Kolose 1:10 - Chuukese Bible

¹⁰ Mürin oupwe tongeni manaueni eu manau mi fich ngeni ach Samol o oupwe föri mine epwe pwapwa ren. Iwe, epwe wor sokopaten föför mürina lon manauemi, oupwe mämäritä lon ämi silei Kot.

Kolose 1:10 Iomraidhean Croise

Efisos 4:1

Ngang eman chon fötek pokiten ai angang ngeni ach Samol, üa mochen pese ngenikemi pwe oupwe manaueni eu manau mi fich ngeni ewe kö seni Kot.

Ipru 13:21

epwe atufichikemi ren mettoch meinisin mi mürina, pwe oupwe föri letipan. Epwe föri loch ren Jesus Kraist mine i epwe pwapwa ren. Kraist epwe ling tori feilfeilachök! Amen.

1. Johannes 3:22

Sia angei seni Kot meinisin mine sia tüngor, pun sia aleasochisi an kewe allük o föri met epwe pwapwa ren.

Johannes 15:16

Ämi ousap afiliei, nge ngang üa afilikemi o awisakemi, pwe oupwe feila o uani ua mi chomong, ewe sokun ua mi nonomola. Iei usun Semei epwe ngenikemi meinisin mine oua tüngor fän itei.

1. Tesalonika 4:1

Ämi pwiim kana, iei soposopolan met oua kaiö senikem usun ewe sokun manau oupwe manaueni pwe oupwe apwapwai Kot ren. Ewer, iei usun mine oua fen manau lon. Nge iei äm aia tüngormau o pese ngenikemi fän iten ach Samol Jesus, pwe manauemi epwe fokun mürinala.

Ipru 13:16

Ousap manlükala ämi oupwe föri föför mi öch o alilisfengen lefilemi, pun ena sokun asor Kot a pwapwa ren.

Johannes 15:8

Iei chök mine Semei epwe küna ling ren, are oupwe uani ua mi chomong o pwärala pwe ämi nei chon kaiö.

Titus 3:14

Kopwe aiti ngeni chiechiach kewe souläng, pwe repwe fokun alomota ar fansoun le föri föför mürina, pwe epwe wor rer mine ra osupwang ren, pwe manauer esap lomotongau.

2. Petrus 3:18

Nge oupwe chök mämäritä lon än ach Samol me Chon Amanau Jesus Kraist ümöümöch me silelap. I epwe ling ikenai tori feilfeilachök. Amen.

Än Salomon Fos 16:7

Are än eman aramas föför a apwapwai ewe Samol mi Lapalap, i epwe pwal föri pwe chon oputan repwe kinamwe ngeni.

2. Petrus 1:8

Ikkei ekewe mettoch epwe wor remi, nge are a wor chomong remi, epwe fis ämi mwökütöch me lipwäköch lon ämi silei ach Samol Jesus Kraist.

Kolose 2:6

Pokiten oua fen etiwa Kraist Jesus pwe ämi Samol, oupwe le sopwela lon ämi nonom lon i.

Mika 4:5

Iwe, chon ekewe mwü meinisin ra fel o aleasochis ngeni ar kewe kot, nge kich sipwe fel o aleasochis ngeni ewe Samol mi Lapalap ach we Kot tori feilfeilachök.

1. Tesalonika 2:12

Äm aia apöchöküla letipemi o aururukemi, aia pwal allük ngenikemi pwe oupwe manaueni ewe sokun manau mi apwapwai Kot, ewe mi körikemi pwe oupwe eti i lon Mwün me lingan.

Kolose 4:5

Oupwe eäni tipachem lon ämi föför ngeni chokewe resap lükü, oupwe alomotöchü ämi fansoun.

Efisos 5:15

Iei mine oupwe afälikemi lon mine oua föri. Ousap föri föförün chon tiparoch, nge oupwe föri föförün chon tipachem.

Efisos 2:10

Pun Kot a förikich pwe sipwe eäni ei manau, a förikich lon Kraist Jesus pwe sipwe föri ekewe föför mi mürina a fen amolätä fän itach pwe sipwe föföri.

2. Korint 2:14

Nge kilisou ngeni Kot! Pun lon Kraist Kot a emwenikich fansoun meinisin, pwe sipwe eti Kraist lon an win. Kot a nöünöükich, pwe sipwe achöfetalei ewe pworaus usun Kraist pwe aramas repwe silei i, usun och löpwokus mi pwopwonfeil.

Nöün Paulus Toropwe ngeni ekewe Souläng lon Rom 6:4

Iwe, ren ach papatais sia peiasepök me i o eti i lon an mäla, pwe usun chök Kraist a manausefäl seni mäla ren amwararen manamanen ewe Sam, ina usun pwal kich sipwe manaueni eu manau mi fö.

Efisos 5:10

Oupwe achocho le kütta mine ach Samol epwe pwapwa ren.

Efisos 5:2

Chen epwe nemeni manauemi, usun Kraist a echenikich o fangala manauan fän itach pwe epwe eu asor mi pwoöch me eu lifang mi apwapwai Kot.

