Nöün Paulus Toropwe ngeni ekewe Souläng lon Rom 7:4 - Chuukese Bible

⁴ Ämi pwii kana, ina chök pwal usun ämi, oua mäla ngeni ewe Allük pokiten ämi oua eu kinikinin inisin Kraist. Iei ämi oua nöün ätewe Kot a amanauasefäli seni mäla, pwe epwe wor uän ach angang ngeni Kot.

Nöün Paulus Toropwe ngeni ekewe Souläng lon Rom 7:4 Iomraidhean Croise

Aisea 54:5

Pun Ewe mi Föruk epwe usun chök pwülüom reöm, itan Samol mi Unusen Manaman. Ewe mi Pin lon Israel om Chon Amanau, i ewe Kot mi nemeni unusen fanüfan.

Aisea 62:5

Iwe, usun eman alüal a pwülüeni eman föpwül, iei usun noum mwän repwe usun chök nge pwülüom, en Jerusalem. Nge usun eman mwän apwüpwülü söfö a pwapwa ngeni ewe fin apwüpwülü söfö, iei usun om Kot epwe pwapwaituk.

Mateus 26:26

Iwe, lupwen ra mongöfengen, Jesus a angei ewe pilawa, a iotekin kilisou won, iwe, a kinikisietiu. A ineti ngeni nöün kewe chon kaiö o apasa, “Oupwe angei o mongö, iei inisi.”

Markus 4:20

Nge ekoch aramas ra wewe ngeni ekewe pwükil ra mworotiu won pwül mi mürina. Iwe, ra rong ewe kapasen Kot, ra etiwa o ua. Ekoch ra uani ilik, ekoch wone, pwal ekoch ipükü.”

Johannes 15:8

Iei chök mine Semei epwe küna ling ren, are oupwe uani ua mi chomong o pwärala pwe ämi nei chon kaiö.

Johannes 3:29

Ewe mwän apwüpwülü söfö i pwülüen ewe fin apwüpwülü söfö. Nge chiechien ewe mwän apwüpwülü söfö mi ü ünükün o aüseling a pwapwa lupwen a rongorong mwelien ewe mwän apwüpwülü söfö. Iei usun ai pwapwa a unusöchüla.

Johannes 6:51

Ngang ewe mongön manau mi feitiu seni läng. Are eman a mongö ei mongö epwe manau tori feilfeilachök. Iwe, ei mongö iei fitukei ngang üpwe fangala, pwe chon fanüfan repwe manau ren.”

Nöün Paulus Toropwe ngeni ekewe Souläng lon Rom 6:11

Iei usun pwal ämi oupwe chechemeni pwe ämi oua fen mäla ngeni tipis, nge iei oua manau lon ämi chiechifengen me Kot lon Kraist Jesus.

Nöün Paulus Toropwe ngeni ekewe Souläng lon Rom 6:14

Ousap chüen nonom fän nemenien tipis, pun ousap chüen nonom fän nemenien allük, nge oua nonom fän nemenien ümöümöchün Kot.

Nöün Paulus Toropwe ngeni ekewe Souläng lon Rom 6:2

Apwi, esap fokun ina! Kich sa mäla ngeni tipis, ifa usun ach sipwe tongeni sopwela le föföri tipis?

Nöün Paulus Toropwe ngeni ekewe Souläng lon Rom 6:22

Nge iei oua ngas seni fän nemenien tipis o oua chon angang ngeni Kot. Feiöchümi pwe oua angei eu manau mi pin, nge sopolan ewe manau esemüch.

Nöün Paulus Toropwe ngeni ekewe Souläng lon Rom 7:3

Iei mine, are neminei a pwüpwülü ngeni pwal eman mwän lupwen pwülüan we a chüen manau, epwe iteni eman fin lisowu. Nge are pwülüan we a mäla, neminei a ngas seni fän nemenien ewe allükün pwüpwülü, nge esap iteni eman fin lisowu, inamwo are a pwülüeni pwal eman mwän.

Nöün Paulus Toropwe ngeni ekewe Souläng lon Rom 7:6

Nge iei sia ngas seni fän nemenien ewe Allük pokiten sia fen mäla ngeni mine a fötekinikich. Iwe, sisap chüen angang ngeni Kot lon ewe lapalapen lom ren ewe allük mi makketiu, nge sia angang ngeni lon ewe lapalap mi fö ren Ngünmifel.

