Lukas 24:47 - Chuukese Bible

⁴⁷ Ren itan oupwe afalafala chon ekewe mwü meinisin, pwe repwe ekieksefäl, pwe Kot epwe amusala ar tipis, nge oupwe popuetä lon Jerusalem.

Lukas 24:47 Iomraidhean Croise

Keneses 12:3

Iwe, üpwe afeiöchü ekewe chon afeiöchuk, nge afeiengaua ekewe chon afeiengauok. Iwe, chon ekewe mwü meinisin won fanüfan repwe küna feiöch reöm.”

Kölfel 22:27

Chon fanüfan meinisin repwe chechemeni ewe Samol mi Lapalap o kuliti i. Chon ekewe ainang seni ekewe mwü meinisin repwe fel ngeni.

Kölfel 67:7

Kot a afeiöchükich. Chon fanüfan meinisin repwe asamolu i.

Kölfel 86:9

Chon ekewe mwü meinisin ka föriir repwe feito o fel ngonuk, ai Samol mi Lapalap, repwe pwal alinga itom.

Aisea 11:10

Lon ena fansoun epwe fis pwe ewe king mi fö seni mwirimwirin Tafit epwe ütä usun chök efoch asisil fän iten chon ekewe mwü meinisin. Iwe, repwe chufengen lon telinimwan mi ling o asamolu.

Aisea 49:22

Iei alon Kot ewe Samol mi Lapalap, “Nengeni, üpwe äkänipöü chon ekewe mwün lükün Israel, üpwe pwal aüetä ai asisil fän iten ekewe aramasen fanüfan. Iwe, repwe ekieto noum mwän lemolur, pwal noum fefin won afarer.

Aisea 49:6

Iwe, a apasa, “Kosap nei chök chon angang mi wisen achufengeni chon ekewe ainangen Israel o aliwinato chokewe mi chüen manau me leir. Nge üpwe pwal föri pwe kopwe eu saram fän iten chon ekewe mwü, pwe chon fanüfan meinisin repwe küna manau.”

Aisea 5:4

Ifa usun, a chüen wor och angang üsamwo föri fän iten ai tanipin wain? Pwota a chök afisätä ua mi ngau, lupwen üa witiwiti an epwe afisätä ua mi öch?

Aisea 52:10

Iwe, ewe Samol mi Lapalap a pwärawu an manaman mi pin ngeni chon ekewe mwü won fanüfan, nge lesopun fanüfan meinisin repwe küna pwe ach we Kot a amanaua nöün aramas.

Aisea 52:15

Ina usun chomong mwü won fanüfan repwe pwal mairü ren, nge king kana repwe fanafanala fän mesan. Pun repwe küna mine eman esap asile ngeniir, nge mine resamwo rongorong repwe ekieki usun o wewe ren.”

Jeremaia 31:34

Esap wor eman epwe chüen aiti ngeni chon arun ika pwiin an epwe sileei, pun ir meinisin repwe sileei seni ewe mi kis tori ewe mi lap. Iwe, üpwe amusala ar föföringau, nge üsap chüen chechemeni ar tipis. Ngang ewe Samol mi Lapalap üa kapas.”

Taniel 9:24

Iwe, a pwüngüla pwe ükükün fisu fän fik ier a kaüküla fän iten aramasom me om we telinimw mi pin. Mürin, pupungau epwe ükütiu, tipis epwe müchüla, epwe fis amusamusen tipis, nge pwüng esemüch epwe pwönüetä pwe alon soufos me künaer epwe fisitä, epwe pwal fis apinipinin ewe Leni mi Unusen Pin.

Osea 11:8

Ifa usun ai üpwe tongeni fangatä, en Israel? Ifa usun ai üpwe tongeni likitukela? Ifa usun ai üpwe ataakela usun ai ataela Atma? Ifa usun ai üpwe tongeni föri ngonuk usun mine üa föri ngeni Sepoim? Letipei a siwil, ai tong a pwichikar o nüküchar.

Osea 2:23

Üpwe fotukätiu nei aramas lon ewe fanü o efefeitäär. Üpwe pwäri ai chen ngeni chokewe mi iteni ‘Esechen’ o üreni chokewe mi iteni ‘Sap nei aramas’ pwe ir ‘Nei aramas’, nge ir repwe üra, ‘En äm we Kot!’”

Mika 4:2

Iwe, chomong aramas seni ekewe mwü repwe feito o apasa, “Ousipwe feitä won chukun ewe Samol mi Lapalap ren imwen än Jakop we Kot. I epwe aiti ngenikich mine sipwe föri, pwe sipwe tongeni föri letipan. Pun ewe allük epwe towu seni Sion, nge än ewe Samol mi Lapalap kapas epwe towu seni Jerusalem.”

Malakai 1:11

Pun seni ewe ia akkar a töta me ie tori ewe ia a tuputiu me ie chon ekewe mwü ra asamolu itei. Ekis meinisin ra eäni asor apach mi pwokus ngeniei, eu asor mi limöch. Pun chon ekewe mwü ra asamoluei.

