Pwärätä 13:8 - Chuukese Bible

⁸ Iwe, aramas meinisin mi nom won fanüfan repwe fel ngeni, chilon chök chokewe iter a mak lon ewe puken iten chon manau me mwen än Kot esamwo föri fanüfan, iei ewe puk än ewe Lam mi ninnila.

Pwärätä 13:8 Iomraidhean Croise

Keneses 22:7

Isaak a kapas ngeni Apraham, “Semei!” Nge i a aisini, “Met ka mochen, nei?” Iwe, Isaak a pälüeni, “Üa küna pwe a wor rech ekkei me mwüch, nge ifa ewe sip sipwe eäni asoren kek?”

Kölfel 69:28

Kopwe amoela iter seni ewe puken manau, nge kosap makelong iter lein chon pwüng.

Ekistos 32:32

Iwe, kose mochen kopwe amusala ar tipis. Nge ika kosap mochen, üa tüngor ngonuk, kopwe pwal talawu itei seni om puk ia ka makei iten noum kana ie.”

Aisea 4:3

Iwe, ekewe aramas mi chüen manau lon Sion pwal lon Jerusalem repwe iteni chon pin, ir meinisin mi mak iter lon ewe puk pwe ra manau lon Jerusalem.

Taniel 12:1

Iwe, ewe chon läng a pwal üra, “Lon ewe fansoun Mikael ewe samolun chon läng kana, ewe chon peni aramasom, epwe war. Epwe wor eu fansoun riaföü esamwo fis seni me lom, lupwen mwü rekärän poputä tori ei fansoun. Nge lupwen epwe tori ei fansoun, aramasom meinisin mi mak iter lon nöün Kot we puk repwe küna manau.

Mateus 25:34

Mürin ewe king epwe üreni ekewe aramas mi nom lepelifichin, ‘Oupwe feito ämi mi feiöch me ren Semei! Oupwe mwüni ewe mwü mi molotä fän itemi seni lepoputän fanüfan.

Lukas 10:20

Nge ousap pwapwa pwe ekewe ngününgau ra aleasochisikemi, nge oupwe pwapwa pwe itemi a mak lon läng.”

Johannes 1:29

Iwe, sorotän ewe rän Johannes a küna pwe Jesus a feito ren, iwe, a apasa, “Iei i ewe Lamen Kot a uweela tipisin chon fanüfan.

Efisos 1:4

Kot a afilikich lon Kraist me mwen än fanüfan esamwo fis, pwe sipwe pin o unusöch me mwen mesan.

Filipi 4:3

Iwe, pwal en chienei chon angang mi allükülük, üa tüngor ngonuk pwe kopwe alisi ekei fefin, pun ra fokun angang weires o etiei le arongafeili ewe Pworausen Manau, irfengen me Klement me pwal ekewe ekoch mi etiei lon ewe angang, ir chokewe meinisin mi mak iter lon än Kot we puken iten chon manau.

Titus 1:2

Iei ewe let mi longolong won ach apilükülük ngeni ewe manau esemüch. Kot, ewe esap chofona, a pwon ngenikich ei manau me mwen fansoun esepop,

Pwärätä 12:15

Mürin ewe trakon a kusufawu me lon awan eu chanpupun koluk mürin ewe fefin, pwe epwe öütela ren.

Pwärätä 13:12

A aea än ewe aemanün manmwacho nemenem mi watte me mwen mesan. A pöchökül ngeni chon fanüfan meinisin, pwe repwe fel ngeni ewe aemanün manmwacho, ewe kinasan we a mola.

Pwärätä 17:8

Ewe manmwacho ka küna a manau me lom, nge iei esap chüen manau, epwele feitä seni lon ewe pwang mi alolol pwe epwe tolong lon feiengauen pöütmwälila. Ekewe aramas mi nom won fanüfan iter esap mak lon ewe puken iten chon manau me mwen än Kot esamwo föri fanüfan, ir meinisin repwe mairü lupwen repwe nenengeni ewe manmwacho, pun a manau me lom o iei esap chüen manau, nge epwe pwal pwäsefäl.

Pwärätä 21:27

Nge esap fokun wor och mi limengau epwe tolong lon ewe telinimw, ika eman mi föri föför mi asäw, ika eman mi chofona. Pun chokewe chök a mak iter lon än ewe Lam puken iten chon manau repwe tolong lon ewe telinimw.

Pwärätä 3:10

Pokiten ka tümwünü ai kewe kapas, pwe kopwe likitü fän mosonotam, üpwe pwal tümwünuk seni ewe fansoun riaföü epwe feito won unusen fanüfan, pwe epwe sotuni aramas meinisin mi nom won fanüfan.

Pwärätä 3:20

Nengeni, üa ü lükün asam o fichifich. Are eman epwe rongorong mweliei o suki ewe asam, üpwe tolong ren o mongö ren, nge i epwe mongö rei.

Pwärätä 3:5

Iö mi pwora ngeni mine a ngau epwe üföüf ei sokun üf mi pwechepwech, iwe, üsap amola itan seni ewe puken iten chon manau. Nge üpwe pwärätä pwe i nei mwen mesen Semei, pwal mwen mesen nöün kewe chon läng.

Pwärätä 5:12

ra köl ren ngingi mi leüömong: “Ewe Lam mi ninnila a fich ngeni an epwe angei manaman, wöü, tipachem me pöchökül, iteüöch, ling me ingemwar.”

Pwärätä 5:13

Iwe, üa rongorong pwe förien Kot meinisin lon läng pwal won fanüfan, lon lenien failol pwal lon matau ra kölü ei köl: “Ingemwar me iteöch me ling me manaman ngeni ewe mi mot won ewe lenien motun king me ewe Lam tori feilfeilachök.”

Pwärätä 6:1

Mürin üa küna pwe ewe Lam a ülei ewe aeuin pwau seni ekewe fisu. Iwe, üa rongorong pwe eman me lein ekewe föman mönümanau a apasa ren mwelian mi wewe ngeni chopun chopulap, “Etto!”