Josua 4:3 - Chuukese Bible

³ Kopwe allük ngeniir pwe repwe angei engol me ruoföü fau seni lukalapen ewe chanpupu Jortan, seni chök ewe leni ia ekewe souasor ra ütä ie. Repwe uweerela pekila o iseniretiu lon ewe leni ia oupwe asösö ie lepwinei.”

Josua 4:3 Iomraidhean Croise

Keneses 28:22

Iwe, ewe fau üa aüetä pwe eföü föün achem epwe wiliti eu imwenfelin Kot, nge seni mettoch meinisin mine kopwe ngeniei üpwe ngonuk eu leengolun.

Kölfel 103:2

Ngüni, kopwe mwareiti ewe Samol mi Lapalap, kosap manlükala an kirikiröch ngonuk.

Kölfel 11:4

Ewe Samol mi Lapalap a nom lon imwan mi pin, än ewe Samol mi Lapalap lenien motun king a nom lon läng. A netiu won fanüfan o ouwasacha aramas meinisin, a pwal silei mine ra föri.

Lukas 19:40

Nge Jesus a pölüeniir, “Üpwe ürenikemi, are ätekei repwe fanafanala, ekewe fau repwe popuetä le pupuchör.”

Josua 24:27

Nge Josua a üreni ekewe aramas meinisin, “Nengeni, ewe fau epwe eu pisekin pwärätä ngenikich, pun a rongorong ekewe kapas meinisin ewe Samol mi Lapalap a ürenikich. Iei mine epwe eu pisekin atuttur ngenikemi, are oua ü ngeni ämi we Kot.”

Josua 3:13

Nge lupwen pechen ekewe souasor mi mwärei ewe pworofel än ewe Samol mi Lapalap, ewe mi nemeni unusen fanüfan, repwe ipwelong lon ewe chanpupu Jortan, pupun ewe koluk epwe kaüla. Nge ewe koluk mi putiu me asan epwe aioifengen.”

Josua 4:4

Mürin Josua a körato engol me ruoman mwän seni lein ekewe aramasen Israel, ätekewe i a filiretä, akaeman seni eu me eu ainang.

Josua 4:8

Iwe, ekewe re Israel ra föri usun mine Josua a allük ngeniir. Ra angei engol me ruoföü fau seni lukalapen ewe chanpupu Jortan, eföü fän iten eu me eu ekewe ainangen Israel, usun ewe Samol mi Lapalap a üreni Josua. Iwe, ra uwala ekewe fau lon ewe leni ia ra asösö ie, o iseniretiu ikenan.

1. Samuel 7:12

Mürin, Samuel a eki eföü fau o aüetä lefilen Mispa me Jesana. Iwe, a aita ngeni Epineser , pun a apasa, “Tori iei ewe Samol mi Lapalap a alisikich.”