Nöün Paulus Toropwe ngeni ekewe Souläng lon Rom 11:8 - Chuukese Bible

⁸ Usun a mak lon ekewe Toropwe mi Pin, “Kot a föri pwe resap tongeni mefi ika weweiti och. Tori ikenai resap tongeni küna ika rongorong.”

Nöün Paulus Toropwe ngeni ekewe Souläng lon Rom 11:8 Iomraidhean Croise

2. King 17:34

Iwe, tori ikenai ra chüen föri usun örünier me lom. Resap fel ngeni ewe Samol mi Lapalap, resap pwal aleasochis ngeni ekewe pwüüng me ekewe allük ewe Samol mi Lapalap a allük ngeni ekewe mwirimwirin Jakop, ätewe Kot a aita ngeni Israel.

2. King 17:41

Iei usun ekewe mwichen aramas ra fel ngeni ewe Samol mi Lapalap, nge ra pwal fel ngeni ar kewe uluulun anümwäl mi fal. Iwe, tori ikenai mwirimwirir kewe ra chök föri usun mine ar kewe lewo ra föri.

Aisea 29:10

Pun ewe Samol mi Lapalap a apüngätiu womi eu möürüchou. Iwe, a apüngala mesen ekewe chon mesenikemi, nöümi kewe soufos, a pwal pwölüela möküren ekewe chon mökürenikemi, nöümi kewe souürür.

Aisea 6:9

Iwe, Kot a üreniei, “Kopwe feila o aronga ngeni ekei aramas, ‘Oupwe aü selingemi o rongorong, nge ousap wewe ren. Oupwe nenengeni, nge ousap küna och.’

Jeremaia 5:21

Oupwe rongorong ekei kapas, ämi aramas mi umwes o miritingau. A wor mesemi, nge ousap küna. A wor selingemi, nge ousap rongorong.

Isikiel 12:2

“Nöün aramas, ka nonom lein eu täppin aramas mi lükümach o ü ngeniei. A wor meser pwe repwe küna, nge resap künökün, a pwal wor selinger pwe repwe rongorong, nge resap rongorong, pun ir eu täppin aramas mi lükümach o ü ngeniei.

Isikiel 20:26

Üa pwal asechirela, pwe repwe alimengaueer ren püsin ar asor, lupwen ra eäni asoren kek nöür mwänichi. Ren ei üa apwüngüür, pwe repwe silei pwe ngang ewe Samol mi Lapalap.’

Lukas 8:10

Jesus a pölüeni, “Kot a fen mwüt ngenikemi pwe oupwe silei ewe pworaus usun ekewe monomonen Mwün Kot, nge ren ekewe ekoch aramas a toriir lon pworausen awewe, pun repwe nenengeni, nge resap küna och, repwe pwal rongorong, nge resap wewe ren.

Föför 28:26

Pun a apasa, ‘Kopwe feila o aronga ngeni ekei aramas: Oupwe aü selingemi o rongorong, nge ousap wewe ren. Oupwe nenengeni, nge ousap küna och.

Tuteronomi 29:4

Nge tori ikenai ewe Samol mi Lapalap esap ngenikemi ekiek mi mirit, mas mi nenela me seling mi rongorong.