Pwärätä 7:9 - Chuukese Bible

⁹ Mürin ei, üa küna eu mwich mi fokun chocho, esap wor eman aramas a tongeni aleaniir. Ra feito seni sokopaten mwich, ainang, mwü me kapas meinisin. Iwe, ra ütä me mwen ewe lenien motun king me ewe Lam, ra üföüf üf mi pwechepwech o ra amwöchü paan nü lepöür.

Pwärätä 7:9 Iomraidhean Croise

Keneses 13:16

Üpwe achomonga mwirimwirum kana usun pien aroset. Iwe, are eman a tongeni aleani pien aroset, epwe pwal tongeni aleani mwirimwirum.

Keneses 49:10

Esap mwöküt senuk, Juta, ewe asisilen samol, nge mwirimwirum kana repwe nemenem fansoun meinisin tori epwe war ätewe mine an ewe nemenem. Iwe, chon ekewe mwü meinisin repwe aleasochis ngonuk.

Kölfel 2:8

Kopwe tüngorei, nge ngang üpwe ngonuk ekewe mwü pwe kopwe mwüni, üpwe pwal ngonuk unusen fanüfan pwe kopwe fanüeni.

Kölfel 22:27

Chon fanüfan meinisin repwe chechemeni ewe Samol mi Lapalap o kuliti i. Chon ekewe ainang seni ekewe mwü meinisin repwe fel ngeni.

Kölfel 76:4

En ka fokun ling o tekia, lupwen ka liwinto seni ekewe chuk, ia ka akufu chon oputom me ie.

Kölfel 77:2

Lon ränin ai riaföü üa kütta ewe Samol. Lepwin üa aitietä pei lupwen ai iotek, nge üsap chipwang. Nge letipei esap tongeni chip.

Kölfel 98:3

A chechemeni an tong ellet me an allükülük ngeni chon Israel. Aramasen fanüfan meinisin ra küna usun än Kot amanaua aramas.

Jeremaia 16:19

Ai Samol mi Lapalap, en ai pöchökül me imwei imwen maun, en ai lenien op lon fansoun riaföü. Chon ekewe mwü repwe feito reöm seni lesopun fanüfan o apasa, “Esap wor och äm kewe lewo ra fel ngeni, ngei kot mi mwäl, ekewe uluulun anümwäl mi lomotongau.

Jeremaia 3:17

Are epwe tori ena fansoun, Jerusalem epwe iteni än ewe Samol mi Lapalap lenien mot, nge chon ekewe mwü meinisin repwe mwichefengen lon Jerusalem pwe repwe fel ngeniei. Resap chüen ülöförea le apwönüetä ekiekingauen leluker.

Isikiel 47:5

Iwe, a pwal aüküsefäli ükükün limepükü wone iach, nge iei ewe koluk a wiliti eu chanpupu üsap chüen tongeni fetal lon. Pun ewe chanpupu a fefeitä, a pwal alolol pwe üa chök tongeni ää, nge üsap tongeni fetalla epek.

Taniel 4:1

Iei ewe pworaus king Nepukatnesar a asile ngeni aramasen fanü me mwü meinisin, pwal ngeni aramas mi eäni sokopaten fos me won unusen fanüfan: Kinamwe mi somwola epwe torikemi meinisin.

Taniel 6:25

Mürin, king Tarius a mak ngeni aramasen fanü me mwü meinisin, pwal ngeni aramas mi eäni sokopaten fos won unusen fanüfan, “Kinamwe mi somwola epwe torikemi.

Osea 1:10

Nge iteiten ekewe chon Israel repwe wewe ngeni ekewe föün pien aroset esap tongeni aükük ika lea. Iwe, iei Kot a üreniir, “Ämi ousap nei aramas.” Nge epwe war ewe fansoun epwe üreniir, “Ämi nöün Kot ewe mi Manau.”

Lifitikos 23:40

Lon aeuin rän oupwe angei uän irä mi mürina, pan irä palm, pan irä mi muresires, pwal palen ewe irä itan willow mi mär lükün chanpupu. Iwe, oupwe fokun pwapwa fän mesen ewe Samol mi Lapalap ämi we Kot lon ükükün fisu rän.

Sekaraia 10:8

Üpwe äkkänipöü nei aramas o amwichafengeniir. Ngang üpwe amanaueer, nge ir repwe chomong usun me mwan.

Sekaraia 2:11

Iwe, lon ewe rän, chomong chon ekewe mwü repwe feito ren ewe Samol mi Lapalap o wiliti nöün aramas. Iwe, i epwe imweimw lefilemi, nge ämi oupwe silei pwe ewe Samol mi Unusen Manaman a tinieito remi.

