Jeremaia 8:2 - Chuukese Bible

² Iwe, repwe toropas fän akkar me maram pwal fän ekewe fün läng meinisin. Pun ikei ekewe mettoch ekewe aramas ra echeniir o angang ngeniir, ra pwal angei ar öüröür me rer o fel ngeniir. Esap wor eman epwe ionifengeni ekewe chü o peiaseniir. Repwe usun chök kiten mongö me won pwül.

Jeremaia 8:2 Iomraidhean Croise

2. King 17:16

Ra aleasolap ngeni ekewe allük meinisin än ewe Samol mi Lapalap ar we Kot o föri ruu uluulun kow seni piras, ra pwal föri uluulun ewe anüfefin Asera pwe repwe fel ngeniir, ra pwal fel ngeni ekewe fün läng o angang ngeni ewe anü Paal.

2. King 21:3

Pun a aüsefälietä ekewe lenien fel won ekewe leni tekia Hiskia saman we a atarela. A senätä rongen asor fän iten ewe anü Paal o föri uluulun ewe anüfefin Asera, usun Ahap ewe kingen Israel a föri, a pwal fel ngeni ekewe fün läng meinisin.

2. King 21:5

Manasa a pwal senätä rongen asor fän iten ekewe fün läng meinisin me lon ekewe ruu lenien mwich mwen ewe imwenfel.

2. King 23:5

A pwal asüela ekewe souasor mi angang ngeni anümwäl, chokewe ekewe kingen Juta ra filiretä pwe repwe keni apach mi pwokus lon ekewe lenien fel won ekewe leni tekia, lon ekewe telinimwen Juta, pwal pwelin ünükün Jerusalem. Ewe king a asüela chokewe meinisin mi keni apach mi pwokus ngeni ewe anü Paal, ngeni akkar me maram, ngeni ekewe muchiechien fü me ekewe fün läng meinisin.

Kölfel 53:5

Mürin a toriir niuokus watte, eu niuokus watte esamwo toriir me mwan. Pun Kot epwe atoropasafeili chün chokewe mi oput nöün aramas. Chon Israel repwe fokun akufuur, pun Kot a fen pöütirela.

Kölfel 83:10

Ir ra ninnila me Entor, inisir a usun chök kiten mongö won pwül.

Kölfel 83:11

Kopwe föri ngeni ar kewe aramas tekia pwe repwe usun chök Orep me Seep, nge ar kewe samol meinisin repwe usun chök Sepa me Salmuna,

Än Salomon Afalafal 6:3

Are eman mwän a wor ipükü nöün, are a pwal manauatam, inamwo ika fite ierin manauan, are esap tongeni alomota feiöchün manauan, esap pwal fisiöch angangen won peiasan, üa mefi pwe eman mönükol mi mwetela a feiöch seni.

Jeremaia 14:16

Nge ekewe aramas ir ra osuni ngeniir repwe ninnila usun chök ekewe soufos. Somär repwe koturulong lon ekewe alen Jerusalem, nge esap wor eman epwe peiaseniir. Ei epwe fis ngeniir meinisin fiti pwülüer me nöür mwän me fefin. Pun üpwe awarato wor liwinin püsin ar föföringau.

Jeremaia 16:11

mürin kopwe üreniir, ‘Iei alon ewe Samol mi Lapalap: Ei a fis pokiten ämi kewe lewo ra likitieila, pwe repwe angang ngeni pwal ekoch kot o fel ngeniir. Ra likitieila, nge resap aleasochisi ai kewe allük.

Jeremaia 16:4

Repwe mäla ren samau mi afeiengau. Esap wor eman epwe kechü wor, resap pwal peias, nge repwe usun chök kiten mongö won pwül. Repwe mäla lon maun pwal ren lengita, nge ekewe machang me ekewe manmwacho repwe ochei somär.

Jeremaia 16:6

Iwe, aramas tekia me aramas tekison repwe mäla lon ei fanü. Resap peias, esap pwal wor eman epwe kechüeitiir ika akinasa inisin ika räisöla möküran fän iter.

Jeremaia 19:13

Ekewe imw lon Jerusalem pwal imwen ekewe kingen Juta repwe limengau usun ewe leni Tofet, fokun ekewe imw meinisin aramas ra keni apach mi pwokus wor ngeni ekewe fün läng, ra pwal ninätiu asoren ün ngeni pwal ekoch kot.’”

Jeremaia 22:19

Aramas repwe peiaseni usun ar peiaseni eman aas, repwe etekenawu o aturawu lükün asamalapen ewe telinimw Jerusalem.”

