üra, “Mine ka küna esap pwal fis.”

Sona 4:11

Nge ifa usun, ngang üsap achika Ninifa ewe telinimw mi lapalap, ia a wor ie lap seni ipükü rüengeröü aramas resamwo silei lefilen öch me ngau, a pwal wor chomong man lon?”

Sona 4:2

Mürin a iotek ngeni ewe Samol mi Lapalap o apasa, “Ai Samol mi Lapalap, ifa usun, sap iei usun mine üa apasa pwe kopwe föri, lupwen üa chüen nonom won fanüei? Iei popun ai süla Tarsis, pun üa silei pwe en eman Kot mi ümöümöch o lukpwetete, ka pwal songomang o tongotam. Iwe, üa pwal silei pwe ka tipemecheres le siwili om ekiekin afeiengaua aramas kana.

Lukas 11:32

Lon ewe ränin kapwüng ekewe chon Ninifa repwe ütä o atipisi ei täppin aramas, pun ra aier ren än Sona afalafal. Nge üpwe ürenikemi, pwe eman mi lap seni Sona a nom ikei.

Lukas 15:20

Iwe, ewe alüal a ütä o liwinsefäliti saman. Nge lupwen a chüen toau seni lenian, seman we a küna o a fokun tongei. A sä ngeni, a romi o mitiri.