Pwärätä 15:4 - Chuukese Bible

⁴ Iö esap niuokusituk o alinga itom, en äm Samol? Pun en chök ka pin. Chon ekewe mwü meinisin repwe feito o fel ngonuk, pun om kewe föför mi pwüng ra pwäpwäla ngeni aramas meinisin.”

Pwärätä 15:4 Iomraidhean Croise

Kölfel 105:7

Ewe Samol mi Lapalap i ach we Kot, an kewe allük ra fän iten unusen fanüfan.

Kölfel 111:9

A angasala nöün aramas o föri eu pwon esemüch. Itan a pin o eniweniu.

Kölfel 22:23

Ämi mi niuokusiti ewe Samol mi Lapalap, oupwe mwareiti i, ämi mwirimwirin Jakop meinisin oupwe alinga i, ämi chon Israel meinisin oupwe fokun meniniti i.

Kölfel 22:27

Chon fanüfan meinisin repwe chechemeni ewe Samol mi Lapalap o kuliti i. Chon ekewe ainang seni ekewe mwü meinisin repwe fel ngeni.

Kölfel 22:3

Nge en ka pin. Ka mot won om lenien motun king, en ewe chon Israel ra kölün mwareiti.

Kölfel 86:9

Chon ekewe mwü meinisin ka föriir repwe feito o fel ngonuk, ai Samol mi Lapalap, repwe pwal alinga itom.

Kölfel 89:7

En ewe Kot ewe mwichen chon pin a niwelapeituk. Ka kon eniwokus lap seni meinisin mi nom ünükumw.

Kölfel 97:8

Sion a rongorong ei o pwapwa. Ekewe telinimwen Juta ra meseik pokiten om kewe apwüng, ai Kot.

Kölfel 99:5

Oupwe ingeiti ewe Samol mi Lapalap ach Kot, oupwe fel ngeni me mwen alongolongun pechen. I a pin.

Kölfel 99:9

Oupwe ingeiti ewe Samol mi Lapalap ach we Kot o fel ngeni me arun chukun we mi pin, pun ewe Samol mi Lapalap ach Kot a pin.

Aisea 24:15

nge chokewe mi nom ötiu repwe mwareiti i. Ekewe aramas mi nom aroset repwe mwareiti ewe Samol mi Lapalap, ewe Koten Israel.

Aisea 25:3

Iei mine aramasen ekewe mwü mi pöchökül repwe alingok, aramasen ekewe telinimw mi mwänewüs repwe niuokusituk.

Aisea 26:9

Iwe, üa posituk lepwin, üa küttok ren unusen letipei. Lupwen ka apwüngü fanüfan, chon fanüfan ra kaiö mine a pwüng.

Aisea 45:23

Iwe, üa püsin akapelüei, nge kapasen awei a let, esap pwal siwil, ‘Aramas meinisin repwe feito o fotopwäsuk ngeniei, nge ir meinisin repwe pwon fän akapel, pwe repwe allükülük ngeniei.’

Aisea 57:15

Pun iei alon Ewe mi Unusen Tekia, ewe mi manau tori feilfeilachök, itan Ewe mi Pin, “Ngang üa imweimw lon eu leni mi pin o tekia, pwal ren eman mi luketatakis o tipetekison, pwe üpwe amanaua ngüngün chon tipetekison o apöchöküla leluken chon liamam.

Aisea 6:3

Iwe, ra kökköfengen lefiler, “A pin, a pin, a pin ewe Samol mi Unusen Manaman. Unusen fanüfan a ur ren lingan.”

Aisea 60:5

Iwe, lupwen kopwe küna ei, kopwe wosaramaram, lelukom epwe pwapwa o mwänek. Pun feiöchün lematau epwe toruk, kopwe pwal wöüni wöün ekewe mwü.

Jeremaia 10:7

Ifa usun, iö esap meninituk, en ewe kingen ekewe mwü? A pwüng ngonuk pwe aramas repwe meninituk. Esap wor eman me lein ekewe mi tipachem meinisin me lon ekewe mwü ika me lein ar kewe king a wewe ngonuk.

Jeremaia 16:19

Ai Samol mi Lapalap, en ai pöchökül me imwei imwen maun, en ai lenien op lon fansoun riaföü. Chon ekewe mwü repwe feito reöm seni lesopun fanüfan o apasa, “Esap wor och äm kewe lewo ra fel ngeni, ngei kot mi mwäl, ekewe uluulun anümwäl mi lomotongau.

Jeremaia 5:22

Ngang ewe Samol mi Lapalap, pwota ousap meninitiei? Pwota ousap chechech me fän mesei? Üa anomu pi pwe kiännin matau, eu epet mi nom fochofoch esap tongeni tö ren sät. Inamwo ika ekewe no ra watte, resap tongeni lu seni ewe kiä, inamwo ika a wor öütöüt, nge esap tongeni atai.