Jeremaia 25:33

Iwe, chokewe mi ninnila me ren ewe Samol mi Lapalap lon ewe ränin repwe toropasfeil seni epek fanüfan tori epek. Esap wor eman epwe kechüeitiir, ika ionifengeniir, ika peiaseniir. Repwe usun chök kiten mongö me won pwül.

Jeremaia 31:40

Unusen ewe lemol ia ekewe somä me ewe falangen ekkei ra nom ie, pwal ekewe lemäl meinisin achöüala ngeni ewe oüwö Kitron tori lepwokukun ewe Asamalapen Oris awenewenen ötiu, ekei kinikin meinisin repwe pin fän itei. Ewe telinimw esap fokun chüen katatiu ika tala.”

Jeremaia 36:30

Iei mine ngang ewe Samol mi Lapalap üa apasa fänäsengesin Jehoiakim ewe kingen Juta: Esap wor eman mwirimwirin epwe king o nemeni ewe mwü Tafit a nemeni me lom. Nge somän epwe koturula lükün pwe epwe nom fän pwichikar lerän me patapat lepwin.

Jeremaia 9:20

Iwe, üa üra, “Ämi kana fefin, oupwe rongorong alon ewe Samol mi Lapalap, oupwe aüselinga an kewe kapas. Oupwe aiti ngeni nöümi kewe föpwül usun ar repwe ngüngüres, nge iteiten eman me eman epwe aiti ngeni chon arun echö kölün kechü.

Jeremaia 9:21

Pun mäla a tötä me lon asamwachon imwach o tolong lon ekewe imwen king. A ärala ekewe semirit me won ekewe al me ekewe alüal lon ekewe lenien amwicheich.

Jeremaia 9:22

Somän ekewe aramas repwe toropasfeil ekis meinisin usun kiten mongö lon ekewe leni mi amassawa. Repwe usun chök pilükün wiich ekewe chon pöküpök ra likiti, nge esap wor eman a ionifengeniir. Iei met ewe Samol mi Lapalap a akünö ngeniei pwe üpwe apasa.”

Isikiel 29:5

Iwe, üpwe aturukela lon fanüapö, en me ikenen om we chanpupu. Kopwe turula won eu leni mi amassawa, nge esap wor eman epwe angeek o peiasenuk. Iwe, üpwe pöütukela ngeni ekewe manmwacho me mansüsü pwe repwe ocheek.

Isikiel 39:5

Kopwe mäla won ekewe leni mi amassawa, pun ngang Kot ewe Samol mi Lapalap üa kapas.

Isikiel 6:5

Üpwe anomu somän ekewe chon Israel fän mesen ar kewe uluulun anümwäl, üpwe pwal atoropasafeili chür ünükün ekewe rongen asor.

Isikiel 8:16

Mürin, Kot a emwenieila ren ewe leni mwen imwenfelin ewe Samol mi Lapalap. Me ikenan üa küna rüe me liman mwän lükün asamalapen ewe imwenfel lefilen kengkangan me ewe rongen asor. Iwe, ra kul seni ewe imwenfel, ra newenewen ngeni ötiu o fel ngeni akkar.

Sefanaia 1:17

Iei alon ewe Samol mi Lapalap, “Üpwe atoto riaföü won aramas pwe repwe fetal usun chon chun pokiten ar tipis ngeniei. Char epwe ninitiu usun chök koluk, nge fituker epwe toropas usun chök kiten mongö.”

Sefanaia 1:5

Üpwe ärala chokewe mi fel ngeni akkar me maram me ekewe fü me won ekewe imw. Üpwe pwal ärala chokewe mi fel ngeniei o eäni itei lon ar pwon fän akapel, nge ra pwal eäni iten ewe kot Milkom lon ar pwon fän akapel.

Föför 7:42

Iei mine Kot a kul seniir o asechiirela pwe repwe fel ngeni ekewe füün läng, usun a fen mak lon ekewe puken soufos: ‘Ämi chon Israel! Ifa usun, ämi oua uwato rei asor me lifang lon ekewe faik ier me lon ewe fanüapö?

Tuteronomi 17:3

are a feila o angang ngeni pwal ekoch kot, are a fel ngeniir, ika a fel ngeni akkar ika maram ika ngeni ekewe fü ewe Samol mi Lapalap esap tipeeu ngeni,

Tuteronomi 4:19

Oupwe tümwünükemi, pwe lupwen oupwe netä läng o küna akkar me maram me fü kana pwal masouen fän läng meinisin ousap tupula o fel ngeniir ika pwal angang ngeniir. Pun ewe Samol mi Lapalap ämi we Kot a mwütätä ngeni chon ekewe mwü won fanüfan ekei mettoch pwe repwe fel ngeniir.