Mateus 28:19

Oupwe feila o asoulängala chon ekewe mwü meinisin, oupwe papataisiir ngeni iten ewe Sam, ewe Nau me ewe Ngünmifel.

Mateus 3:2

Iwe, a apasa, “Oupwe aier seni ämi tipis, pun a arap Mwün Läng.”

Mateus 9:13

Oupwe feila o kütta wewen ei kapas lon ewe Toropwe mi Pin, ‘Üa mochen pwe aramas repwe eäni tong enlet, nge sap ar repwe asor man ngeniei.’ Ngang üsap feito pwe üpwe kökköri ekewe chon pwüng, pwe fen ekewe chon tipis.”

Lukas 13:34

“Ämi chon Jerusalem, ämi chon Jerusalem, oua niela ekewe soufos o monei fau ngeni ekewe chon künö Kot a tiniireto remi. Fän chomong üa mochen achufengeni nöümi aramas, usun eman chuko a achufengeni nöün fan pöükässin, nge ämi ousap mochen.

Föför 10:43

Ekewe soufos meinisin ra pwärätä usun i o apasa, pwe meinisin mi lükü i repwe küna amusamusen ar tipis kana pokiten itan.”

Föför 11:18

Lupwen ra rongorong ei pworaus, ra ükütiu le esita Petrus, ra mwareiti Kot o apasa, “Kot a pwal mwüt ngeni ekewe chon lükün Israel pwe repwe ekieksefäl o küna manau.”

Föför 13:46

Mürin Paulus me Parnapas ra pölüeniir fän pwora, “A pwüng ngenikem äm aipwe akomwen afalafala ngenikemi ewe kapasen Kot. Nge pokiten ousap etiwa, ousap pwal ekieki pwe oua fich ngeni ewe manau esemüch, aipwe likitikemi o feila ngeni ekewe chon lükün Israel.

Föför 2:38

Petrus a pölüeniir, “Ämi meinisin oupwe aier seni ämi tipis kana o papatais ngeni iten Jesus Kraist, pwe ämi tipis kana repwe musala. Iwe, oupwe angei an Kot we lifang, ewe Ngünmifel.

Föför 20:21

Üa apöchöküla ai fön ngeni ekewe chon Juta me ekewe chon lükün Israel, pwe repwe kul seni ar tipis kana o kul ngeni Kot, repwe pwal lükü ach Samol Jesus.

Föför 26:18

Kopwe aneloi meser, pwe repwe kul seni rochopwak o kul ngeni saram, repwe towu seni fän nemenien Satan o tolong fän nemenien Kot, nge ren ar lüküei repwe küna amusamusen ar tipis kana o angei lenier ren chokewe mi pin.’

Föför 26:20

Üa afalafal akom lon Tamaskus me Jerusalem, mürin lon unusen fanüen ekewe chon Juta, pwal lein ekewe chon lükün Israel, pwe repwe aier seni ar tipis o kul ngeni Kot, pwe repwe föri sokun föför mi pwärätä pwe ra ekieksefäl.

Föför 28:28

Iei mine ngang üa mochen pwe ämi oupwe silei, pwe än Kot kapasen manau a tori ekewe chon lükün Israel o ir repwe aüselinga.”

Föför 3:19

Oupwe ekieksefäl o kul ngeni Kot, pwe ämi tipis epwe mola,

Föför 4:12

Aramas repwe küna manau ren Jesus chök. Pun esap fokun wor pwal eu it won fanüfan Kot a ngeni aramas, pwe sipwe küna manau ren.”

Föför 5:31

Nge Kot a atekiatai o anomu lepelifichin pwe epwe Samol me Chon Amanau, pwe epwe awora ekieksefäl me amusamusen tipis ngeni chon Israel.

Nöün Paulus Toropwe ngeni ekewe Souläng lon Rom 5:20

Allük ra fisitä pwe ekewe föför mi mwäl repwe lapala. Nge ia tipis a lapala ie, än Kot ümöümöch a fokun lapalapala seni.

Efisos 1:6

Sipwe mwareiti Kot ren an we ümöümöch mi fokun amwarar, a lifang ngenikich lon püsin Nöün we mi achengicheng!

Efisos 3:8

Ngang ewe mi kis seni ekewe chon pin meinisin, nge Kot a ngeniei ei wis mi aüchea pwe üpwe uwei ngeni ekewe chon lükün Israel ewe Pworausen Manau usun ewe wöün Kraist esap wor epin,

Kolose 1:27

Kot a mochen pwe epwe pwäri ngeniir an we monomon mi aüchea o ling a amolätä fän iten aramas meinisin. Iei ewe monomon pwe Kraist a nonom lomi, i ach apilükülük pwe sipwe eti lon an ling.

1. Johannes 2:12

Ngang üa mak ngenikemi, nei kana, pun ämi tipis kana ra musala pokiten Kraist.