Filipi 1:27

Iwe, iei ewe mettoch mi aüchea, pwe lapalapen manauemi epwe fich ngeni ewe Pworausen Manau usun Kraist. Mürin ese lifilifil ika ngang üpwe tongeni feila churikemi ika üsap, nge üpwe rongorong pwe oua üppos lon eu chök popun, oua pwal achocho le ütä lon eu chök tip fän iten ämi lükü ewe Pworausen Manau.

Filipi 1:11

Iwe, manauemi epwe urela ren sokun föför mürina Jesus Kraist chök a tongeni afisätä, pwe Kot epwe ling o iteüöch ren.

1. Johannes 5:20

Sia pwal silei pwe Nöün Kot a feito o fang ngenikich ach weweöch, pwe sipwe silei ewe Kot mi let. Sia nonom lon ewe Kot mi let pwal lon Nöün we Jesus Kraist. I ewe Kot mi let me ewe manau esemüch.

Titus 3:1

Kopwe achema ngeni noumw kewe souläng, pwe repwe fokun aleasochis ngeni ekewe samol me sounemenem, repwe pwal molotä ngeni ar repwe föri sokun föför mi mürina.

Kolose 3:20

Ämi nau kana, oupwe aleasochisi sememi me inemi lon mettoch meinisin, pun iei met Kot a pwapwa ren.

Efisos 4:13

Iei usun oukich meinisin sipwe achufengenikich pwe sipwe eufengen lon ach lükü Jesus pwal lon ach sileöchü ewe Nöün Kot. Sipwe eäni tipen mwän lon manauach, pwe sipwe tori ükükün ewe unusöchün Kraist.

Apakuk 2:14

Nge än chon fanüfan silei lingen ewe Samol mi Lapalap epwe alolol usun matau a alolol.

Ipru 11:5

Ren än Enok lükü, a fis pwe esap mäla. Kot a angeatä läng, iei mine esap wor eman a chüen tongeni küna. Pun a mak lon ekewe Toropwe mi Pin, pwe mwen än Enok feitä läng, Kot a pwapwa ren.

2. Timoty 2:4

Eman sounfiu mi föri wisan a mochen föri met an samol epwe pwapwa ren, nge esap pachelong lon sokun angangen manauen aramas.

Kolose 2:19

a ükütiu le pach ngeni Kraist, i möküren ewe inis. Fän än Kraist nemenem unusen ewe inis a manauöch o chufengen ren ekewe kirupun lekupukup me ekewe wa mi pöchökül, a mämäritä usun Kot a mochen.

Filipi 4:18

Iei toropwen ekewe mettoch meinisin oua ngeniei, ewer, a fen somwosomwola. Iei a wor rei mettoch meinisin, pun üa angei seni Epafrotitus ekewe lifang oua tinato rei. Ekei lifang ra usun chök eu asor ngeni Kot mi poöch, eu lifang Kot a etiwa o pwapwa ren.

Efisos 1:17

o tüngor ngeni än ach we Samol Jesus Kraist we Kot, i Samach we mi ling, pwe epwe ngenikemi ewe Ngünmifel. I ewe mi atipachemakemi o asile ngenikemi usun Kot, pwe epwe lapala ämi silei i.

2. Korint 9:8

Iwe, Kot a tufichin fang ngenikemi sokopaten feiöch mi somwola, pwe fansoun meinisin epwe naf ngenikemi mettoch meinisin fän püsin itemi, epwe pwal somwola ämi pisekisek, pwe oupwe tongeni föri sokun föför mürina meinisin.

Johannes 17:3

Iwe, iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.

Taniel 12:4

Nge en Taniel, kopwe tukumala ekei kapas, kopwe numala ewe puk o fötala tori fansoun sopolan fanüfan. Iwe, chomong aramas repwe sotun kütta wewen, nge ar weweiti epwe lapala.”

Aisea 53:11

Iwe, wesin an riaföü lon manauan epwe eäni ewe saramen manau o pwapwa ren. Nge ren an silei Kot nei chon angang mi pwüng epwe afisätä än chomong aramas pwüng, epwe pwal uwei ar tipis.

2. Korint 4:6

Pun Kot, ewe mi apasa, “Saram epwe tinewu seni lon rochopwak”, i chök ewe Kot mi asarama letipem o ngenikem ewe saram, pwe aipwe silei usun än Kot we ling mi pwä won mesen Kraist.

Nöün Paulus Toropwe ngeni ekewe Souläng lon Rom 4:12

I pwal semelapen chokewe ra sirkomsais, nge sap pokiten ar sirkomsais, nge pokiten ra manaueni ewe chök manauen lükülük semelapach Apraham a eäni me mwen an sirkomsais.

Nöün Paulus Toropwe ngeni ekewe Souläng lon Rom 1:13

Ämi pwii kana, oupwe fokun chechemeni pwe fän chomong üa akota ai üpwe churikemi, nge a chök wor sokun epet a pineei fansoun meinisin ai üpwe feila remi. Ngang üa mochen asoulängala ekoch leimi, usun üa pwal föri me lein ekewe ekoch chon lükün Israel.

2. Korint 5:9

Iei mine sia fokun mochen apwapwai i, ese lifilifil ika sia nom lon inisich me ikei, ika lon inisich me läng.

3. Johannes 1:6

Ir ra apworausa ngeni chon ewe mwichefel ikei usun om tongeer. Kose mochen kopwe alisiir, pwe repwe tongeni sopwela ar sai lon met epwe apwapwai Kot.