Nehemia 9:32 - Chuukese Bible

³² Äm Kot, en eman Kot mi tekia o manaman, aramas ra niuokusituk, ka apwönüetä om pwon me tong ellet ngenikem. Iei mine kopwe ekieki usun ekewe riaföü meinisin ra torikem, ra tori äm kewe king me samol, nöüm kewe souasor me soufos, äm kewe lewo me nöüm kewe aramas meinisin seni fansoun mwün ekewe kingen Asiria tori ikenai.

Nehemia 9:32 Iomraidhean Croise

1. King 8:23

o iotek, “Ai Samol mi Lapalap, Koten Israel, esap wor eman kot a wewe ngonuk lon läng ika won fanüfan. Ka apwönüetä om pwon o pwäri om tong ellet ngeni noum kewe chon angang mi föri letipom ren unusen leluker.

2. King 15:19

Iwe, Tiklat-pileser ewe kingen Asiria a tolong lon ewe fanü pwe epwe maun ngeni. Nge Menahem a ngeni Tiklat-pileser ilik me walu ton silifer pwe epwe alisi le anüküchara an nemenem.

2. King 15:29

Iwe, lupwen Peka a kingen Israel, Tiklat-pileser ewe kingen Asiria a feito o liapeni ekewe telinimw Ion, Apel-petmaka, Janoa, Ketes, Hasor, pwal ekewe fanü Kiliat, Kaliläa me Naftali. A pwal uweela ekewe aramas chon oola ngeni Asiria.

2. King 17:23

tori ewe Samol mi Lapalap a asürela seni fän mesan, usun nöün kewe chon angang meinisin ekewe soufos ra fen apasa fän alon. Iei usun chon Israel ra oola seni fanüer o nom lon Asiria tori ikenai.

2. King 17:3

Iwe, Salmaneser ewe kingen Asiria a maun ngeni Hosea. Nge Hosea a fangatä o takises ngeni.

2. King 17:6

Nge lon atiuen ierin mwün Hosea, ewe kingen Asiria a liapeni Samaria. A uweela ekewe chon Israel ngeni Asiria o anomu ekoch lon ewe telinimw Hala, ekoch lon Kosan arun ewe chanpupu Hapor, pwal ekoch lon ekewe telinimwen chon Metia.

2. King 23:29

Lupwen fansoun än Josia nemenem, Farao Neko ewe kingen Isip a feila ngeni ewe chanpupu Oifrat, pwe epwe alisi ewe kingen Asiria. Iwe, ewe king Josia a feila pwe epwe maun ngeni. Nge lupwen ra maunfengen, Farao Neko a niela Josia me lon Mekito.

2. King 25:7

Iwe, ra niela nöün Setekia kewe mwän me fän mesan. Mürin ra alusawu föün mesan, ra föti ngeni sein seni piras o uwala Papilon.

Esra 4:10

me lusun chon ekewe mwü, Osnapar ätewe mi tekia o iteföüla a uweerela o anomuur lon ekewe telinimwen Samaria, pwal lon ewe fanü lotoun ewe chanpupu Oifrat.

Esra 4:2

ra feito ren Serupapel me ekewe mwänirelan än semelaper kewe cho o üreniir, “Oupwe mwüt ngenikem pwe aipwe etikemi le aüetä ewe imwenfel. Pun äm aia fel ngeni ewe Kot ämi oua fel ngeni. Äm aia pwal asor ngeni seni fansoun mwün Esar-haton ewe kingen Asiria mi tinikeemito ikei.”

Esra 9:13

Iei mwo ekei riaföü ra fis ngenikem pokiten äm kewe föför mi ngau me äm kewe tipis mi chomong, nge äm aia silei pwe om apwüngükem, en äm Kot, a kis seni liwinin äm tipis, ka pwal mwüt ngenikem ekoch mi chüen manau.

Nehemia 1:5

Üa apasa, “Ai Samol mi Lapalap Koten läng, en ewe Kot mi tekia, äm aia niuokusituk. Ka apwönüetä om pwon me tong ellet ngeni chokewe mi echenuk o aleasochisi om kewe allük.

