Jeremaia 7:23 - Chuukese Bible

²³ Nge üa allük ngeniir pwe repwe aleasochisiei, mürin ngang üpwe ar Kot, nge ir repwe nei aramas. Repwe apwönüetä ai kewe allük pwe repwe feiöch ren.

Jeremaia 7:23 Iomraidhean Croise

Hiop 36:11

Are repwe aleasochisi Kot o angang ngeni, repwe aunusa ierin manauer fän pisekisek me feiöch.

Kölfel 119:3

chokewe resap föri mine a ngau, nge ra chök föri letipen Kot.

Kölfel 40:6

Kosap mochen ekewe asor me lifang, nge ka ngeniei selingei pwe üpwe rongorong ngonuk. Kosap allük pwe üpwe eäni asoren kek me asoren tipis.

Kölfel 81:13

Amwo nei aramas repwe aüselinga aloi, amwo chon Israel repwe aleasochisiei.

Ekistos 15:26

o apasa, “Are oupwe likiitü le aüselinga mweliei ngang ewe Samol mi Lapalap ämi we Kot o föri mine a pwüng me fän mesei, are oupwe aleasochis ngeni ai kewe allük o apwönüetä ai kewe pwüüng meinisin, üsap uwato womi eu lein ekewe samau üa uwato won chon Isip, pun ngang ewe Samol mi Lapalap ämi sousafei.”

Ekistos 16:32

Moses a üra, “Iei usun mine ewe Samol mi Lapalap a allük, ‘Oupwe iseis ei mongö ükükün masouen esop kalon, epwe nom pwe mwirimwirimi repwe küna ei mongö üa amongöü ngenikemi lon fanüapö, lupwen üa emwenikemiiwu seni Isip.’”

Aisea 3:10

Oupwe asile ngeni chon pwüng pwe repwe feiöch, pun repwe feiöchüni feiöchün ar föför.

Jeremaia 11:4

Iei ewe pwon üa ngeni ämi kewe lewo, lupwen üa emwenirewu seni Isip, ewe fanü mi usun chök eu um mi fokun pwichikar ngeniir. Üa üreniir pwe repwe aleasochisiei o föri meinisin mine üa allük ngeniir. Iwe, repwe nei aramas, nge ngang üpwe ar Kot.

Jeremaia 11:7

Seni ewe fansoun üa emwenawu ämi kewe lewo seni ewe fanü Isip tori ikenai üa fönökisiir o üreniir pwe repwe aleasochisiei.

Jeremaia 13:11

Pun usun echö achök a pacheri wänükün eman aramas, iei usun üa mochen pwe chon Israel me chon Juta meinisin repwe pacheriei. Üa föri ei pwe ir repwe nei aramas üpwe iteüöch rer, aramas repwe pwal mwareitiei o alingaei rer. Nge ir resap mochen aleasochisiei.”

Jeremaia 22:21

Üa kapas ngenikemi, lupwen oua chüen pisekisek, nge oua üra, “Aisap mochen aüseling.” Iei lapalapemi seni me lom, pwe ousap aleasochis ngeni ai kewe kapas.

Jeremaia 22:3

Iei alon ewe Samol mi Lapalap: Oupwe föri mine a wenechar me pwüng o angasa ewe mi riaföü seni ewe chon ariaföüü. Ousap föri mine a ngau ika ariaföüü ewe chon ekis, ewe mi mäsen me ewe fefin mi mä pwülüan, ousap pwal niela eman esap wor an tipis lon ei leni.

Jeremaia 24:7

Üpwe ngeniir eu leluk mi silei pwe ngang ewe Samol mi Lapalap. Ir repwe nei aramas, nge ngang üpwe ar Kot, pun repwe liwinsefälitiei ren unusen leluker.

Jeremaia 31:33

Nge iei ewe pwon mi fö üpwe föri ngeni chon Israel lon ekana rän: Üpwe atolonga ai kewe allük lor o makeretiu lon leluker. Iwe, üpwe ar Kot, nge ir repwe nei aramas kana.

Jeremaia 32:23

Nge lupwen ra tolong lon ei fanü o fanüeni, resap aleasochis ngonuk ika föri pwüngün om allük. Resap fokun föri och usun mine ka allük ngeniir pwe repwe föri. Iei mine ka awarato wor ekei feiengau meinisin.

Jeremaia 38:20

Nge Jeremaia a üra, “Resap asechikolong lepöür. Kopwe aleasochisi mine üa ürenuk fän alon ewe Samol mi Lapalap, mürin kopwe feiöch, nge kosap mäla.

Jeremaia 42:6

Inamwo ika epwe öchitikem ika esap, äm aipwe fokun aleasochisi ewe Samol mi Lapalap ach we Kot, i ewe aia tinukela ren. Pun äm aipwe feiöch are aia aleasochisi ewe Samol mi Lapalap ach we Kot.”

Sefanaia 3:2

Esap mochen rongorong mwelien Kot, esap etiwa an kapasen emirit. Esap lükü ewe Samol mi Lapalap, esap pwal kanoto ren.

Sekaraia 6:15

Iwe, chokewe mi nom lon fanü toau repwe feito o alilis le aüetä Imwenfelin ewe Samol mi Lapalap, nge ämi oupwe silei pwe ewe Samol mi Unusen Manaman a tinieito remi. Ei epwe fis, are oupwe wesewesen aleasochis ngeni alon ewe Samol mi Lapalap ämi we Kot.