Osea 3:5

Mürin, ekewe chon Israel repwe kul o kütta ewe Samol mi Lapalap ar we Kot, pwal eman mwirimwirin Tafit ar we king. Repwe feito ren ewe Samol mi Lapalap fän chechech o angei an feiöch lon fansoun epwe feito.

Apakuk 1:12

Ai Samol mi Lapalap, en ai Kot Ewe mi Pin, en ka nom seni fansoun esepop tori fansoun esemüch. Iei mine äm aisap fokun mäla. Nge en, ai Samol mi Lapalap, en ka filätä ekewe chon Papilon pwe repwe ärikeemila, en äm Achau ka awiseer pwe repwe apwüngükem.

Sekaraia 14:16

Mürin, meinisin mi chüen manau me lein chon ekewe mwü mi maun ngeni Jerusalem repwe feila Jerusalem iteiten ier pwe repwe fel ngeni ewe King, ewe Samol mi Unusen Manaman, o eti ewe chulapen likachoch.

Sekaraia 2:11

Iwe, lon ewe rän, chomong chon ekewe mwü repwe feito ren ewe Samol mi Lapalap o wiliti nöün aramas. Iwe, i epwe imweimw lefilemi, nge ämi oupwe silei pwe ewe Samol mi Unusen Manaman a tinieito remi.

Malakai 1:11

Pun seni ewe ia akkar a töta me ie tori ewe ia a tuputiu me ie chon ekewe mwü ra asamolu itei. Ekis meinisin ra eäni asor apach mi pwokus ngeniei, eu asor mi limöch. Pun chon ekewe mwü ra asamoluei.

Nöün Paulus Toropwe ngeni ekewe Souläng lon Rom 15:9

epwe pwal atufichi ekewe chon lükün Israel pwe repwe mwareiti Kot ren an we tong, usun a mak lon ekewe Toropwe mi Pin, “Iei mine üpwe kilisou ngonuk me lein ekewe chon lükün Israel, üpwe kölün mwareiti itom.”

1. Petrus 1:16

Pun a mak lon ekewe Toropwe mi Pin, “Oupwe pin, usun ngang üa pin.”

Pwärätä 11:15

Mürin ewe afümanün chon läng a ettiki nöün rappwa, iwe, a wor chomong möngüngü mi leüömong lon läng, ra apasa, “Ewe manamanen nemeni fanüfan, iei a nom ren ach Samol me nöün we Messaia. Iwe, epwe nemenem tori feilfeilachök.”

Pwärätä 14:7

A apasa ren mwelian mi leüömong, “Oupwe asamolu Kot o mwareiti an tekia! Pun a war ewe fansoun pwe epwe apwüngü chon fanüfan. Oupwe fel ngeni ewe mi föri läng me fanüfan, matau me ekewe lenien puächen koluk!”

Pwärätä 16:5

Iwe, üa rongorong pwe ewe chon läng mi wisen tümwünü ekewe koluk a apasa, “Pwüngün om kewe kapwüng ra pwüng. En ewe mi Pin, ka nom iei o ka fen nonom!

Pwärätä 16:7

Mürin üa rongorong mwelien eman seni ewe rongen asor a apasa, “Kot, Samol mi Unusen Manaman! Pwüngün om kewe kapwüng ra wesewesen let o pwüng!”

Pwärätä 19:2

An kewe kapwüng ra let o pwüng! A apwüngü ewe fin lisowu mi iteföüla, a angauala chon fanüfan ren an föförün lisowu. Kot a ngeni chappen an föför, pun a niela nöün kewe chon angang.”

Pwärätä 19:8

Kot a ngeni echö üf mi limöch, a pwechepwech o molupolup pwe epwe üföüf.” (Ewe üf mi pwechepwech iei än ekewe chon pin föför mi pwüng.)

Pwärätä 3:7

“Kopwe makkei ngeni ewe chon künöön ewe mwichefel lon Filatelfia: Iei alon ewe eman mi pin o let, ewe mi amwöchü ewe ki än Tafit. Iwe, met a suki ngeni ewe ki esap wor eman a tongeni öpüngala, nge met a öpüngala esap wor eman a tongeni suki.

Pwärätä 4:8

Eman me eman ekewe föman mönümanau a wor wonofoch pöükässin, nge won me fän pöükässiir ra kula ren föün mas. Lerän me lepwin resap ükütiu le kölü ei köl: “A pin, a pin, a pin ewe Samol Kot mi Unusen Manaman, i ewe a fen nonom, ewe a nom iei me ewe epwe feito me mürin.”

Pwärätä 6:10

Ra kökkö fän mwelier mi leüömong, “Äm Samol mi Unusen Manaman, ka pin o let. Ifa langatamen fansoun tori om kopwe apwüngü ekewe aramas won fanüfan o kopwe ngeniir chappen ar nikeemila?”

1. Samuel 2:2

Esap wor eman mi pin usun ewe Samol mi Lapalap, esap wor eman lükün i, esap pwal wor eu achau usun ach we Kot.