Kölfel 47:2

Sipwe niuokusiti ewe Samol mi Lapalap, Ewe mi Unusen Tekia, i eman king mi lap a nemeni unusen fanüfan.

Kölfel 66:3

Oupwe apasa ngeni Kot, “Om kewe föför ra fokun amwarar. Om kewe manaman ra kon lapalap, pwe chon oputok ra chapetiu me mwom fän niuokus.

Kölfel 66:5

Oupwe feito o nenengeni mine Kot a föri. An kewe föför me lein aramas ra fokun amwarar.

Ekistos 18:8

Mürin, Moses a apworausa ngeni semen pwülüan we meinisin mine ewe Samol mi Lapalap a föri ngeni Farao me chon Isip meinisin, lupwen a angasa chon Israel. A pwal apworausa ngeni usun chomong weires a toriir lupwen ar sai, pwal usun än ewe Samol mi Lapalap amanaueer.

Aisea 9:6

Pun eman mönükol a uputiu rech. Kot a lifang ngenikich eman ät, i epwe ach sounemenem. Iwe, epwe iteni “Souekiek mi amwarar, Kot mi manaman, Samach mi nom tori feilfeilachök, pwal Samolun kinamwe.”

Taniel 9:4

Mürin üa iotekin amusamus ngeni ewe Samol mi Lapalap ai we Kot, “Ai Samol me ai Kot, en eman Kot mi tekia me eniuokus, ka tümwünüöchü om pwon, ka pwal tongei chokewe mi echenuk o föri pwüngün om kewe allük.

Taniel 9:6

Äm aisap aüselinga alon ekewe soufos noum kewe chon angang, ra kapas fän itom ngeni äm kewe king me samol, pwal ngeni äm kewe lewo me aramasen ewe fanü meinisin.

Taniel 9:8

Ewer, äm Samol, äm me äm kewe king, äm samol me äm kewe lewo äm aia föri föförün äsäw o tipis ngonuk.

Lifitikos 26:18

Lupwen ekei feiengau ra torikemi, nge ousap mochen aleasochisi aloi, üpwe awatteloi ai apwüngükemi fän fisu pokiten ämi tipis.

Lifitikos 26:21

Mürin, are oua chüen lükümach ngeniei pwe ousap mochen aleasochisi aloi, üpwe awatteloi ämi riaföü, pwe epwe fän fisu lap seni me mwan pokiten ämi tipis.

Lifitikos 26:24

mürin ngang üpwe pwal ü ngenikemi o afeiengauakemi fän fisu lap seni me mwan pokiten ämi tipis.

Lifitikos 26:28

mürin üpwe pwal ü ngenikemi lon ai song o püsin emiritikemi fän fisu lap seni me mwan pokiten ämi tipis.

Tuteronomi 7:12

“Iwe, are oupwe aüselinga ekei allük, are oupwe tümwünüöchü le apwönüretä, mürin ewe Samol mi Lapalap ämi we Kot epwe pwal apwönüetä an we pwon o pwäri an tong ngenikemi, usun a fen pwon fän akapel ngeni ämi kewe lewo.

Tuteronomi 7:13

Iwe, Kot epwe tongekemi, epwe afeiöchükemi o achomongakemi pwe epwe wor chomong mwirimwirimi. Epwe pwal afeiöchü uän fotämi irä, fotämi wiich, fotämi irän wain me irä olif. Epwe pwal achomongala nöümi pwiin kow me apanen nöümi pwiin sip me lon ewe fanü Kot a fen pwon fän akapel ngeni ämi kewe lewo pwe epwe ngenikemi.

Tuteronomi 7:21

Ousap fokun niuokusitiir, pun ewe Samol mi Lapalap ämi we Kot a nom remi, i eman Kot mi lapalap o eniwokus.

Tuteronomi 7:9

Iei mine oupwe silei pwe ewe Samol mi Lapalap ämi we Kot a wesewesen Kot, eman Kot mi allükülük, a tümwünü an pwon o pwärätä an tong ngeni ngeröün täppin aramas mi echeni o aleasochisi an allük kana.