Pwärätä 19:12 - Chuukese Bible

¹² Mesan kana ra usun chök ngetengeten ekkei, nge a mwärämwär chomong mwärämwär won möküran. A wor eu it a mak won inisin, esap wor eman a silei pwe i chök.

Pwärätä 19:12 Iomraidhean Croise

Keneses 32:29

Mürin, Jakop a tüngor ngeni ewe mwän, “Kose mochen kopwe asile ngeniei itom.” Nge i a pälüeni, “Pwota ka ais itei?” Iwe, a afeiöchü Jakop ikenan.

Kölfel 8:5

Nge ka föri i pwe epwe ekis kis fomw en ai Kot, ka ämwärämwära ngeni ling me iteüöch.

Ekistos 23:21

Oupwe aüselinga alon o aleasochis ngeni, pun ngang üa tinala remi. Ousap ü ngeni, pun esap amusala ämi ü ngeni.

Än Salomon Fos 30:4

Iö a feitä läng o liwinsefälitiu? Iö a tongeni kumwuchufengeni asepwäl? Iö a tongeni üfätä ekewe koluk lon echö üf? Iö a förätä kiännin fanüfan meinisin? Ifa itan? Nge ifa iten nöün we mwän? Kopwe üreniei are ka silei!

Än Salomon Köl 3:11

Oupwe towu, ämi föpwülün Sion, pwe oupwe nengeni ewe king Salomon mi mwärini ewe mwärämwär inan a amwärämwära ngeni lon ränin an apwüpwülü, lon ewe rän letipan a fokun pwapwa.

Aisea 62:3

Kopwe wewe ngeni epa mwärämwär mi ling lepöün ewe Samol mi Lapalap, kopwe pwal wewe ngeni epa mwärin king lepöün om we Kot.

Aisea 9:6

Pun eman mönükol a uputiu rech. Kot a lifang ngenikich eman ät, i epwe ach sounemenem. Iwe, epwe iteni “Souekiek mi amwarar, Kot mi manaman, Samach mi nom tori feilfeilachök, pwal Samolun kinamwe.”

Taniel 10:6

Inisin a usun chök ewe fau aüchea itan kirisolait, won mesan a usun chök fifi, lon mesan a usun chök pulopulen töl, pöün me pechen ra usun chök piras mi meriweriw, nge mwelian a usun chök leüömongun eu mwicheichen aramas.

Sekaraia 9:16

Lon ena fansoun ewe Samol mi Lapalap ar we Kot epwe amanaua nöün aramas, usun eman chon mas a amanaua nöün pwiin sip seni feiengau. Repwe molupolup lon fanüan usun fau aüchea ra molupolup won epa mwärämwär.

Mateus 11:27

“Semei a ngeniei mettoch meinisin. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a afiliir an epwe pwäri i ngeniir.

Mateus 21:5

“Oupwe üreni chon ewe telinimw Sion: Nengeni ämi king a feito remi! A tipetekison o wawa eman aas, me eman nienifön aas.”

Mateus 28:18

Nge Jesus a kan ngeniir o üreniir, “Nemenem meinisin won läng me fanüfan a toriei.

Lukas 10:22

“Semei a anomu mettoch meinisin fän nemeniei. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”

Johannes 17:11

Iwe, iei üpwe feila reöm. Üsap chüen nom lon ei fanüfan, nge ir ra nom lon ei fanüfan. Semei mi pin, kose mochen kopwe tümwünüür ren manamanen itom we, ewe it ka ngeniei, pwe ir repwe eu usun chök en me ngang sia eu.

Johannes 17:12

Lupwen ngang üa nom rer, üa tümwünüür ren manamanen itom we, ewe it ka ngeniei. Üa tiirela, pwe esap wor eman me leir a pöütüla, chilon chök ewe eman mi feil ngeni an epwe pöütüla, pwe epwe pwönüetä mine a mak lon ekewe Toropwe mi Pin.

Efisos 1:21

Kraist a watte an nemenem ikenan lap seni ekewe sounemenem lon läng, seni ekewe manaman me ekewe samol. Wisan a tekia seni wisen ekewe sounemenem lon ei fansoun pwal lon ekewe fansoun repwe feito.

Ipru 2:9

Nge sia küna Jesus, ewe Kot a föri pwe epwe kis fän ekewe chon läng lon fansoun mochomoch, pwe ren än Kot ümöümöch epwe mäla fänäsengesin aramas meinisin. Iwe, iei sia küna i, pwe a mwärini ling me iteüöch pokiten an riaföü me mäla.

Pwärätä 1:14

Meten möküran a pwechepwech usun pwechen ülen sip, ika pwech usun pwechepwechen sno. Föün mesan ra wewe ngeni pulopulen ekkei,

Pwärätä 12:3

Pwal eu asisil a pwä me lon läng. A wor eman trakon mi watte o parapar, a wor fisu möküran me engol mächän, nge a wor epa mwärämwär won eu me eu möküran kewe.

Pwärätä 13:1

Mürin üa küna eman manmwacho a feitä seni lon ewe matau. A wor engol mächän me fisu möküran. Iwe, efoch me efoch ekewe mächä a wor epa mwärämwär won, nge won eu me eu kewe mökür a mak eu it mi turunufasei Kot.

Pwärätä 19:16

Won üfan pwal won wilan a mak ewe it, “Ewe King mi tekia seni ekewe king meinisin, me ewe Samol mi lap seni ekewe samol meinisin.”

Pwärätä 3:12

Iö mi pwora ngeni mine a ngau üpwe föri pwe epwe efoch ür lon än ai we Kot we imwenfel, nge esap chüen towu seni. Iwe, üpwe makkei won iten ai we Kot, pwal iten än ai we Kot we telinimw, ewe Jerusalem mi fö, epwe feitiu me läng seni ai we Kot, üpwe pwal makkei won itei we mi fö.

Pwärätä 6:2

Iwe, üa nenengeni o üa küna eman oris mi pwechepwech, nge ewe mi mot won a amwöchü efoch likapich, a pwal angei epa mwärämwär. Iwe, a feila, a pwora o win.

Soukapwüng 13:18

Nöün ewe Samol mi Lapalap we chon läng a pälüeni, “Pwota ka ais itei? Pun itei a men amwarar.”