Lukas 12:1

Lon ena fansoun, lupwen chomong ngeröün aramas ra chufengen pwe ra chök ipwerifengeniir, Jesus a akomwen kapas ngeni nöün kewe chon kaiö, “Oupwe afälikemi ren ewe iis än ekewe Farisi, wewen ar likatuputup.

Lukas 21:36

Oupwe mamasa o iotek fansoun meinisin, pwe epwe wor ämi pöchökül pwe oupwe tongeni sü seni ekei mettoch meinisin lupwen repwe fisitä o oupwe tongeni ütä me mwen Nöün Aramas.”

Johannes 12:13

Iei mine ra angei palen ewe irä palm o feila pwe repwe churi. Iwe, ra osomong le kökkö, “Mwareiti Kot! Feiöchün ätewe a feito fän iten ewe Samol! Feiöchün ewe kingen Israel.”

Nöün Paulus Toropwe ngeni ekewe Souläng lon Rom 11:25

Ämi pwii kana, mi wor eu monomon mi enlet üa mochen pwe ämi oupwe silei, pwe ousap ekieki püsin ämi tipachem. Iei ewe monomon: Än chon Israel ülöförea lon letiper esap soposopola, nge epwe chök müchüla lupwen epwe unus iteiten chon lükün Israel repwe feito ren Kot.

Efisos 6:13

Iei mine oupwe pwilitalong womi än Kot kewe pisekin maun iei! Mürin, lupwen epwe war ewe rän mi ngau, oupwe tongeni pworacho ngeni än ewe chon oputemi maun ngenikemi. Iwe, mürin oupwe chök üpöchökül tori lesopolan ämi maun.

Ipru 11:12

Inamwo ika Apraham a usun chök eman mi mäla, seni ei chök eman mwän a wor chomong mwirimwirin usun chomongun ekewe fü, pwal usun chomongun ekewe pien aroset.

Ipru 12:22

Nge ämi oua feito ngeni ewe Chuk Sion, pwal ngeni ewe telinimwen ewe Kot mi manau, ewe Jerusalem mi nom läng fiti ngeröün chon läng.

Pwärätä 11:15

Mürin ewe afümanün chon läng a ettiki nöün rappwa, iwe, a wor chomong möngüngü mi leüömong lon läng, ra apasa, “Ewe manamanen nemeni fanüfan, iei a nom ren ach Samol me nöün we Messaia. Iwe, epwe nemenem tori feilfeilachök.”

Pwärätä 22:3

Esap wor och mi nom fän än Kot anümamau epwe nonom lon ewe telinimw. Än Kot me ewe Lam lenien motun king epwe nom lon ewe telinimw o nöün kewe chon angang repwe angang o fel ngeni.

Pwärätä 3:18

Iei mine üpwe ürenuk mine kopwe föri: Kopwe kamö seniei kolt mi limelim ren ekkei, pwe kopwe pisekisekila. Kopwe pwal kamö üf mi pwechepwech, pwe kopwe üföüf o pwölüela asäwen om selela. Kopwe pwal kamö säfeen mas, pwe kopwe säfeeni mesom pwe kopwe tongeni küna mwomw.

Pwärätä 4:4

Iwe, pwelin ünükün ewe lenien motun king a wor rüwe me rüanü lenien motun king ia rüwe me föman souakom ra mot ie, ra üföüf üf mi pwechepwech o mwärämwär mwärämwär seni kolt.

Pwärätä 5:11

Mürin üa nenengeni o rongorong möngüngün chomong ngeröün chon läng. Ra ütä pwelin ünükün ewe lenien motun king, pwal ünükün ekewe föman mönümanau me ekewe souakom,

Pwärätä 5:9

Iwe, ra kölü echö köl mi fö: “En ka fich ngeni om kopwe angei ewe toropwe mi numunumula, ka pwal fich ngeni om kopwe ülei pwaun kewe. Pun en ka ninnila, nge ren chaom ka möni aramas fän iten Kot, ekewe aramas seni ekewe ainang me kapas me mwü me sokopaten aramas meinisin.

Pwärätä 6:11

Mürin Kot a ngeni eman me eman leir echö üf mi pwechepwech o a üreniir, pwe repwe mwo asösö ekis chök fansoun mochomoch, tori epwe unus iteiten chiechier kewe chon angang me pwiir kewe repwe ninnila usun chök ir.

Pwärätä 7:8

seni ewe ainangen Sepulon engol me ruungeröü, seni ewe ainangen Josef engol me ruungeröü, seni ewe ainangen Peniamin engol me ruungeröü.