Sekaraia 7:7

Ifa usun, sap ikkei alon ewe Samol mi Lapalap ekewe soufosun lom ra asilefeili, lupwen Jerusalem a so o wöümong fiti ekewe telinimw pwelin ünükün, pwal lupwen ewe fanü ör me ewe fanü lotou mi maasies a so?

Nöün Paulus Toropwe ngeni ekewe Souläng lon Rom 16:26

Nge iei ena monomon a pwäpwäla ren makkeen ekewe soufos, o ren än Kot, ewe mi manau tori feilfeilachök we allük a pwäla ngeni chon ekewe mwü meinisin ar repwe silei usun, pwe meinisin repwe lükü o aleasochis ngeni.

2. Korint 10:5

Äm aia awesi ekewe kapas mi mwäl o ataetiu ekewe leni mi tekia meinisin mi epeti än aramas repwe silei Kot. Aia liapeni sokun ekiekin aramas meinisin, pwe repwe aleasochis ngeni Kraist.

Tuteronomi 11:27

Oupwe feiöch are oua aleasochisi än ewe Samol mi Lapalap ämi we Kot kewe allük üa ngenikemi ikenai.

Tuteronomi 13:4

Oupwe fetalla mürin ewe Samol mi Lapalap ämi we Kot o meniniti, oupwe apwönüetä an kewe allük o aleasochisi alon, oupwe pwal fel ngeni o fitipacheiti.

Tuteronomi 13:5

Nge ewe soufos ika soutan epwe ninnila, pun a aiti ngenikemi pwe oupwe ü ngeni ewe Samol mi Lapalap ämi we Kot mi emwenikemiiwu seni ewe fanü Isip o angasakemi seni ewe leni ia ra nöünikemi amanau ie. A pwal sotuni le atokakemi seni mine ewe Samol mi Lapalap ämi we Kot a allük ngenikemi pwe oupwe föri. Iei usun oupwe atowu ewe mi ngau seni lefilemi.

Tuteronomi 30:2

Nge are ämi me mwirimwirimi kana oupwe liwiniti ewe Samol mi Lapalap ämi we Kot o aleasochisi an kewe allük ren unusen lelukemi me unusen ngünümi lon meinisin mine üa allük ngenikemi ikenai,

Tuteronomi 30:20

Oupwe echeni ewe Samol mi Lapalap ämi we Kot, oupwe aleasochisi alon o fitipacheiti. Pun ren ei oupwe manau o ränin manauemi repwe langatamala lon ewe fanü ewe Samol mi Lapalap a pwon fän akapel pwe epwe ngeni ämi kewe lewo Apraham, Isaak me Jakop.”

Tuteronomi 30:8

Nge ämi oupwe aleasochisisefäli alon ewe Samol mi Lapalap o apwönüetä an kewe allük meinisin üa allük ngenikemi ikenai.

Tuteronomi 4:10

usun mine a fis lon ewe rän oua ütä fän mesen ewe Samol mi Lapalap ämi we Kot me fäsonun ewe chuk Horep, lupwen a üreniei, ‘Kopwe amwichato rei ekewe aramas pwe repwe rongorong ai kapas o kaiö usun ar repwe meninitiei lon ränin manauer meinisin won fanüfan. Iei usun repwe pwal aiti ngeni nöür.’

Tuteronomi 4:40

Iwe, oupwe aleasochisi an kewe pwüüng me an kewe allük üa ngenikemi ikenai, pwe oupwe feiöch ämi me mwirimwirimi, oupwe pwal manauatam lon ewe fanü ewe Samol mi Lapalap ämi we Kot epwe ngenikemi pwe fanüemi tori feilfeilachök.”

Tuteronomi 5:16

Kopwe asamolu semom me inom, usun ngang ewe Samol mi Lapalap om Kot üa allük ngonuk, pwe ränin manauom repwe chomongola, kopwe pwal feiöch me lon ewe fanü ngang ewe Samol mi Lapalap om Kot üpwe ngonuk.

Tuteronomi 5:29

Amwo leluker epwe iei chök usun iteiten fansoun, pwe repwe meninitiei o aleasochisi ai kewe allük meinisin, pwe repwe feiöch me mwirimwirir tori feilfeilachök.

Tuteronomi 5:33

Nge oupwe aleasochisi än ewe Samol mi Lapalap ämi we Kot kewe allük a ngenikemi, pwe oupwe manau o feiöch, oupwe pwal manauatam lon ewe fanü oupwe fanüeni.”

Tuteronomi 6:3

Iei mine ämi chon Israel oupwe aüseling ngeni ekewe allük o tümwünüöchü le apwönüretä, pwe oupwe feiöch o fokun chomongola, oupwe pwal nonomola lon ewe fanü mi pwülüöch o fanüeräs, usun ewe Samol mi Lapalap än ämi kewe lewo we Kot a pwon ngenikemi.

Ipru 5:9

Iwe, lupwen a unusöchüla manauan won fanüfan, a wiliti ewe popun küna manau esemüch fän iten chokewe mi aleasochis ngeni.

1. Samuel 15:22

Mürin, Samuel a apasa, “Ifa usun, ewe Samol mi Lapalap epwe efich asoren kek me sokun asor usun an efich aleasochisi alon? Nengeni, aleasochis a mürina seni asor, nge aüseling a mürina seni ach eäni asor iwien ätemwänin sip.