Mateus 11:21 - Chuukese Bible

²¹ “Feiengauom Korasim! Feiengauom Petsaita! Are ekewe manaman mi fen fis me lomi repwe fen fis lon Tirus me Siton, ekewe aramas lon ekei telinimw repwe üföüf üf seni tuk me lomlom o amoratiu falang won mökürer, pwe asisilen ar kul seni tipis!

Mateus 11:21 Iomraidhean Croise

Hiop 42:6

Iei mine üa püsin atipisiei o ekieksefäl lon pwül me falang.”

Jeremaia 13:27

A küna om föför mi anioput ngeni. A küna om feila ren ekewe koten ekis won ekewe chukutekison, pwal lon ekewe mälämäl, usun eman mwän a mocheisou ngeni pwülüen chon arun, ika usun eman ätemwänin oris a mochenia ngeni eman liafefin. Feiengauom, en Jerusalem! Ifa ükükün fansoun om kopwe nom lon limengau?

Sowel 3:4

Ämi chon Tirus me chon Siton, pwäl ämi chon Filistia meinisin, met oua ekiekin föri ngeniei? Ifa usun, oua mochen liwini ngeniei mine üa föri ngenikemi? Are oua ekiekin föri ei, üpwe fokun müttir liwini ngenikemi liwinin ämi föför.

Amos 1:9

Iei alon ewe Samol mi Lapalap, “Chon Tirus ra chök sopwela le föri tipis, iei mine üpwe fokun apwüngüür. Ra liapeni o amömöla chon eu mwü meinisin ngeni Etom, nge resap chechemeni ewe pwonen pwipwi.

Mateus 11:22

Iwe, ngang üpwe fokun ürenikemi, pwe lon ewe ränin apwüng epwe kisikis feiengauen Tirus me Siton seni ämi feiengau.

Mateus 15:21

Mürin Jesus a feila seni ewe leni o feila lon eu fanü arap ngeni ekewe telinimw Tirus me Siton.

Mateus 18:7

Feiengauen fanüfan pokiten ekewe mettoch ra aselipato ngeni aramas ar repwe tipis! Ekei sokun mettoch repwe fokun fis fansoun meinisin, nge feiengauen ewe aramas a afisätä ekei mettoch.

Mateus 26:24

Nöün Aramas epwe mäla usun a fen mak lon ekewe Toropwe mi Pin, nge feiengauen ätewe mi afangamä Nöün Aramas! Epwe fen öch ngeni ei mwän are esap fen mwo nge uputiu!”

Markus 3:8

pwal seni Jerusalem me Itumea, seni ewe fanü ötiuen ewe chanpupu Jortan me ekewe fanü arun ekewe telinimw Tirus me Siton. Ekei aramas meinisin ra feito ren Jesus, pun ra rongorong meinisin mine Jesus a föri.

Markus 6:45

Iwe, lon ewe chök otun Jesus a apacheua nöün kewe chon kaiö, pwe repwe tötä won ewe wa o akomwola mwan Petsaita epek ewe noom. Nge i epwe üreni ekewe aramas pwe repwe liwinla ngeni lenier.

Markus 7:24

Mürin Jesus a feila seni ikenan o feila lon eu fanü arap ngeni ewe telinimw Tirus. Iwe, a tolong lon eu imw, nge esap mochen an eman epwe silei pwe a nom lon. Nge esap tufich an epwe opola.

Markus 7:31

Mürin, Jesus a feila seni ewe fanü Tirus o feila ngeni Siton tori ewe nomun Kalilea, nge a pwerelong lon ewe fanü itan Engol Telinimw.

Markus 8:22

Iwe, ra tori Petsaita. Ikenan ekoch aramas ra uwato ren Jesus eman mwän mi chun. Iwe, ra tüngormau ngeni pwe epwe atapa.

Lukas 4:26

Iwe, Kot esap tinala Elias ren eman lein ekewe fefin mi mä pwülüer lon Israel, nge a tinala ren eman fefin mi mä pwülüan lon Sarapat lon ewe fanü Siton.

Lukas 6:17

Lupwen Jesus a feitiu seni won ewe chuk me nöün kewe chon kaiö, a ütä lon eu leni mi sosonöch. Iwe, chomong nöün kewe chon kaiö ra mwicheto ren, pwal eu mwichen aramas mi chomong seni unusen ewe fanü Jutea, seni Jerusalem pwal seni ekewe telinimw Tirus me Siton mi nom aroset.

Lukas 9:10

Iwe, ekewe soukünö ra liwinsefäl o apworausa ngeni Jesus meinisin mine ra föri. Iwe, Jesus a emweniirela ngeni ewe telinimw Petsaita.

Johannes 1:44

(Filip i seni Petsaita ewe telinimw ia Andru me Petrus ra nom ie.)

Johannes 12:21

Ra feila ren Filip, ätei i seni Petsaita lon Kalilea. Iwe, ra üreni, “Äm samol, äm aia mochen churi Jesus.”

Föför 12:20

Iwe, Herotes a fokun song ngeni ekewe chon Tirus me Siton. Iei mine ekoch me leir ra tipeeufengen o feila pwe repwe churi Herotes. Ra akomwen aliapa Plastus, eman nöün ewe king nöüwis mi wisen nemelapei imwan, pwe epwe nom lon pekiir. Mürin ra feila ren Herotes o tüngor an epwe kinamwe ngeniir, pun ir me aramasen fanüer ra angei aner mongö seni fanüen ewe king.

Föför 27:3

Iwe, sorotän ewe rän aia ileiti Siton. Julius a kirikiröch ngeni Paulus o mwüt ngeni an epwe feila o churi chiechian kewe pwe repwe ngeni mine a osupwang ren.

Jutas 1:11

Epwe ifan me watten feiengauer! Ra manaueni manauen Kain. Ra atolongeer lon ewe sokun ruongau Pileam a föri fän iten ar repwe angei moni. Ra ü ngeni Kot usun chök Kora, iwe, repwe rosola usun chök i.

Pwärätä 11:3

Iwe, üpwe tinala nei kewe ruoman chon pwärätä mi üföüf üf seni tuk, repwe arongafeili än Kot kapas lon ekewe engöröü ruopükü wone rän.”

Pwärätä 6:12

Iwe, üa nenengeni pwe ewe Lam a ülei ewe awonuen pwau. A fis eu chechechin fanü mi fokun lapalap. Akkar a fokun rochola usun chök mangaku mi chol seni tuk, nge ewe maram a fokun parala usun chök paren cha.