Nöün Paulus Toropwe ngeni ekewe Souläng lon Rom 8:2

Pun ewe allükün Ngün mi ngenikich manau lon Kraist Jesus a angasaei seni ewe allük mi afisätä tipis me mäla.

1. Korint 10:16

Lupwen sia ün seni ewe kap sia aea lupwen ach eäni ewe mongö än ach Samol o sia kilisou ngeni Kot ren, sia chiechifengen lon ewe chaan Kraist. Nge ren ach utu ewe pilawa lupwen sia mongö seni, sia chiechifengen lon ewe inisin Kraist.

2. Korint 11:2

Üa lukomong womi, usun chök Kot a lukomong womi. Ämi oua wewe ngeni eman föpwül mi limelimöch, üa pwon pwe epwe pwülüeni eman chök mwän, iei i Kraist.

Kalatia 3:13

Nge ren än Kraist küna anümamau fän itach a angasakich seni ewe anümamau ekewe Allük ra atoto woch, pun a mak lon ekewe Toropwe mi Pin, “Iö a mwöch won efoch irä a anümamau me ren Kot.”

Kalatia 5:18

Nge are Ngünmifel a emwenikemi, mürin ousap nonom fän nemenien ekewe Allük.

Efisos 2:15

A amorala än ekewe chon Juta Allük fiti pwüngün me tichikin, nge a föri seni ekewe ruu sokun mwichen aramas eu chök mwichen aramas mi fö lon püsin i. Ren ei a awora kinamwe.

Filipi 1:11

Iwe, manauemi epwe urela ren sokun föför mürina Jesus Kraist chök a tongeni afisätä, pwe Kot epwe ling o iteüöch ren.

Filipi 4:17

Esap wewen pwe üa chök mochen angei lifang, nge üa mochen ai üpwe küna watten ämi föför mürina epwe kapach ngeni mine oua fen föri.

Kolose 1:10

Mürin oupwe tongeni manaueni eu manau mi fich ngeni ach Samol o oupwe föri mine epwe pwapwa ren. Iwe, epwe wor sokopaten föför mürina lon manauemi, oupwe mämäritä lon ämi silei Kot.

Kolose 1:22

Nge iei oua chä ngeni Kot ren mälan Nöün we, pwe epwe aütaikemi mwen mesan fän pin me limöch, pwe esap wor och mine oua mwäl won.

Kolose 1:6

Ei Pworausen Manau a akatoto feiöch, a chöfetal won unusen fanüfan usun a fen fis lefilemi, seni ewe rän oua kärän popuetä le rongorong o weweöchiti än Kot ümöümöch mi wesewesen enlet.

Kolose 2:14

o amola makken ach kewe liwinimang mi mak lon ewe toropwe fiti allükün kewe mi ü ngenikich. A angei senikich meinisin o chüfölüüretä won ewe iräpenges.

Kolose 2:20

Iwe, oua mäla fiti Kraist o ngas seni fän nemenien ekewe ngün mi nemeni ei fanüfan. Pwota chök oua manaueni eu sokun manau usun itä nge ämi nöün ei fanüfan? Pwota oua aleasochisi ekei sokun allük,

Ipru 10:10

Pokiten Jesus Kraist a föri mine Kot a mochen pwe epwe föri, kich meinisin sia küna limöch seni tipis pun a eäni asor püsin inisin fän eu chök, nge a naf ngeni fansoun meinisin.

1. Petrus 2:24

Kraist a püsin uwei ach kewe tipis won inisin o uweiretä won ewe iräpenges, pwe kich sipwe mäla seni tipis o manau ngeni pwüng. Ren an kinas kana sia küna pöchökül.

Pwärätä 19:7

Ousipwe mweireir o fokun pwapwa, ousipwe mwareiti an tekia! Pun a war fansoun apwüpwülüen ewe Lam, nge pwülüan we, ewe fin apwüpwülü söfö, a püsin amol ngeni ewe rän.

Pwärätä 21:9

Mürin eman me lein ekewe füman chon läng mi fen wor rer ekewe fisu sepi mi ur ren ekewe fisu amüchülan feiengau a feito rei o a apasa, “Kopwe etto pwe üpwe aküna ngonuk ewe Fin apwüpwülü söfö, iei i pwülüen ewe Lam.”